16 قاڭتار، 2019

ەلەكتروندى قىزمەت – زاماناۋي مىندەت

661 رەتكورسەتىلدى

كەشە پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا «ەلەكتروندى ۇكىمەت» جانە مەملەكەتتىك قىزمەتتەر كورسەتۋدى دامىتۋ ماسەلەسى قارالدى. ەلباسى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا مەملەكەتتىك قىزمەتتەردىڭ 2020 جىلى كەمىندە 90 پايىزىن ەلەكتروندى فورماتقا كوشىرۋ تۋرالى تاپسىرما بەرگەن بولاتىن.

64 جاڭا مەملەكەتتىك قىزمەت ەلەكتروندى فورماتقا كوشىرىلدى 

بۇگىندە مەملەكەتتىك قىزمەت ء تىزىلىمىنىڭ 741 اتاۋى بار. اقپارات جانە كوممۋنيكاتسيالار ءمينيسترى داۋرەن اباەۆتىڭ ايتۋىنشا 454-ءى نەمەسە 61 پايىزى ەلەك­تروندى فورماتتا قولجەتىمدى. ال 165 مەملەكەتتىك قىزمەت تەك قانا ەلەكتروندى تۇردە كورسەتىلەدى. ونىڭ جارتىسىنا جۋىعى – ليتسەن­زيالار مەن رۇقسات قۇجاتتارى، سون­داي-اق كاسىپكەرلىكتى سۋبسيديالاۋ قىزمەتتەرى. بۇل  جۇمىستاردىڭ بار­لىعى بيزنەستى دامىتۋدا اكىمشىلىك كە­دەرگىلەردى جويۋ ءۇشىن قولعا الىن­عان. وتكەن جىلى 64 جاڭا مەم­لەكەتتىك قىزمەت ەلەكتروندى فور­ماتقا كوشىرىلدى.

ەلەكتروندى مەملەكەتتىك قىز­مەت كورسەتۋدىڭ نەگىزگى قۇرالى – ەلەكتروندى ۇكىمەت پورتالى. بۇ­گىنگى تاڭدا e-GOV-قا 8،5 ملن-نان استام پايدالانۋشى تىركەلگەن. 2018 جىلدىڭ وزىندە وسى پورتال ارقىلى 30 ملن مەملەكەتتىك قىز­مەت كورسەتىلدى. وڭتايلانۋى ءتيىس 588 مەملەكەتتىك قىزمەت انىق­تالدى. ولاردى ەلەكتروندى فور­مات­قا اۋىستىرۋ تۇستارى جان-جاق­تى قاراستىرىلدى. سونداي-اق رە­سىمدەۋ ۋاقىتىن، قۇجاتتار تىزبەگىن قىس­قارتۋدى، كومپوزيتتىك نەمەسە پرواكتيۆتى فورمادا انىقتاما بەرۋ تاسىلدەرىن، ارتىق رەسىمدەر مەن كەلىسىمدەردى قىسقارتۋ جايى دا تو­لىق پىسىقتالدى. وسى جۇمىستىڭ قو­رى­تىندىسى بويىنشا 141 مەملە­كەت­تىك قىزمەتتى ەلەكتروندى فور­ماتقا كوشىرۋ جوسپارلانىپ وتىر. ال 447 مەملەكەتتىك قىزمەت ءتۇرىنىڭ كەيبىر قۇجاتتارى مەن مەرزىمىن قىسقارتۋ قاراستىرىلعان. بۇل ازاماتتاردىڭ ۋاقىتىن ۇنەمدەيدى.   

ماسەلەن، ەڭبەككە جارام­سىز­دىعى تۋرالى بەرىلەتىن پاراقتى ەلەك­تروندى فورماتقا كوشىرۋ كوز­دەلگەن. ىڭعايلى بولۋىمەن قاتار، بۇل ۇلت دەنساۋلىعى جونىندەگى دەرەكتەردى ءبىر ەلەكتروندى بازاعا توپتاستىرۋعا جول اشادى. «Big Data» تەحنولوگياسىنىڭ كومەگىمەن جينالعان دەرەكتەردى دەنساۋلىق ساقتاۋ مەن فارماكولوگيا سالاسىندا ءتيىمدى پايدالانۋ جوسپارلانىپ وتىر. بۇدان وزگە، «بالانى پاتروناتتىق تاربيەگە بەرۋ» مەن «پاتروناتتىق تاربيەلەۋشىلەرگە قارجى ءبولۋ» سياقتى ەكى مەملەكەتتىك قىزمەت بىرىكتىرىلدى.

