جيىنعا مادەنيەت جانە سپورت ءمينيسترى ا.مۇحامەدي ۇلى, مەملەكەت جانە قوعام قايراتكەرى, پروفەسسور م.جولداسبەك, ۇعا اكادەميگى س.قاسقاباسوۆ, فيلولوگيا عىلىمدارىنىڭ دوكتورى ش.ىبىراي جانە ن.راحمانوۆ (تاشكەنت), ت.سادىكوۆ (بىشكەك), ر.اسكەر (باكۋ) سىندى شەتەلدىك عالىمدار قاتىستى.
وقۋ زالى قازاقستانداعى ادەبيەتتانۋ عىلىمىنىڭ تۇركولوگيالىق باعىتتا دامۋىنا سۇبەلى ۇلەس قوسقان ادەبيەتتانۋشى, عالىم بەيسەنباي كەنجەباەۆ پەن نەمات كەلىمبەتوۆتىڭ قۇرمەتىنە اشىلىپ وتىر. تۇركولوگيانىڭ قازىرگى زاماناۋي دامۋ تەندەنتسياسى تۋرالى ءسوز قوزعاعان پروفەسسور مىرزاتاي جولداسبەك عىلىمنىڭ قالىپتاسۋ جولىنداعى ىزدەنىستەردى تىلگە تيەك ەتتى.
«تۇركى حالىقتارىنىڭ ەجەلگى داۋىردە جاساعان ادەبي مۇراسىنا قازاق حالقىنىڭ دا مۇراگەر بولۋىنا قۇقىلى دەپ تانىعان بەيسەنباي كەنجەباەۆ ماقساتتى جوسپارلار قۇرىپ, ورنىقتىردى. بەيسەكەڭ بويىن جاسىرعان تۇلپار سياقتى سىرتتاي قاراساڭ مومىن, ىشكى دۇنيەسى استاڭ-كەستەڭ بولىپ تۇراتىن كىسى ەدى. وتە عۇلاما عالىم ەدى, بەيسەكەڭ. سول بيازىلىعىنا قاراماي سۇمدىق باتىل بولاتىن», دەپ اتاپ ءوتتى م.جولداسبەكوۆ.
ءىس-شارا كورنەكتى تۇركىتانۋشى عالىم نەمات كەلىمبەتوۆتىڭ عىلىمي-شىعارماشىلىق مۇراسىنا ارنالعان «قازاقستاننىڭ قازىرگى دامۋ ۇدەرىسىندەگى تۇركىتانۋ عىلىمى» اتتى حالىقارالىق كونفەرەنتسياسىمەن جالعاستى. كونفەرەنتسيا قاتىسۋشىلارى تۇركولوگيانى بۇگىنگى قوعامدىق-گۋمانيتارلىق عىلىم سالالارىنىڭ جەتىستىكتەرى تۇرعىسىنان ساراپقا سالىپ, تەوريالىق جانە پراكتيكالىق اسپەكتىلەرى تۋرالى باياندامالار جاسادى. سونداي-اق, جيىن اياسىندا قازاق, ورىس, اعىلشىن تىلدەرىندە باسىلىپ شىققان دۇنيە ءجۇزى تۇركولوگياسىنىڭ تاريحىنا ارنالعان «تۇركولوگيا. دۇنيەجۇزى تۇركولوگياسىنىڭ تاريحى» اتتى كىتابىنىڭ تۇساۋكەسەرى ءوتتى. الەمدىك تۇركولوگيانىڭ ءجۇرىپ وتكەن تاريحي جولىن, دامۋ تاجىريبەسىن, جەتىستىكتەرىن جيناقتاۋ ماقساتىندا جازىلعان قۇندى ەڭبەك وسى باعىتتاعى العاشقى ءىس-تاجىريبە دەۋگە بولادى. وسىناۋ يگىلىكتى ىسكە مۇرىندىق بولعان «استانا» قارجى ورتالىعىنىڭ باسقارۋشىسى ق.كەلىمبەتوۆتىڭ «تۇركولوگيا عىلىمىنىڭ جاڭا دەڭگەيگە كوتەرىلۋى, تەوريالىق-ادىستەمەلىك ىزدەنىستەرىنىڭ قايتا زەردەلەنۋى جاقىن بولاشاقتىڭ مىندەتى. بۇل ەڭبەك وسى ءبىر ماڭىزدى ىسكە جول سىلتەۋ بولادى دەگەن ۇمىتتەمىز», دەگەن پىكىرى عىلىمنىڭ زەرتتەۋ ورىستەرىن جاڭاشا كۇن تارتىبىنە قويۋ كەرەك ەكەندىگىن ايقىنداي تۇسەدى. باسىلىمنىڭ تۇركولوگيانىڭ ءتۇرلى زەرتتەۋ باعىتتارىنا قىزىعۋشىلىق تانىتاتىن عالىمدار ءۇشىن جانە عىلىم تاريحناماسىمەن اينالىساتىن زەرتتەۋشىلەر ءۇشىن پايدالى بولاتىنىنا سەنىمدىمىز. اتالعان ەڭبەككە اتسالىسقان رەسەي, ازەربايجان, قىرعىزستان, تۇركيا, وزبەكستان, قىتاي, جاپونيا, موڭعوليا عالىمدارى ۇسىنعان زەرتتەۋ ماتەريالدارى XVIII عاسىردان باستاپ تۇركولوگيا عىلىمىنىڭ دامۋ ەرەكشەلىكتەرى مەن كوپپاراديگمالىق قاسيەتىن جان-جاقتى قامتيدى.
ايا ءومىرتاي,
«ەگەمەن قازاقستان»
