البەتتە, وسى رەتتە جاڭا جىلدان باستالعان جاعىمسىز جاڭالىقتان كەيىن اقتوبەلىكتەر استاناعا قالاي جەتۋدە دەگەن سۇراقتىڭ تۋىندايتىنى زاڭدىلىق. ايتايىق. اقتوبە ارقىلى «ورال-استانا» باعىتىنداعى ەكى پويىز ارالارىنا كۇن سالىپ قاتىنايدى. دەمەك, «قتج» ءوندىرىسى دامىعان, حالىق سانى كۇن ساناپ ارتىپ كەلە جاتقان قوس ءوڭىردى وسى پويىزدارعا بايلاپ قويدى. ەكى وبلىستىڭ حالقى 1,5 ملن ادامعا جۋىقتايدى. دەمەك, پويىز بيلەتىن تەك ساپارىن ايلار بۇرىن جوسپارلاپ, ۇلگەرگەندەر عانا الادى. وعان قوسا, بۇل پويىزداردىڭ اقتوبەدەن استاناعا قاراي قوزعالاتىن ۋاقىتى دا قولايسىز. ماسەلەن 096تس پويىزى اقتوبەدەن تۇنگى 02.04-تە ءجۇرىپ كەتەدى. ءتاتتى ۇيقىنىڭ كەلەر شاعىندا, قوعامدىق كولىكتەر پاركتەردە قاڭتارىلعان ۋاقىتتا سومكەلەرىن ارقالاپ, بالالارىن سۇيرەلەپ ۆوكزالعا شۇبىرعان حالىقتى كوز الدىڭىزعا ەلەستەتىپ كورىڭىزشى...
ورالدان شىعاتىن ەكىنشى پويىزدىڭ دا كەلەتىن ۋاقىتى وتە ىڭعايسىز. قاراڭىز. 058ح پويىزى اقتوبەدەن تاڭعى ساعات 07.17-دە قوزعالىپ كەتەدى. ۋاقىت بەلدەۋىنە بايلانىستى ەلىمىزدىڭ باتىس ءوڭىرى استانا ۋاقىتىنان ءبىر ساعات كەش ەكەندىگىن ەسكەرسەك, جولاۋشىلار اقتوبە ۋاقىتىمەن تەمىر جول ۆوكزالىنا تاڭعى ساعات التىعا دەيىن جەتۋى ءتيىس.
بۇل پرەزيدەنت تاپسىرماسى بويىنشا 2025 جىلعا قاراي قازاقستاننىڭ ءتورت ۋربانيستىك ورتالىعىنىڭ بىرىنە اينالۋى ءتيىس ءوڭىر ءۇشىن قولايسىز-اق شەشىم بولىپ تۇر. 2004 جىلى ەلباسىنىڭ قاتىسۋىمەن اشىلعان «حرومتاۋ-التىنسارين» تەمىر جول تورابىن سالۋ دا سول اقتوبە مەن استانانى جاقىنداستىرۋدىڭ, حالىققا قولايلى جاعداي جاساۋدىڭ امالى ەمەس پە ەدى؟!
ارينە, ءتيىستى مەكەمەلەر اقتوبەلىكتەر ءۇشىن «اتىراۋ-استانا نۇرلى جول», «ماڭعىستاۋ-استانا نۇرلى جول» باعىتتارىندا پويىز بار دەگەن ءۋاج ايتۋى مۇمكىن. ءيا اتالعان پويىزدار اقتوبە وبلىسىنىڭ اۋماعىنان وتەتىنى راس. بىراق وبلىس ورتالىعىنا اتالعان پويىزداردىڭ ەڭ جاقىن توقتايتىن ستانساسى – حرومتاۋ. ول – اقتوبە قالاسىنان 90 شاقىرىمنان اسا قاشىقتىقتا ورنالاسقان ستانسا. جەكە كولىگىڭ بولماسا, تاكسي جالداپ, شىعىندانىپ جەتەرسىڭ. بىراق قىس مەزگىلىندە اقتوبەدەن حرومتاۋعا جەتۋ ءۇشىن تاۋەكەلگە بارۋىڭ كەرەك. جولدىڭ شالعايلىعى بىلاي تۇرسىن, كوك اسفالتتىڭ ءۇستى ايناداي مۇز جانە تابيعاتى قاتال وڭىردەگى جولدى بوراندى كۇندەرى توتەنشە جاعداي قىزمەتى جاۋىپ تاستايتىنى بار. قازىردىڭ وزىندە كۇنىنە 150-200 ادام وسى حرومتاۋعا سابىلىپ ءجۇر. بۇل جەردە پايداعا باتىپ وتىرعان تەك تاكسي جۇرگىزۋشىلەرى.