اقپارات جانە كوممۋنيكاتسيا­لار مينيس­ترلىگىنىڭ اقپاراتىنا سايكەس كورسەتىلەتىن مەملەكەتتىك قىزمەتتەردى تۇگەل اۆتوماتتاندىرۋ مۇمكىن ەمەس. ويتكەنى ءتيىستى ماماننىڭ قاتىسۋىنسىز جۇزەگە اسپايتىن دا قىزمەت تۇرلەرى بار. ماسەلەن، مۇمكىندىگى شەكتەۋلى با­لالاردى تەكسەرۋ مەن ولارعا مەديتسينالىق-پەداگوگيكالىق كو­مەك كورسەتۋ قىزمەتى. وسىنداي با­عىتتاعى قىزمەتتەردىڭ پروتسەستەرى مەن مەرزىمدەرىن نەعۇرلىم وڭتاي­لاندىرۋ ءۇشىن ءتيىستى شارالار اتقارىلىپ جاتىر.

ۇكىمەت جانىنداعى ۆەدوم­ستۆو­ارالىق كوميسسيانىڭ بارلىق ۇسىنىستارىن جۇزەگە اسىرۋ ءۇشىن 486 جول كارتاسى بەكىتىلدى. ال 2018 جىلدىڭ قورىتىندىسى بويىن­شا 76 مەم­لەكەتتىك قىزمەت وڭتاي­لاندىرىلدى.

2018 جىلدىڭ قورىتىندىسى بو­يىنشا كەلەسى رەسىمدەر جەڭىل­دەتىلدى.

بىرىنشىدەن، جۇرگىزۋشى كۋالىگىن الۋ مەن كولىك قۇرالىن تىركەۋ ەلەك­تروندى ءوتىنىم ار­قىلى قابىل­دانادى. قازىرگى ۋاقىتقا دەيىن بۇل قىزمەت ءتۇرى 23 مىڭنان استام رەت پاي­دالانىلعان. بۇعان دەيىن ءبىر كولىكتى تىركەۋ 6 ساعاتقا سوزىلسا، قازىر 2 ساعاتتان اسا ۋاقىت قانا جۇمسالادى. كولىكتى ساتۋ نەمەسە ساتىپ الۋعا 20 مينۋت ۋاقىت جەتكىلىكتى. قاعاز جۇزىندەگى قۇجاتتار قاجەت ەمەس. «قازپوشتا» ارقىلى دايىن قۇجات پەن كولىك ءنومىرىن جەتكىزىپ بەرۋ مۇمكىندىگى بار.

سونداي-اق ازاماتتار وزدەرىنە ۇناعان كەز كەلگەن مەملەكەتتىك كولىك ءنومىرىن يەمدەنۋگە مۇمكىندىك الدى. ەكىنشىدەن، اكىمشىلىك ايىپپۇلداردىڭ بار-جوعىن دەرەۋ تەكسەرىپ الۋعا بولادى. ۇشىنشىدەن، پرواكتيۆتى رەجىمدە كورسەتىلەتىن مەملەكەتتىك قىزمەتتەردى جالعاستىرۋ جوسپارلانىپ وتىر. ولار: مۇگەدەكتىكتى انىق­تاۋ، جاردەماقى تاعايىنداۋ، اقشالاي تولەمدەر، الەۋمەتتىك تو­لەمدەر، پروتەز-ورتوپەديالىق كو­مەك جانە تاعى باسقالارىنا بايلا­نىستى. مۇمكىندىگى شەكتەۋلى جان­دارعا اتالعان الەۋمەتتىك كومەك­تەردى حالىققا قىزمەت كورسەتۋ ور­تا­­لىق­تارىنا كەلمەي-اق، وسىلايشا كەشەندى تۇردە قابىلداۋعا جاعداي تۋىپ وتىر.

ەلەكتروندى ۇكىمەتتىڭ m-Gov ءم­و­بيلدى قوسىمشاسىن دامىتۋ تۇرعىسىنان بۇگىنگى تاڭدا 87 قىزمەت پەن سەرۆيستى عانا پايدالانۋعا مۇمكىندىك بار. بۇل قوسىمشانى قازىر 1،3 ملن ازامات تۇتىنىپ وتىر. 2018 جىلدىڭ وزىندە m-Gov ارقىلى 3،6 ملن قىزمەت كورسەتىلگەن.

