وسىدان بولار, بيىل «قازاقستاننىڭ تۇرعىن ءۇي قۇرىلىس جيناق بانكى» اق ۇجىمى بۇرىن-سوڭدى بولماعان ءۇردىس باستاپ, جاڭاجىلدىق مەرەكەنى مەدەۋ مۇز ايدىنىندا قارسى الدى. بۇل باستاماعا بانكتىڭ 600-گە تارتا قىزمەتكەرى مەن ولاردىڭ وتباسى مۇشەلەرى ورتاقتاستى.
تازا اۋاداعى سەرگەك دەمالىستىڭ قالا تۇرعىندارى ءۇشىن دە تاعىلىمدى تۇستارى بار ەدى. مەدەۋگە سىرعاناۋعا بارعاندار تۇرعىن ءۇي قۇرىلىس جيناق بانكىنىڭ شات-شادىمان مەرەكەسىنىڭ ورتاسىنان تابىلدى. الماتىلىقتاردىڭ تاعى ءبىر لەگى الداعى كۇندەرى سالاماتتى ءومىر سالتىن پاش ەتكەن بانكتىڭ جاڭا سالىمشىلارىنا اينالۋى عاجاپ ەمەس.
«بۇگىن ءبىز مەدەۋ شاتقالىنداعى ۇلكەن كورپوراتيۆتە وتكەن جىلعا ەسەپ بەرىپ, ۇزدىك قىزمەتكەرلەرىمىزدى ماراپاتتاپ, 2019 جىلدى ەرەكشە قارسى الۋعا شەشىم قابىلدادىق. مۇنداي كورپوراتيۆ ءبىزدىڭ بانكتىڭ يدەولوگياسىمەن تولىق ۇيلەسەدى. شاھارىمىزدىڭ كەرەمەت تورىندە ۇجىم بولىپ ءبىر كىسىدەي ساف اۋادا كونكي تەۋىپ, سپورتتى دا ناسيحاتتاپ, ايتا جۇرەرلىكتەي تاماشا دەمالىستى وتكەرىپ ءجۇرمىز.
ەڭ باستىسى, ءوز ءومىرىمىزدى جاقسارتىپ قانا قويماي, بالالارىمىزدىڭ الاڭسىز كەلەشەگىن قامتاماسىز ەتىپ, كەڭ ءارى ادەمى ۇيلەر مەن پاتەرلەردىڭ يەسى اتانامىز دەسەك, قۇندىلىقتار جۇيەسىن وزگەرتۋ كەرەك. ءارى مۇنى ۇدايى ايتىپ وتىرامىز. ماسەلەن, قازىر قوعامدا بەلەڭ الىپ تۇرعان ءبىر مەزەتتىك تۇتىنۋشىلىق يدەولوگياعا قارسىلىق رەتىندە ۇزاق مەرزىمدى جيناق مادەنيەتىن قالىپتاستىرىپ, دامىتۋ قاجەت. سوندىقتان وسىعان الدىمەن ءوزىمىز ۇلگى بولىپ, ارتىق شىعىنسىز-اق مەرەكەنى اتاپ ءوتىپ, كوڭىل كوتەرۋگە بولاتىنىن دالەلدەيىك دەپ شەشىم قابىلدادىق», دەيدى تۇرعىن ءۇي قۇرىلىس جيناق بانكى باسقارما ءتورايىمى ءلاززات يبراگيموۆا.
