وقۋ-جيىندار – قارۋلى كۇشتەردەگى ءتۇرلى دەڭگەيدەگى كومانديرلەردىڭ دايارلىعىن جەتىلدىرۋدەگى ەڭ ءتيىمدى جولى بولىپ تابىلادى. وسى كۇندەرى جەلتوقسان ايىنىڭ باسىندا باستالعان وڭىرلىك قولباسشىلىقتىڭ ۆزۆود كومانديرلەرىمەن وتكىزىلگەن جيىنى اياقتالدى. جيىنعا موتواتقىش, تانك, ارتيللەريا, بارلاۋ ۆزۆود كومانديرلەمەن قاتار ينجينەرلىك, بايلانىس, تەحنيكالىق جانە تىلدىق ۆزۆود كومانديرلەرى قاتىستى.
جيىننىڭ باستى ماقساتى كاسىبي دايىندىق پەن ءبىلىمدى جەتىلدىرۋ, ماشىقتىلىقتى ارتتىرۋ, كارتامەن جانە باسشىلىق قۇجاتتارمەن جۇمىس جاساۋداعى, شەشىم قابىلداپ, تاپسىرمانى قويۋ دارەجەسىن جاڭا دەڭگەيگە شىعارۋ بولىپ كوزدەلدى. وفيتسەرلەر تەوريالىق جانە پراكتيكالىق ساباقتارمەن قاتار, نۇسقاۋلىق, باقىلاۋ ساباقتارىنا دا قاتىستى. «باتىس» وڭىرلىك قولباسشىلىعى اسكەرلەرىنىڭ قولباسشىسى گەنەرال-مايور قانىش ابۋباكيروۆتىڭ نۇسقاۋىمەن زاڭسىز اسكەري قۇرىلىمداردىڭ ءىس-ارەكەت تاكتيكاسى, جاۋىنگەرلىك بۇيرىقتى بەرۋ كەزىندەگى ۇسىنىستار بويىنشا قوسىمشا ماتەريالدار قاراستىرىلدى.
جيىننىڭ سوڭعى كۇندەرى وفيتسەرلەر اتىس, دەنە, تاكتيكالىق, ارنايى دايارلىق ساباقتارىنان سىناق الىندى. ونىڭ ناتيجەسى بويىنشا ۇزدىك كورسەتكىشتەردى 30238 اسكەري بولىمىنەن لەيتەنانت بەكەش باتىرحانوۆ پەن 41433 اسكەري بولىمىنەن لەيتەنانت اسىلبەك سەيتحان كورسەتتى. بۇگىنگى كۇنى, كومانديرلىك جيىندار كىشى وفيتسەرلىك قۇرامنىڭ ساربازداردى وقىتۋ جانە تاربيەلەۋگە دايىندىق دەڭگەيىن تەكسەرۋگە باعىتتالعان ەمتيحان بولىپ تابىلادى. سەبەبى, ۆزۆود كومانديرلەرى بەيبىت جانە سوعىس ۋاقىتىندا ۆزۆودتىڭ جاۋىنگەرلىك ازىرلىگىنە, اسكەري تارتىپكە, جەكە قۇرامنىڭ مورالدىك-پسيحولوگيالىق كۇيىنە, قارۋ-جاراق پەن اسكەري تەحنيكاعا جاۋاپ بەرەدى. ۆزۆود – جاۋىنگەرلىك تاپسىرمانى ورىنداي الاتىن ماڭىزدى قۇرىلىمداردىڭ ءبىرى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
