ەگەمەندىك ارداگەر جۋرناليست جەتپىس جاسقا تولعالى وتىر. سول سەبەپتى گازەت ۇجىمى مەرەيتوي يەسىنە قۇرمەت كورسەتىپ, تارتۋ-تارالعىسىن ۇسىندى.
كەزدەسۋگە ج. سولتيەۆانىڭ شىعارماشىلىق جولىنداعى ارىپتەستەرى مەن دوس-جاراندارى ارنايى كەلدى. ولاردىڭ ىشىندە قوعام قايراتكەرلەرى سايراش ابىشقىزى مەن ورازكۇل اسانقىزى, جازۋشى-جۋرناليست جانات ەلشىبەك, قايسار ءالىم, سۇلەيمەن مامەت جانە ءانشى-سازگەر ەلەنا ابدىحالىقوۆا بولدى. «ەگەمەن قازاقستان» گازەتىنىڭ توراعاسى دارحان قىدىرالى قۇرمەتتى قوناقتى تۋعان كۇنىمەن قۇتتىقتاپ, قازاقى سالتپەن يىعىنا كامزول جاپتى.
ارىپتەستەرى وتكەن كۇندەردىڭ ونەگەلى ەستەلىكتەرى مەن وتكەلەڭ شاعى تۋرالى سىر شەتتى. بىرگە ءجۇرىپ, بىرگە ەڭبەك ەتكەن ۇجىم مۇشەلەرى اپامىزعا اقجارما تىلەك ايتىپ, لەبىز ءبىلدىردى. ال جاس تىلشىلەر ماعىنالى اڭگىمەگە قانىقتى.
جۇماگۇل سولتيەۆا 1948 جىلى 27 جەلتوقساندا الماتى وبلىسى, جامبىل اۋدانى, قاستەك اۋىلىندا دۇنيە ەسىگىن اشقان. قازمۋ-ءدىڭ جۋرناليستيكا فاكۋلتەتىن بىتىرگەن ول «لەنينشىل جاس» (قازىرگى «جاس الاش»), «سوتسياليستىك قازاقستان» (قازىرگى «ەگەمەن قازاقستان»), «زامان-قازاقستان» گازەتتەرى مەن «بالدىرعان» جۋرنالىندا ءبولىم مەڭگەرۋشىسى, «قازاقستان ايەلدەرى» جۋرنالىندا باس رەداكتوردىڭ ورىنباسارى, باس رەداكتور بولىپ جۇمىس ىستەگەن. كەيىننەن «ەگەمەن قازاقستان» گازەتى باس رەداكتورىنىڭ ورىنباسارى قىزمەتىنە كەلىپ, وسىندا زەينەتكە شىققان.
شىعارماشىلىقتان قول ۇزبەگەن جۇماگۇل قۋانىشبەكقىزى ءالى دە مازمۇندى تۋىندىلار جازاتىنىن جەتكىزىپ, گازەت ۇجىمىنا العىسىن ايتتى.
جانبولات كەنجەعۇل
فوتوعا تۇسىرگەن ەرلان ومار
«ەگەمەن قازاقستان»
