MEGA Silk Way – ويىن-ساۋىق ورتالىعىنا جينالعان 500 بالاعا سىيلىق تابىستالدى جانە ولاردى اياز اتا, اقشاقار, جالماۋىز كەمپىر مەن زاماناۋي مۋلتفيلم كەيىپكەرلەرى – ترانسفورمەرلەر, مينوندار, ايۋ, تەمىر ادام كەلە جاتقان جاڭا جىلمەن قۇتتىقتادى. مەرەكەنى ينكليۋزيۆتى الاڭدا قارسى العان بالالار داۋن, اۋتيزم سيندرومدارى, spina bifida, قيمىل-تىرەك اپپاراتىنىڭ كۇردەلى زاقىمى, وبىر (دتسپ) اۋرۋلارىمەن كۇرەسىپ كەلەدى. ايتا كەتەيىك, ويىن-ساۋىق ورتالىعىنداعى الاڭ قوعامدىق قورعا تەگىن ۇسىنىلدى.
2015 جىلى قۇرىلعان «اسىل بالا» رەسپۋبليكالىق قاۋىمداستىعى ءوز جۇمىسىندا نەگىزگى ءۇش ءپرينتسيپتى ۇستانادى. ءبىرىنشىسى – دەنساۋلىعى ەرەكشە كۇتىمدى تالاپ ەتەتىن بالالارعا قامقورلىق كورسەتۋ جانە قارجىلاي كومەكتەسۋ, ەكىنشىسى – اۋرۋحانالاردى ەڭ قاجەتتى جابدىقتارمەن قامتاماسىز ەتۋ جانە قازاقستاندىق دارىگەرلەردىڭ بىلىكتىلىگىن ارتتىرۋعا اتسالىسۋ, ءۇشىنشىسى – قاۋىمداستىققا مۇشە بولعان ۇكىمەتتىك ەمەس ۇيىمدارعا مەملەكەتتىك ورگاندارمەن قارىم-قاتىناس ورناتۋعا كومەكتەسۋ جانە ەلىمىزدە عانا ەمەس, الەمدە ەمدەۋ تəسىلدەرى قاراستىرىلماعان اۋرۋلارعا شالدىققان بالالاردى ساۋىقتىرۋ مەتوديكالارىن قۇراستىرۋ», دەدى «اسىل بالا» قوعامدىق قورىنىڭ ءباسپاسوز قىزمەتشىسى گاۋھار وماربەك.
جوعارىدا اتاپ وتكەن ءۇش ءپرينتسيپتىڭ اسىرەسە سوڭعىسى ەلىمىزدەگى بۇلدىرشىندەر مەن ولاردىڭ اتا-انالارى ءۇشىن اۋاداي قاجەت. سوندىقتان «اسىل بالا», «مير راۆنىح ۆوزموجنوستەي», «سولنەچنىي مير», «ميكروتيا جانە اترەزيا», «Co-make», «رازنىە دەتي», «Spina Bifida», «وردا», «وليمپيونيك», «مارتسانا», «قارابەكوۆ», «Nomad Star» جانە «كاراتە-دو فەدەراتسياسى» سياقتى ۇكىمەتتىك ەمەس ۇيىمدارىمەن وسى باعىتتا تىعىز جۇمىس ىستەۋدە. ياعني تۋعاننان باستاپ اۋتيزم, داۋن سيندرومى, spina bifida (ومىرتقانىڭ جانە جۇيكە تامىر تۇتىگىنىڭ دامۋىنداعى تۋا بىتكەن پاتولوگيا), مي سالدانۋى اۋرۋلارىنا شالدىققان بالالاردى وڭالتۋ ورتالىقتارىن تەك قارجىلاندىرىپ قانا قويماي, ولاردىڭ جۇمىس تاسىلدەرىن زەرتتەپ, ەلىمىزدىڭ وزگە وڭىرلەرىنە تاراتۋدى قولعا العان.
راۋان قايدار,
«ەگەمەن قازاقستان»
