مەملەكەت باسشىسى ءوز جولداۋىندا ءۇشىنشى باعىت ەتىپ اگرارلىق سالاعا ەرەكشە ءمان بەردى. «اقىلدى تەحنولوگيالار» – اگروونەركاسىپ كەشەنىن قارقىندى دامىتۋ مۇمكىندىگى» دەدى. ەلىمىزدىڭ ەكونوميكاسىنىڭ نەگىزگى تىرەگى اگرارلىق سالا تسيفرلاندىرۋ ارقىلى جاڭا داۋىرگە قادام باستى.
وسى اگرارلىق سالانى تسيفرلاندىرۋ ارقىلى الەمدەگى دامىعان ەلدەر قىرۋار قارجى تاۋىپ وتىرعانى بارشامىزعا ايان. ماسەلەن, ساراپشىلاردىڭ بولجاۋىنشا, 2020 جىلعا قاراي الەمدىك ەكونوميكانىڭ 25 پايىزى تسيفرلانعان جۇيەگە كوشپەك. وسى رەتتە, دانيا, گەرمانيا, نورۆەگيا, وڭتۇستىك كورەيا سياقتى كوپتەگەن ەل تسيفرلاندىرۋ جوبالارىن قارقىندى تۇردە ىسكە اسىرۋدا.
اقپاراتتىق تەحنولوگيالار مەن يننوۆاتسيالىق يدەيالار ءسات سايىن جاڭارىپ, كۇن سايىن جاڭاشىلدىق ەنگىزىلىپ جاتىر.
ەلباسى ءوز جولداۋىندا جاڭا تەحنولوگيالار مەن بيزنەس-مودەلدەردى ەنگىزۋ, اگروونەركاسىپ كەشەنىنىڭ عىلىمعا نەگىزدەلۋىن ارتتىرۋ, شارۋاشىلىقتاردى كووپەراتسيالاۋ قاجەتتىگىن ايتادى. اۋىل شارۋاشىلىعى سۋبەكتىلەرىنىڭ كووپەراتيۆ تۇرىندە جۇمىس ىستەۋىنە جان-جاقتى قولداۋ كورسەتۋ كەرەك. مەملەكەت بيزنەسپەن بىرلەسىپ, وتاندىق ءونىمدى حالىقارالىق نارىققا شىعارۋدىڭ ستراتەگيالىق جولىن تاۋىپ, ىلگەرىلەتۋى ءتيىس دەگەن بولاتىن. رەسمي اقپاراتتارعا سۇيەنسەك, حالىقارالىق تاجىريبەدە بيزنەس-قاۋىمداستىق وكىلدەرى تاراپىنان عىلىمدى قارجىلاندىرۋ ۇلەسى ليۋكسەمبۋرگتە – 80%-دى, جاپونيا مەن گەرمانيادا – 70%-دى, فينليانديا, شۆەتسيا, قىتاي, اقش-تا – 65%-دى, ال فرانتسيادا 54 %-دى قۇراسا, بۇل كورسەتكىش ءبىزدىڭ ەلىمىزدە نەبارى 5% عانا.
وسىعان سايكەس اۋىلشارۋاشىلىق سالاسىن زور ەكپىنمەن دامىتۋ ءۇشىن مەملەكەت باسشىسى نۇرسۇلتان نازارباەۆ 5 جىل ىشىندە اگرونەركاسىپ كەشەنىندەگى ەڭبەك ونىمدىلىگىن جانە وڭدەلگەن اۋىل شارۋاشىلىعى ءونىمىنىڭ ەكسپورتىن, تيىسىنشە, كەم دەگەندە 2,5 ەسەگە ارتتىرۋدى تاپسىردى.
ءيا, وسى رەتتە توقتالا كەتەتىن جايت, ەلىمىز ەگەمەندىك العان تۇستا اۋىلشارۋاشىلىق سالاسى وتە ءبىر كۇردەلى كەزەڭنەن ءوتتى. ونىڭ سەبەبى, اۋىل شارۋاشىلىعى مەن ونەركاسىپ سالاسى ونىمدەرىنىڭ اراسىنداعى الشاقتىق بولدى. داعدارىس كەزەڭىندە كولحوزدار مەن سوۆحوزداردا جاپپاي جەكەشەلەندىرىلىپ, جاڭا ناۋقانشىلىقتى باستان وتكەردى. وتپەلى كەزەڭدە كوپتەگەن فابريكا ىستەن شىعىپ, توقىراۋعا ۇشىرادى. ەگىنشىلىك سالاسى دا, مال شارۋاشىلىعى دا قارقىن الا الماي, تومەندەدى.
اۋىر كەزەڭدى باستان وتكىزگەن اۋىلشارۋاشىلىق سالاسى 2000 جىلداردان باستاپ بوي كوتەردى. رەسپۋبليكالىق بيۋدجەتتەن جوسپارلى تۇردە قارجى ءبولىنىپ, بىرنەشە جىل قاتارىنان «اۋىل جىلى» دەپ جاريالاندى. اۋىلعا جاڭا تەحنولوگيالار اكەلىنىپ, مەملەكەت تاراپىنان ەرەكشە نازار اۋدارىلدى. مال, ەگىن شارۋاشىلىعى مەن جاڭا تەحنولوگيا عانا ەمەس, اۋىل حالقىنىڭ الەۋمەتتىك ماسەلەسىنە, اتاپ ايتقاندا, دەنساۋلىق ساقتاۋ, ءبىلىم بەرۋ سالالارىنا ەرەكشە دەن قويىلدى.
بۇنىڭ بارلىعى ەلباسىنىڭ ساليقالى ساياساتىنىڭ ناتيجەسى. حالىقتىڭ 40 پايىزدان استامى مەكەن ەتەتىن اۋىلدىق ەلدى مەكەندەردى پرەزيدەنتىمىز ۇنەمى نازارىندا ۇستاپ, قولداۋ ءبىلدىرىپ, اۋىل حالقىنا دەم بەرۋدە.
قازاقستان رەسپۋبليكاسىنىڭ بəسەكەگە قابىلەتتى ەلدەردىڭ قاتارىنا كىرۋى, دۇنيەجۇزىلىك ساۋدا ۇيىمىنا ەنۋى, ەۋرازيالىق ەكونوميكالىق وداققا مۇشە بولۋى وتاندىق اۋىل شارۋاشىلىعى سالاسىنا ۇلكەن ءۇمىت ارتادى. ويتكەنى اۋىل شارۋاشىلىعى – ەل ەكونوميكاسىنىڭ نەگىزگى سالالارىنىڭ ءبىرى. وسى رەتتە اگرارلىق سەكتوردىڭ دامۋى مەملەكەت ءۇشىن ەكونوميكالىق جانە الەۋمەتتىك نەگىزدە وتە ماڭىزدى.
وسىلاردى ەسكەرە وتىرىپ, ەلىمىز ءۇشىن ۇلكەن جاڭالىققا اينالعان تسيفرلاندىرۋ جۇيەسىن ەنگىزۋدى, جوعارى ساپالى ماماندار دايارلاپ, جاڭا ادىستەر مەن تاسىلدەردى قولدانۋدى, ەگىستىكتەگى جەرلەر مەن شارۋا قوجالىقتارىنىڭ جۇمىسىن جانداندىرۋدى ۋاقىت تالاپ ەتىپ وتىر.
ساكەن قانىبەكوۆ,
پارلامەنت ءماجىلىسىنىڭ دەپۋتاتى
