كوكشەتاۋ قالاسىندا تۇراتىن ەلەنا سامسونوۆا سان الۋان حوش ءيىستى سابىنداردى 10 جىلدان بەرى جاسايدى ەكەن. نەگىزگى ماماندىعى – پسيحولوگ. الايدا ماقسات ەتكەن ىسىنەن مۇرات تاباتىنىنا كوزى جەتكەن سوڭ وسى كاسىپكە كوڭىلى قۇلاعان.
– ءبارى بالا كۇتىمىنە وراي دەمالىسقا شىققان ساتىمنەن باستالدى,–دەيدى ەلەنا سامسونوۆا,– اۋەلى سابىن دايىنداۋ تاسىلدەرىن عالامتوردان ىزدەپ تاپتىم. بىردەن كوڭىلىمدى اۋلاعانى. ىندەتە زەرتتەدىم. ءبىرتۇرلى اڭسارىم اۋىپ كەتكەنى.
جاڭا كاسىپ قىزىقتى بولىپ كورىنگەن. ءتىپتى وزىنە تارتىپ, باۋراپ الىپ كەتكەنى. قولى جاتتىعا كەلە ءيىس سابىنداردى ءارتۇرلى ەتىپ قالىپتاپ, قيلى پىشىندە جاسايتىن بولدى. جاساعان زاتىڭنىڭ سىرتقى كەيپى دە جۇتىنىپ تۇرۋى كەرەك قوي.
– ءتۇرلى-ءتۇستى بوياۋ, يىستەندىرگىش قاجەت,–دەيدى شەبەر,–ساپاسى دا جامان ەمەس. ەشبىر حيميا جوق. نەگىزگى شيكىزاتىن رەسەيدەن الدىرامىن.
سورەدە تۇرعان سابىندار سابىن ەمەس, سانالۋان ويىنشىقتار ءتارىزدى. مىنا بىرەۋى قوربيعان قونجىق, ءسۇپ-سۇيكىمدى كۇشىك, ءتىپتى جەمىس-جيدەكتەر بەينەسىندەگىلەرى دە تولىپ جاتىر.
– ەلەنا بۇل توڭىرەكتەگى قولدان سابىن جاسايتىنداردىڭ تۇڭعىشى,–دەيدى «پاليترا سينەگوريا» بىرلەستىگىنىڭ جەتەكشىسى ەلەنا اندرونياك,– ءوزىمنىڭ دە كىشكەنتايىم بار. ويىنشىق سابىنمەن جۋىندىرساق سونداي وڭاي. بالا قىزىعادى. بالا تۇگىل ۇلكەندەردىڭ ءوزىن ەلىكتىرەدى ەكەن.
قولونەر شەبەرى كەلەشەكتە كاوسمەتيكالىق بۇيىمدار دا شىعارماق. نەسى بار, قولىنان كەلۋى ابدەن مۇمكىن.
بايقال ءبايادىل,
«ەگەمەن قازاقستان»
اقمولا وبلىسى.
