قازاق جەمىس-كوكونىس شارۋاشىلىعى عىلىمي-زەرتتەۋ ينستيتۋتى ديرەكتورىنىڭ ورىنباسارى ءبىرجان راحىمجانوۆتىڭ ايتۋىنشا, بۇگىندە ارتىق قوسپاسىز ازىق-ت ۇلىك شىعارۋ ءىسى اسا وزەكتى. وسى رەتتە مينەرالدى تىڭايتقىشتارعا مەملەكەت تاراپىنان سۋبسيديا بەرىلگەنىمەن, ورگانيكالىق تىڭايتقىشتار قولدانىسىن كەڭەيتۋگە ەشقانداي قولداۋ جوق.
ەلىمىزدەگى اگرارلىق سالاداعى تىڭ جاڭالىقتار تۇرمىسىمىزعا ەتەنە ەنىپ, ادام اعزاسىنا زياندى قوسپالارسىز تازا ءونىم ۇسىنىلىپ كەلەدى. مۇنداي ونىمدەر ادەتتەگى جەمىس-جيدەك, كوكونىستەردىڭ باعاسىمەن سالىستىرعاندا قىمباتقا تۇسەرى دە بەلگىلى. بۇگىنگە دەيىن ەلىمىزدە سويا مەن جۇگەرى, كارتوپ پەن قىزاناقتىڭ جاڭا تۇرلەرى وسىرىلگەن. بۇلار قۇرعاقشىلىققا ءتوزىمدى, جىلدىڭ əر مەزگىلىندە جىلىجايدا دا وسە بەرەدى. سونداي-اق 2020 جىلى كارتوپ ەگىستىگىنىڭ كولەمى 2 پايىزعا ۇلعايتىلماق. رەسپۋبليكاداعى جەردىڭ 70 پايىزى شولەيت بولعاندىقتان سوعان بەيىم تىڭايتقىشتار قولدانىلادى. تيىسىنشە جوعارىدا اتالعان ازىق-ت ۇلىكتىڭ جالپى كولەمى كەم دەگەندە 5 پايىزعا ارتپاق.
اگرارلىق سالادا باسەكەگە قابىلەتتى بولۋ ءۇشىن وتاندىق عالىمدارىمىزدىڭ اشقان تىڭ جاڭالىقتارىنا ارقاۋ بولاتىن ىلكىمدى جوبالار ىسكە اسۋى ءتيىس. وسى ماقساتتا اگرارلىق سالاداعى 300-گە جۋىق عالىمدى شەتەلدە وقىتۋ جوسپارلانىپ وتىر. ۇلتتىق اگرارلىق عىلىمي-ءبىلىم بەرۋ ورتالىعىنىڭ باسقارما توراعاسى ۇلان تاجىباەۆتىڭ ايتۋىنشا, «RisingStar» باعدارلاماسى اياسىندا كەلەر جىلدان باستاپ الەمدىك جەتەكشى حالىقارالىق زەرتتەۋ ورتالىقتارى مەن جوعارى وقۋ ورىندارىنا ماماندار جىبەرىلەدى. 2019 جىلعا دەيىن اتالعان باعدارلاما اياسىندا شەتەلگە وقۋعا جىبەرىلەتىن ماماندار سانىن 300-گە جەتكىزۋ كوزدەلىپ وتىر.
جاس عالىمدارعا ارنالعان جيىنعا اگرارلىق جوعارى وقۋ ورنىنىڭ تۇلەكتەرى مەن 15 عىلىمي-زەرتتەۋ ينستيتۋتىنىڭ جانە 18 تاجىريبەلىك شارۋاشىلىقتى بىرىكتىرەتىن «ۇلتتىق اگرارلىق عىلىمي-ءبىلىم بەرۋ ورتالىعى» مەكەمەسىنىڭ ماماندارى قاتىستى.
AgroLab الاڭىندا گەنومدىق سۇرىپتاۋ, «جاسىل» تەحنولوگيالار, مولەكۋلارلىق بيولوگيا جانە «اقىلدى» ەگىنشىلىك سياقتى تاقىرىپتار جانە باسقا دا اۋىل شارۋاشىلىعىنداعى قازىرگى زامانداعى تىڭ جاڭالىقتار مەن باستامالار جاس مامانداردىڭ پىكىرتالاسىنا ارقاۋ بولدى.
ەركەجان ايتقازى,
«ەگەمەن قازاقستان»