ول – ول ما, قازىر قازاقستان تەمىر جولىنىڭ ەنشىلەس قۇرىلىمى – «جولاۋشىلار تاسىمالى» اكتسيونەرلىك قوعامى باعىتتان الىنىپ تاستالعان پويىز قۇرامىنىڭ قىزمەتشىلەرىن قايدا جىبەرەرىن بىلمەي وتىرعانعا ۇقسايدى. اياق استىنان جۇمىسسىز قالعان جۇزدەگەن ادام باسقا وڭىرلەرگە قونىس اۋدارۋعا كونە مە؟
مىنە, وسى قيىندىقتارعا, جولاۋشىلاردىڭ قۇقىقتارىنىڭ قورعالۋىنا باس پروكۋراتۋرا, باس كولىك پروكۋراتۋراسى نازار اۋدارۋى كەرەك سياقتى. گازەتىمىزدىڭ 2018 جىلعى 27 جەلتوقسانداعى سانىندا «بيلەت قۇنى نەگە شارىقتادى؟» دەگەن ماقالادا وسى اقتوبە باعىتىنداعى جولاۋشىلار پويىزدارىنا بيلەتتىڭ باعاسى 58 مىڭ تەڭگەدەن اسىپ كەتكەندىگى جازىلعان ەدى. سول ماقالادا «جولاۋشىلار تاسىمالى» اكتسيونەرلىك قوعامىنىڭ وكىلى باعانىڭ كوتەرىلۋىنە بايلانىستى «زاڭ بويىنشا كوممەرتسيالىق باعىتتارعا باعانى بەلگىلەۋ ءوز قۇقىعىمىزدا» دەگەن بولاتىن. بۇل جولى دا «جولاۋشىلار تاسىمالى» اق باسشىلىعى پويىز قۇرامىن قوسۋ-الىپ تاستاۋ, ءوڭىر مۇددەسىمەن ساناسپاۋدى دا ءوز قۇقىقتارىنا تاڭىپ السا تاڭعالۋعا بولماس. بىراق وسى ماسەلەگە بايلانىستى «جولاۋشىلار تاسىمالى» اكتسيونەرلىك قوعامىنىڭ جاۋابى ءبىز كۇتكەندەگىدەي شىقتى. كومپانيانىڭ ءباسپاسوز حاتشىسى دياس احمەتشارىپ وسى ماقالادا كورسەتىلگەن ماسەلەلەرگە بايلانىستى بىلاي دەيدى: «بىزدە جاڭا جىلعا دەيىن «الماتى-ورال» دەگەن پويىز بار ەدى. قازىر «تالگو» ۆاگوندارىمەن جابدىقتالعان بۇل پويىزدىڭ باعىتى وزگەرىپ, الماتىعا استانا ارقىلى جۇرەتىن بولدى. اتالعان پويىز استاناعا اقتوبە ارقىلى جۇرەتىن بولعاندىقتان, اقتوبەدەن استاناعا تىكەلەي قاتىنايتىن پويىز الىنىپ تاستالدى. جولاۋشىلارعا وسى پويىز جەتكىلىكتى. پويىزدىڭ ول قۇرامى جاڭادان اشىلعان «الماتى-تۇركىستان» باعىتىنا بەرىلدى. جاڭا جىلدان باستاپ ءبىزدىڭ كومپانيانىڭ دامۋ, ستاتيستيكا جانە تالداۋعا جاۋاپتى بولىمدەرى پويىزداردىڭ جەتكىلىكتى-جەتكىلىكسىزدىگىن انىقتايتىن بولادى. مۇمكىن, ءبىر-ەكى ايدان سوڭ مامانداردىڭ ەسەپتەۋلەرىنە بايلانىستى جاعداي وزگەرىپ تە قالار... ال پويىزداردىڭ قوزعالىس كەستەسى سول قۇرامى شىعاتىن جانە باراتىن قالالارداعى ۋاقىتتارعا سايكەس ىڭعايلاندىرىلادى. ال جولسەرىكتەر مەن باسقا دا قىزمەتكەرلەردىڭ ەشبىرى جۇمىسسىز قالمايدى».
بۇدان ۇققانىمىز, ماماندار وزگەرىستەن سوڭ عانا تالداۋ جاساۋعا كىرىسكەن. نەگە كەرىسىنشە؟ الدىمەن تالداۋ جاسالىپ, وزگەرىستى سودان سوڭ قولعا الۋعا «قتج» مەن «جت» نەگە ىنتىقتى؟ اقتوبەلىكتەردى ۆوكزالعا مەزگىلسىز ۋاقىتتا سابىلتۋ قانداي ماجبۇرلىكتەن تۋىندادى؟
ەندى بۇل ماسەلەگە زاڭدىلىقتى قاداعالاۋشى ورگاندار مەن وبلىس اكىمدىگى نازار اۋدارىپ, جولاۋشىلاردىڭ مۇڭ-مۇقتاجىن ەسكەرەر دەگەن ءۇمىت بار. سونىڭ وزىندە تۇتاس ءبىر وبلىس ورتالىعىن استانامەن بايلانىستىرار پويىز قۇرامىن الىپ تاستاۋدىڭ قانداي «ساۋاتتىلىقپەن» جاسالعانى تۇسىنىكسىز بولىپ وتىر.
سەرىك ابدىبەك,
«ەگەمەن قازاقستان»