نورماتيۆتىك-قۇقىقتىق بازانى جەتىلدىرۋ اياسىندا 43 زاڭ مەن 10 كودەكستە 500 تۇزەتۋدى قاراستىراتىن زاڭ جوباسى ازىرلەندى. اتالعان زاڭ جوباسى 121 مەملەكەتتىك قىز­مەتتى وڭتاي­لان­دىرۋعا باعىتتالعان بىر­قاتار تۇزەتۋدەن تۇرادى. اتاپ ايتقاندا: نەكەنى تىركەۋ قىزمەتىن وڭ­تايلاندىرۋ (1 ايعا سوزىلعان پرو­تسەستى 3 جۇمىس كۇنىندە رەسىم­دەۋ­گە مۇمكىندىك بەرەدى)، سالىق تولەۋ­شىلەردىڭ ارتىق تولەنگەن سوماسىن اۆتوماتتى تۇردە قايتارۋ، مەملەكەتتىك قىزمەتتەر ۇسىنۋ ءتارتىبىن رەتتەۋ بويىنشا جالپى العاندا 3،5 مىڭنان استام ستاندارت پەن رەگلامەنت وزگەرەدى. سونىمەن قاتار «قاناتقاقتى جوبا» تۇسىنىگىن ەنگىزۋ جوسپارلانىپ وتىر. وسى شا­رالاردىڭ ناتيجەسىندە 2019 جى­لى كورسەتىلەتىن مەملەكەتتىك قىز­مەتتەردىڭ 80 پايىزى، ال 2020 جى­لى 90 پايىزى اۆتوماتتاندىرى­لادى. ءبىر جىلدا قاعاز تۇرىندە ۇسى­نىلاتىن 110 ملن قۇجات قىسقارادى.

ەسكە سالا كەتەيىك، 2018 جىلى ەلەكترون­دى ۇكىمەتتىڭ دامۋ دەڭگەيى بويىنشا بۇۇ وتكىزگەن زەرتتەۋلەر ناتيجەسىندە، قازاقستان دامۋ قارقىنى وتە جوعارى مەملەكەتتەر اراسىندا 39-ورىندى يەلەندى. قازاقستاننىڭ ەلەكتروندى ۇكىمەتى قازىر ە-GOV 2.0. ساتىسىندا تۇر. قا­زىرگى تاڭدا «تسيفرلى قازاقستان» باع­دارلاماسىنىڭ اياسىندا e-GOV 3.0 ساتىسىنا كوشۋ جۇمىستارى جۇر­گىزىلۋدە. ايتا كەتۋ كەرەك، e-GOV 3.0 ساتىسى «جا­سان­دى زەردە»، «پرواكتيۆتى قىزمەتتەر»، «تسيفر­­لاندىرىلعان ءومىر ساتتەرى»، «زات­تار ينتەر­نەتى» مەن تاعى باسقا دا ەلەمەنتتەردىڭ ەن­گىزىلۋىمەن سي­پات­تالادى. اقپارات جانە كوم­مۋ­ني­­كا­تسيالار مينيسترلىگىنىڭ دەرەك­تەرىنە سايكەس، قازاقستاندا 2021 جىلى ە-gov 3.0 ساتىسىنا تولىق كوشۋ كوزدەلگەن.

