2018 جىلدىڭ ەكىنشى توقسانىنان باستاپ, مەملەكەتتىك نومىرلەرگە G, I, J, Q ارىپتەرى جاڭادان ەنگىزىلىپ, اقىلى نەگىزدە ساتىلا باستاعانى بەلگىلى. جىل قورىتىندىسى بويىنشا ءنومىر ساتۋدان تۇسكەن قارجى كولەمى 4 ميلليارد تەڭگەنى قۇراعان.
ايتا كەتەرلىگى, وتكەن جىلدىڭ باسىندا ەلىمىزدە ادام اتىنىڭ العاشقى ارىپتەرى جازىلعان كولىك نومىرلەرى دە ساتىلىمعا شىققان بولاتىن. وندا اركىم ارىپتەردى ءوزى قالاعان كۇيىندە جازدىرا الادى. بىراق ونىڭ وزىندىك قۇنى دا بار. ماسەلەن, 010, 020, 030 دەگەن نومىرلەر شامامەن 138 مىڭ تەڭگە تۇرادى. ال وعان قالاعان ارىپتەردى قوسساڭىز, 276 مىڭ تەڭگەدەن اسىپ جىعىلادى.
قازاقستاندىق اۆتوبيزنەس قاۋىمداستىعى تاراتقان اقپاراتقا سايكەس, بىلتىر اكىمشىلىك پوليتسيا ورگاندارىندا بارلىق ۇلگىدەگى, ونىڭ ىشىندە قايتا رەسىمدەۋدەن وتكەن, اۆتوموبيل اۋىستىرعان 1,2 ملن كولىك قۇرالىن تىركەدى. بۇل كورسەتكىش الدىڭعى جىلمەن سالىستىرعاندا 14,8 پايىزعا جوعارى.
2018 جىلدىڭ باسىنان بەرى تىركەۋگە تۇرعان كولىك سانى اي سايىن 7,5 پايىزعا ارتىپ وتىرعان. تىركەلگەن كولىك سانىنىڭ كولەمى بويىنشا وڭىرلەر مەن ءىرى قالالارعا توقتالار بولساق, تۇركىستان وبلىسى بويىنشا – 173 925 اۆتوكولىك, الماتى وبلىسىندا – 173 453, الماتى قالاسىندا – 151 030, استانا قالاسىندا – 101 431, قاراعاندى وبلىسىندا – 81 967, شىعىس قازاقستان وبلىسىندا 73 130 اۆتوكولىك تىركەلىپتى.
اتالعان قاۋىمداستىق جۇرگىزگەن ساراپتاما ناتيجەلەرى بويىنشا ەلىمىزدەگى اۆتوپاركتەردىڭ «قارتايعانى» انىقتالىپ وتىر. 2018 جىلدىڭ باس كەزىندەگى جاعداي بويىنشا جاڭادان تىركەلگەن كولىكتەردىڭ 790 171-ءىنىڭ زاۋىتتان شىققانىنا 10 جىلدان اسقان. 20 جىلدان ارتىق جۇرگەن ماشينالار سانى − 464 236. 10-20 جىل ارالىعىندا جۇرگەن كولىكتەر سانى – 325 935 بىرلىك. ال 3-10 جىل ارالىعىنداعى تەحنيكا سانى – 290 205, 3 جىل تولماعان كولىكتەردىڭ قاتارى – 112 833.
ەركەجان ايتقازى,
«ەگەمەن قازاقستان»
