«بولاشاقتا اتاقتى بولۋ ءۇشىن باقىتسىز بالالىق قاجەت» دەپ قالامگەر ە.حەمينگۋەي ايتقانداي, لۋكا اۋزىنان ەمشەك ءسۇتى كەپپەي جاتىپ, سوعىستىڭ سويقانىن كورىپ, وت كەشىپ ۇلگەردى. ول التى جاسقا اياق باسقان 1991 جىلى ارقاسۇيەر سنەر اتاسىنان ايىرىلدى. ءبىر-ەكى باس مالىن قايىرىپ جۇرگەن قاريانى سەربيالىق جاساقتار اتىپ كەتىپ, بۇل ناۋبەتتەن ءتىرى قالعاندار قارا باستارىن ساۋعالاپ, پورتتى شاھار زادارعا تابان تىرەدى. سول ءبىر كۇڭىرەنىستى كۇندەر جايلى لۋكا مودريچ, «ىستىق تاباعا قارىلىپ, قىزىل شوققا ۇيتىلگەندەي» كۇيدە بولدىق دەپ ەسكە الىپتى. ويتكەنى, تەڭىز جاقتان زىركىرەي اتىلعان زەڭبىرەك وقتارى مەن تاس توبەدەن جاڭبىرداي جاۋعان بومبالاردان امان قالۋ ءۇشىن حورۆاتيالىقتار ءسات سايىن اجالمەن ارپالاسىپ جاتى.
قىزىق. قالىڭ ەل قيراعان قۇرلىستىڭ جىرتىق-تەسىگىنە تىعىلىپ, قۋ جانىن قويارعا جەر تاپپاي جۇرسە, قۇلاعى قالقيعان كۇزگى قايىڭنىڭ جاپىراعىنداي سارى بالا وق پەن وتتىڭ استىندا اسىر سالىپ دوپ تەۋىپ ءجۇر. اجال ونىڭ ەسىنەن شىعىپ كەتكەن, الدە جانكەشتى دوپ قۇمارلىعى ءۇشىن اينالىپ ءوتىپ جاتىر... لۋكا وسىلاي ەر جەتتى.
2008 جىلى اعىلشىندىق «توتتەنحەم حوتسپۋر» فۋتبول كومانداسىمەن شارتتاسقان ساتىندە لۋكا العاش رەت كوپشىلىككە ءتىل قاتىپ, «سوعىس مەنى ەرتە ەسەيتتى, اشتىقتان بۇرالىپ جۇرسەم دە دوپتى ءبىر ءسات تاستامادىم. جىلىنشىگىمدى قورعايتىن قاتتى كاردون قاعازعا برازيليا فۋتبولشىسى رونالدانىڭ سۋرەتىن سالىپ الۋشى ەدىم... سول ءبىر اۋىر كۇندەردى ەكىنشى قايتا ەسكە الۋدى قالامايمىن» دەگەنى ەل ەسىندە.
ءمودريچتىڭ اياقدوپشى رەتىندەگى العاشقى قادامىن اشىپ بەرگەن باپكەرى بالجو ايتادى: ءبىر كۇنى تانىسىم حابارلاستى. ول اۆتوكەشەندى بەكەتتىڭ قىزمەتكەرى-ءتىن. ونىڭ ايتۋىنشا جاپىراقتاي سارى بالا كەلىپ, الاڭقايدا كۇنى-ءتۇنى دوپ تەبەدى. شەبەرلىگى كەرەمەت. كەلىپ كورشى, دەدى. باردىم. كوردىم. تاڭقالدىم. قولما-قول اتا-اناسىنا حابارلاسىپ. جەتىم بۇرىش جاعالاپ جۇرگەن ولارعا ستاديوننىڭ ىرگەسىنەن تۇرۋعا جارايتىن باسپانا تاۋىپ بەردىم. سوعىس ءجۇرىپ جاتىر. ءبىر توپ بالانى جاتتىقتىرام. ويدا-جوقتا اسپاننان كۇرس ەتىپ بومبا قۇلايدى. بالالار كوزدى اشىپ-جۇمعانشا اسا جىلدامدىقپەن الاڭدى تاستاپ شىعۋى قاجەت. ءبىرىنشى بولىپ شىققان بالاعا «سول كۇننىڭ باتىرى» اتاعى بەرىلەتىن. «باتىر» اتاعىن ەڭ كوپ العان كىشكەنتاي لۋكا.
باتىس باسىلىمدارى «لۋكا ءمودريچتىڭ باعىن اشقان – توميسلاۆ باسيك» دەپ جازىپ جاتىر. وقيعا بىلاي بولىپتى: لۋكا قانشا شەبەر بولسا دا, ەشكىم قاتارعا قوسا قويماعان. سەبەبى, تىم ناززىك, ءارى بويى الاسا. تەك ءبىر ادام عانا ءۇمىت ۇزبەگەن. ول – باسيك باپكەر. اقىرى شاكىرتىن اتاقشى فۋتبولشى ەتىپ شىعارعان. سوندىقتان بولار بۇل ادامدى لۋكا «ەكىنشى اكەم» دەپ اتايدى. 2014 جىلى اقپان ايىندا ت.باسيك دۇنيەدەن وتكەندە شاكىرتىنىڭ ەتەگى جاسقا تولدى. ءۇش ايدان كەيىن لۋكا مودريچ چەمپيوندار ليگاسىنىڭ قالقان قۇلاق كۋبوگىن قۇشاقتاپ تۇرىپ, «باسيك ۇستازىم مەندە ءبارى بار, تەك سەن جوقسىڭ» دەپ ايعاي سالدى. ءوز ويىم ايتادى: لۋكا وتكەن جازداعى فۋتبولدان الەم بىرىنشىلىگىندە كومانداسىن وگىز كۇشىمەن ورگە سۇيرەپ, كۇمىس مەدالدىڭ شەتىن تىستەتىپ, ءوزى چەمپيوناتتىڭ «ۇزدىك ويىنشىسى» اتاعىن العان ساتىندە دە ەشكىمگە ەستىرتپەي تاعى دا وسىلاي ايعاي سالعان شىعار.
بەكەن قايرات ۇلى,
«ەگەمەن قازاقستان»