741 قىزمەتتىڭ 598-ءى مەملەكەتتىك كورپوراتسيا ارقىلى قول­جەتىمدى

«ازاماتتارعا ارنالعان ۇكىمەت» مەملە­كەتتىك كورپوراتسياسى» كەاق باسقارما تور­اعاسى ابىلايحان وس­پانوۆ مەملەكەتتىك قىز­مەتتەر تىزى­لىمىندەگى 741 قىزمەتتىڭ 598-ءى مەم­لەكەتتىك كورپوراتسيا ارقىلى قول­­جەتىمدى ەكەنىن ايتتى. وعان 325 فرونت-وفيس، قازاقستان بويىنشا 6 سەكتورى بار 16 مامانداندىرىلعان حقكو، سونىڭ ىشىندە الماتىدا 4 سەك­تور جانە تۇركىستان وبلىسىندا 2 سەكتور، 70 ءموبيلدى حقكو جانە «قازپوشتا» اق-نىڭ 1656 بو­لىم­شەسى قاتىسادى. سونىمەن قاتار ازاماتتاردىڭ ەلەكتروندى قىز­مەتتەردى پايدالانۋ دەڭگەيىن ارت­تىرۋ ماقساتىندا 60/40 جاڭا قاعي­دا­تىنا سايكەس، فرونت-وفيستەردىڭ كەڭ اۋقىمدى ترانسفورماتسيالا­نۋى جۇرگىزىلىپ جاتىر. بۇدان باس­قا، مەملەكەتتىك قىزمەتتەردى الۋ پروتسەسىن جەڭىل­دەتۋ ءۇشىن قىز­مەت الۋشىلاردىڭ جەكە باسىن راس­تاۋدىڭ جاڭا تەتىگى ىسكە قوسىلدى. ەندى ازاماتتار قىزمەتتى بەت-بەينەسى نەمەسە ساۋساق ىزدەرىنىڭ كومەگىمەن الا الادى، سونىڭ ناتيجەسىندە ەلەكتروندى تسيفرلىق قولتاڭبا قول­دانۋ نەمەسە جەكە كۋالىكتى ۇسىنۋ قاجەتتىلىگى جويىلادى.

وتىرىس بارىسىندا مەملەكەتتىك قىز­مەت­تەردى ۇسىنۋ ساپاسىن ارتتىرۋ جۇمىستارى تۋرالى اقمولا وب­لى­سىنىڭ اكىمى مالىك مىرزالين، شى­عىس قازاقستان وبلىسىنىڭ اكىمى دانيال احمەتوۆ، قوستاناي وبلى­سىنىڭ اكىمى ارحيمەد مۇحامبەتوۆ، استانا قالا­سىنىڭ اكىمى باقىت سۇلتانوۆ، الماتى قالاسىنىڭ اكىمى باۋىرجان بايبەك باياندادى.

ماسەلەنى قورىتىندىلاعان ۇكىمەت باسشىسى باقىتجان ساعىن­تاەۆ جۇمىس ساپاسىن ارتتىرۋدى تاپسىردى. تەك 4639 كولىك ونلاين-تىركەۋدەن وتكەنى، 18 مىڭ ادام جۇرگىزۋشى كۋالىگىن العانى اتالىپ ءوتتى. حالىققا وسى قىزمەتتەردىڭ پايدالىلىعىن ەسكەرە وتىرىپ، كورسەتكىشتەردىڭ تومەن بولۋىنىڭ سەبەبى – حالىق اراسىندا ءتۇسىندىرۋ جۇمىستارىنىڭ ءالى دە جەتكىلىكسىز ەكەنى ايتىلدى. ب.ساعىنتاەۆ مەملە­كەتتىك قىزمەت كورسەتۋ سەكتورىن تسيفر­لاندىرۋ تۋرالى ءتۇسىندىرۋ جۇ­مىس­تارىن وتكىزۋدى، سونداي-اق حا­لىقتى قاجەتتى تسيفرلىق داعدىلارعا جۇيەلى نەگىزدە وقىتۋدى تاپسىردى.

سونىمەن قاتار مەملەكەتتىك قىزمەتتەردى ەلەكتروندى فورماتتا بەرۋ جۇمىسىن جە­تىلدىرۋ قاجەت. اتاپ ايتقاندا، mGov موبيلدىك قوسىمشاسىندا قولجەتىمدى مەم­لەكەتتىك قىزمەتتەردىڭ سانىن ەتسق-سىز ءبىر رەتتىك پارول بويىنشا، ءبىر ءوتىنىش نەگىزىندە ۇلعايتۋ، سون­داي-اق قاجەتتى زاڭنامالىق وزگە­رىستەردى ۋاقتىلى قابىلداۋدى قام­تاماسىز ەتۋ كەرەك. بۇل – حالىق ءۇشىن اسا ماڭىزدى. وسىعان وراي، جوبا­لىق وفيس اياسىندا مەملەكەتتىك قىز­مەت­تەردى تسيفرلى فورماتقا كوشىرۋدىڭ ناقتى مەرزىمى مەن ماقساتتى ينديكاتورلارىن بەلگىلەۋ تاپسىرىلدى.