وقىرمان ەسىندە بولسا, ءبىز بۇعان دەيىن دە بانكتىڭ قوعامدىق كەڭەسى بار ەكەندىگىن, وعان ەلدىڭ ءسوزى وتكىر تانىمال جۋرناليستەرى, اۋزى دۋالى قوعام قايراتكەرلەرى مۇشە ەكەنىن بايانداعانبىز. سوندىقتان مەرەكەلىك وقيعاعا وتباسىمەن بىرگە ورتاقتاسقان قوعامدىق كەڭەستىڭ توراعاسى, بەلگىلى جۋرناليست سەرگەي پونومارەۆ: ء«بىز بۇل جولى جاڭاجىلدىق مەرەكەمىزدى تابيعاتتىڭ تاماشاسى مەدەۋ مۇز ايدىنىنا كوشىردىك. بۇل جەردە كوڭىل كۇي دە باسقا, دەمالىس تا وزگەشە قىزىق. ال قوعامدىق كەڭەستىڭ مىندەتىنە كەلەتىن بولساق, ءبىز بانك سالىمشىلارىنىڭ مۇددەسىن قورعاۋعا ءتيىستىمىز. ءبىز بانك قىزمەتىنە, جاڭا ۇسىنىستار مەن ونىمدەرگە بەيتاراپ باقىلاۋ جاساي وتىرىپ, بانك كليەنتتەرىنىڭ باسقا دا تىلەكتەرىن باسقارما قاپەرىنە سالىپ وتىرامىز. قوعامدىق كەڭەس مۇشەلەرى پىكىر الماسا وتىرىپ, سالىمشىلاردىڭ سەنىمى مەن بانك قىزمەتىنىڭ تۇراقتىلىعىنا قىزمەت ەتەدى. بۇگىنگى مىنا مۇز ايدىنىنا قاراڭىزشى, مۇنداعى مەرەكەلىك احۋال كەرەمەت ەمەس پە؟! اماندىق بولسا, كەلەسى جىلى شىمبۇلاققا دەيىن ورلەۋىمىز مۇمكىن. جۇرتقا جاي اقىل ايتقانشا, الدىمەن ءوزىڭ سول جولدى باستاپ, سالاماتتى ءومىر سالتىن ءوزىڭ ناسيحاتتا. سپورتپەن ءبىرىنشى بولىپ ءوزىڭ اينالىس, سوندا عانا وزگەلەر ساعان ەرەدى» دەيدى.
نە دەسەك تە, داراقىلىق پەن اس تا توك داستارقانداردان باس تارتىپ, مەدەۋ شاتقالىن عاجايىپ مەرەكەگە بولەگەن بانكتىڭ ءۇردىسىن شاھار تۇرعىندارى ۇلگىلى ءىس دەپ باعالادى. ءارى مەرەكەنىڭ بۇل ءتۇرىن ۇنەمشىلدىك پەن پاراساتتىلىقتىڭ دا ءبىر پاراسى دەپ بىلگەن ءجون. بانكتىڭ كورپوراتيۆتىك مەرەكەسىنە ەرىكسىز كۋا بولعان الماتىلىقتار الداعى ۋاقىتتا سالىمشى بولۋعا سەپتەسەتىن جاڭا اقپاراتتارعا دا قانىق بولدى. جانە جۇرتشىلىق بانكتىڭ ۇزدىك قىزمەتكەرلەرىن ەڭبەگىنە ساي مەدەۋ تورىندە ماراپاتتاعانىن كوردى.
– بيىل تۇرعىن ءۇي قۇرىلىس جيناق بانكى ۇيرەنشىكتى وتىرىستاردان باس تارتىپ, بالا-شاعامىزبەن تاۋعا كەلدىك. بۇل يدەيا بارشا قىزمەتكەرلەرىمىزگە ۇنادى. ءبارى قولداي كەتتى. وسى ارقىلى ءبىز قىمبات مەيرامحانالارسىز دا كەرەمەت دەمالۋعا بولاتىنىنا كوزىمىز جەتتى. جانە بۇل مۇز ايدىنىنا كەلگەنىمىز بارشا دەمالۋشىلارعا ۇناپ جاتىر. وسى باستامامىزبەن مەدەۋدەگى بۇقارالىق سپورت ءتۇرىن دە قوسا ناسيحاتتاپ, جاقسى باستامالارعا ۇيىتقى بولىپ وتىرعانىمىزعا قۋانىشتىمىز. الدىمەن ادامعا باسپانامەن بىرگە مىقتى دەنساۋلىق, جاقسى كوڭىل كۇي دە كەرەك. ءۇيلى بولامىن, كۇيلى بولامىن دەسەڭ, توي-تومالاقتارعا شىعىندالا بەرۋدىڭ قاجەتى جوق. ءارى مۇنداي مەرەكەلەر ۇجىمنىڭ اۋىزبىرشىلىگىن ارتتىرادى, – دەيدى تۇرعىن ءۇي قۇرىلىس جيناق بانكى باسقارما ءتورايىمىنىڭ ورىنباسارى جانار جۇبانيازوۆا.
