الماتى وبلىسىندا دەنساۋلىق ساقتاۋ باسقارماسىنىڭ جۇيەسىندە جەدەل جاردەم قىزمەتىنىڭ ساپاسىن ارتتىرۋعا باعىتتالعان «كومەك-103» اتتى باعدارلاما جۇزەگە اسىرىلۋدا. وتاندىق IT-مامانداردىڭ قولىنان شىققان تسيرفلى باعدارلاما وبلىستاعى جەدەل جاردەم قىزمەتىن ءبىر جۇيەگە شوعىرلاندىرۋ, ءبىر ورتالىقتان باسقارۋعا مۇمكىندىك بەرىپ وتىر.
– «كومەك-103» باعدارلاماسىن ءوزىمىزدىڭ ماماندارمەن اقىلداسا وتىرىپ قولدانىسقا ەنگىزدىك. بۇل جۇيەنىڭ ىسكە قوسىلۋى جەدەل جاردەم قىزمەتىنىڭ ساپاسىن جاقسارتىپ, دارىگەرلەردىڭ العاشقى مەديتسينالىق كومەك كورسەتۋىنىڭ مۇمكىندىگىن ءوسىردى. ناتيجەسىندە, ادام ءومىرى ءۇشىن كۇرەس ناتيجەلى بولا باستادى, – دەيدى الماتى وبلىستىق دەنساۋلىق ساقتاۋ باسقارماسى جەدەل جاردەم ستانساسىنىڭ باس دارىگەرى ءبىرجان وسپانوۆ.
«كومەك-103» باعدارلاماسى وڭاي ءارى وڭتايلى جۇمىس ىستەيدى. وبلىستاعى بارلىق جەدەل جاردەم قىزمەتى اۆتوماتتاندىرىلعان ورتالىققا قوسىلىپ, قوڭىراۋ قابىلداۋ جەلىسى ارنايى الگوريتم بويىنشا رەتتەلەدى. قازىر وبلىستىڭ قالا مەن اۋدان ورتالىقتارىنان بولەك, اۋىلداردا دا جەدەل جاردەم ستانساسىنا تۇسكەن تەلەفون قوڭىراۋىنا 20 سەكۋندتان 1 مينۋت ارالىعىندا جاۋاپ بەرىلىپ, كومەككە مۇقتاج ادامنىڭ جاعدايى تۋرالى ءداستۇرلى سۇراق قويىلادى. ول ناۋقاستىڭ دەنە قىزۋى, اۋرۋ بارىسى جايلى قاراپايىم ساۋالداردان تۇرادى. وسى ارالىقتا باعدارلاما كەزەكشىسى جەدەل جاردەم كولىگىندەگى دارىگەردىڭ تەلەفونىنا شاقىرتۋ تۇسكەن ناۋقاستىڭ جاعدايى مەن كورسەتىلەتىن كومەكتىڭ بارىسى تۋرالى SMS حابارلاما جولداپ, ءتيىستى نۇسقاۋ بەرىپ ۇلگەرەدى جانە تسيفرلى جۇيە تىركەلگەن ناۋقاس تاريحىن جەدەل ساراپتاپ, كورسەتىلەتىن كومەكتىڭ ساناتىن اۆتوماتتى تۇردە انىقتايدى دا, ەڭ جاقىن ماڭداعى اۋرۋحاناعا حابار جىبەرەدى.
– «كومەك-103» جۇيەسى جەدەل جاردەم قىزمەتىن 4 ساناتقا ءبولىپ قاراستىرادى. مىسالى, 1-ساناتقا ادام ومىرىنە قاتەر تونگەن جاعداي, دارىگەردىڭ جەدەل ارالاسۋى قاجەت ناۋقاستاردان تۇسكەن شاقىرتۋ جاتقىزىلادى. بۇل سانات ءۇشىن دارىگەرلەر بريگاداسىنىڭ ناۋقاسقا جەتۋ ۋاقىتى 10 مينۋت بولىپ بەلگىلەنەدى. 2-سانات بويىنشا كومەك بەرۋ ۋاقىتى – 15 مينۋت, ال ءۇشىنشى جانە ءتورتىنشى ساناتتاعى ناۋقاستار ءۇشىن 30 مينۋت پەن ءبىر ساعات ارالىعى. بۇل جۇمىستى بۇرىن كەزەكشى ديسپەتچەر رەتتەپ, ۇلگەرمەي جاتاتىن بولسا, جاڭا جۇيەنىڭ ەنگىزىلۋىمەن اۆتوماتتى تۇردە رەتتەلىپ, ناۋقاستىڭ مەكەنجايىن كارتا بويىنشا انىقتاۋ مەن قانداي كومەكتى ءبىرىنشى كورسەتۋ جايلى نۇسقاۋلىق تا دارىگەرگە جىلدام جىبەرىلەدى, – دەدى ب.وسپانوۆ.
جالپى, تسيفرلاندىرۋ باعدارلاماسىنىڭ يگىلىگىن الىس اۋىلداردان بۇرىن قالالىق وڭىرلەر العاشقى بولىپ سەزىنىپ وتىرعانى بەلگىلى. بۇل رەتتە اۋىلدارداعى تەلەكوممۋنيكاتسيا جۇيەسىنىڭ دامىماي قالۋى تسيفرلى جۇيەلەردىڭ قىزمەت كورسەتۋىنە كەدەرگى بولىپ وتىرعاندىعىن ايتۋىمىز كەرەك. وكىنىشكە قاراي, الماتى وبلىسىندا كەڭ جولاقتى ينتەرنەتكە قوسىلۋ ءۇردىسى الىس اۋىلدارعا ءالى ارمان بولىپ تۇر. ناتيجەسىندە, حالىققا قىزمەت كورسەتۋ بارىسىندا وزىق تاسىلدەر رەتىندە تانىلعان كوپتەگەن تسيفرلى باعدارلامالار ەلدى مەكەندەردە قولجەتىمسىز كۇيىندە قالىپ وتىر. سونىڭ ءبىرى – الماتى وبلىسى اكىمدىگى مەن دەنساۋلىق ساقتاۋ باسقارماسى تاراپىنان قولعا الىنعان «كومەك-103» باعدارلاماسى.
قالماحانبەت مۇقامەتقالي,
«ەگەمەن قازاقستان»