ب.ساعىنتاەۆ مەملەكەتتىك قىز­مەتتەر سالاسىن دامىتۋ ماسەلەلەرى مەم­لەكەت باسشىسىنىڭ ايرىقشا باقىلاۋىندا ەكەنىن جانە «تسيفرلى قازاقستان» باعدارلاماسىنا ەن­گى­زىلگەنىن اتاپ ءوتتى. ۇكىمەت جىل سا­يىن ەل پرەزيدەنتىنە ەسەپ بەرەدى. وتكەن جىلدىڭ قورىتىندىسى بو­يىنشا اتقارىلعان جۇمىستار تۋرا­لى ەسەپ دايىنداۋ قاجەت. اقپا­رات جانە كوممۋنيكاتسيالار مي­نيسترلىگىنە ءبىر اي ۋاقىت ىشىندە مۇددەلى مەملەكەتتىك ورگاندار­مەن، «ازاماتتارعا ارنالعان ۇكى­مەت» مەملەكەتتىك كورپوراتسيا­سىمەن بىر­لەسىپ، بيىل ەلەكتروندى فورماتقا كو­شى­رۋگە ءتيىستى مەملەكەتتىك قىزمەت­تەردىڭ تىزبەسىن جاساۋ تاپسى­رىلدى. بارلىق ورتالىق جانە جەر­گىلىكتى مەملەكەتتىك ورگاندار­عا اتالعان ءتىزىمدى ۋاقتىلى ىسكە اسى­رۋعا قاتىستى شارالار قابىلداپ، ءتيىستى جول كارتالارىن ازىرلەۋ، ۆە­دومستۆوارالىق ءوزارا ءتيىمدى ءىس-قيمىلدى قامتاماسىز ەتۋ جانە جۇ­يەلەردى ينتەگراتسيالاۋ شارالارىن قابىلداۋ، مەملەكەتتىك قىزمەت كور­سەتۋ پروتسەستەرىنە مونيتورينگ پەن تالداۋ جاساۋدىڭ ءتيىمدى جۇيەسىن قۇرۋ جايىندا تاپسىرما بەرىلدى.

سونداي-اق ۇكىمەت وتىرى­سىندا ين­دۋس­تريا جانە ينفراقۇرىلىمدىق دامۋ ءمين­يسترى جەڭىس قاسىمبەك تەحنيكالىق رەتتەۋ ما­سەلەلەرى بو­يىنشا باياندادى.

ونىڭ ايتۋىنشا، ىشكى نارىقتا ءونىمنىڭ ساپاسى مەن قاۋىپسىزدىگىن قامتاماسىز ەتۋ مەن ەكسپورتقا جاع­داي جاساۋ ماقساتىندا قابىلدانعان «ستاندارتتاۋ تۋرالى» زاڭ ەۋ­رو­پا ەلدەرىنىڭ تاجىريبەسىنە نە­گىز­دەلگەن جانە ستاندارتتاۋدىڭ حالىقارالىق ۇلگىسىنە وتۋگە جاعداي جاسايدى. بۇل ستاندارتتاۋ بويىنشا جۇمىستاردىڭ بىرىڭعاي وپەراتورى رەتىندە ۇلتتىق ستاندارتتاۋ ورگانىن بەلگىلەپ، ۇلتتىق ستاندارتتاۋ جۇيەسىن قۇرۋ، «مەملەكەت-بيزنەس-تۇتىنۋشى» اراسىندا ستاندارتتاردى كونسەنسۋستىق تالقىلاۋ ور­تالىعى رەتىندە ستاندارتتاۋ جو­نىن­دەگى تەحنيكالىق كوميتەتتەر مار­تەبەسىن ارتتىرۋ، بىرىڭعاي تالاپ­تاردى بەلگىلەۋ ماقساتىندا تەحني­كالىق ەرەكشەلىكتەر ارقىلى مەم­لەكەتتىك ساتىپ الۋدا، سالالىق زاڭ­نامادا ستاندارتتاردى، ونىڭ ىشىندە ساپاسى بويىنشا قولدانۋ اياسىن كەڭەيتۋ ماسەلەلەرىن قامتيدى.

سۇڭعات ءالىپباي،

«ەگەمەن قازاقستان»

سوڭعى جاڭالىقتار

ازىق-ت ۇلىك باعاسى الاڭداتادى

پارلامەنت • بۇگىن، 08:12

جىلدىڭ جۇمىس جوسپارى ناقتىلاندى

پارلامەنت • بۇگىن، 08:06

ۇقساس جاڭالىقتار