تۇرعىن ءۇي قۇرىلىس جيناق بانكىنىڭ مەيرامىنا تەك قىزمەتكەرلەر عانا ەمەس, وسى كۇنى مەدەۋگە كونكي تەبۋگە كەلگەن الماتى تۇرعىندارى مەن قوناقتارى دا قاتىستى. جينالعان مەيماندار ءۇشىن مۇز ايدىنىندا «Medeo band» مۋزىكا توبى ونەر كورسەتتى. سونداي-اق قىزىقتى بايقاۋلار ۇيىمداستىرىلدى. «تۇرعىن ءۇي قۇرىلىس جيناق بانكى – قاساڭ مەملەكەتتىك قۇرىلىم دەگەن ويدى وزگەرتكىمىز كەلەدى. 2018 جىل بويى ءبىز كليەنتتەرمەن جانە جالپى قوعاممەن ديالوگ جۇرگىزۋدىڭ جاڭا ءارى ەرەكشە فورمالارىن قۇرۋ بويىنشا جۇمىس جۇرگىزدىك», دەيدى ءلاززات يبراگيموۆا.
سونداي-اق كوكتەمدە بانكتىڭ جىل سايىنعى «جاسىل مەكەن» اكتسياسى اياسىندا تۇرعىن ءۇي قۇرىلىس جيناق بانكى قازاقستاندىقتاردى اۋلاسى كوگالداندىرۋدى قاجەت ەتەتىن تۇرعىن ءۇي كەشەندەرىنە داۋىس بەرۋگە شاقىرعان بولاتىن. سونىڭ ناتيجەسىندە بانك ەسەبىنەن 1 مىڭنان استام كوشەت وتىرعىزىلدى. داۋىس بەرۋگە 25 مىڭنان استام ادام قاتىستى. تامىز ايىندا بانك باتىل قادام جاساپ, كليەنتتەرگە ارنالعان سمس-حابارلامالاردى جاڭا, ءازىل فورماتىندا تاراتتى. جىل باسىنان بەرى تۇرعىن ءۇي قۇرىلىس جيناق بانكى قىزمەتكەرلەردى وقىتۋدىڭ ويىن تۇرىندەگى ادىستەرىن ءساتتى قولدانىپ كەلەدى. بۇل ەڭبەكتىڭ ناتيجەسى رەتىندە بانك «قازاقستان» نوميناتسياسىندا «ورتالىق ازيانىڭ HR-برەندى» اتتى بەدەلدى جۇلدەگە قول جەتكىزدى. بۇدان بولەك جاقىندا تۇرعىن ءۇي قۇرىلىس جيناق بانكى كەڭەسشىلەر جەلىسىنىڭ قاتارىنا بەلسەندى جانە تالاپتى ادامدار تارتۋدى ماقسات ەتكەن «ورىندالاتىن ميسسيا!» رەسپۋبليكالىق ونلاين-ويىنى اياقتالدى. اتالعان جوبا دا ۇلكەن رەزونانس تۋعىزىپ, وعان بۇكىل ەلدەن 2 مىڭنان استام ادام قاتىستى, ال الەۋمەتتىك جەلىلەردەگى ويىن بويىنشا كورسەتىلىم سانى ميلليوننان استى.
مەرەكە سوڭىندا تۇرعىن ءۇي قۇرىلىس جيناق بانكى باسشىلارى ەل تۇرعىندارىن كەلە جاتقان 2019 جىلمەن قۇتتىقتاپ, ءار ادامعا جاڭا جىلدا پاتەر ماسەلەسىن شەشىپ, قونىس توي تويلاۋدى تىلەدى.
ايناش ەسالي,
«ەگەمەن قازاقستان»
الماتى
