«تاۋەلسىزدىكتىڭ العاشقى كۇندەرىنەن باستاپ تۇرىكمەنستان مەن قازاقستان اراسىنداعى قارىم-قاتىناستار ءوزارا قۇرمەت پەن تەڭ حاقىلى ارىپتەستىك پرينتسيپتەرىنە سۇيەنە وتىرىپ دامۋدا, ال ەتنيكالىق, تىلدىك, رۋحاني جانە مادەني جاقىندىقتار ەكى ەل حالىقتارىنىڭ اراسىنداعى بايلانىستاردىڭ نەگىزگى قۇراۋشىلارى. تۇرىكمەنستان مەن قازاقستان اراسىنداعى ەكىجاقتى ارەكەتتەستىك دەڭگەيىنىڭ جوعارى ەكەنىن ريزاشىلىقپەن اتاپ وتكىم كەلەدى. جوعارى دەڭگەيدەگى دەلەگاتسيالار ساپارلارىمەن تۇراقتى تۇردە الماسۋ وسىعان كۋا بولىپ وتىر», - دەدى تۇرىكمەن ۆيتسە-پرەمەرى.
ەكىجاقتى بايلانىستارداعى ورنى ەرەكشە سالا رەتىندە م. چاقىەۆ سوڭعى كەزدەرى ماڭىزى ارتىپ كەلە جاتقان ترانسپورت پەن كوممۋنيكاتسيانى ايتتى. بۇل رەتتە ول 2014 جىلى اشىلعان قازاقستان-تۇرىكمەنستان تەمىر جولى ارقىلى تاسىمال كولەمىنىڭ كۇننەن-كۇنگە ارتىپ كەلە جاتقانىن تىلگە تيەك ەتتى. «سونىمەن قاتار ەلدەرىمىزدىڭ اراسىنداعى ساۋدا-ەكونوميكالىق ارىپتەستىكتى ۇلعايتۋ ءۇشىن كەڭ اۋقىمدى پوتەنتسيالدى مۇمكىندىكتەر بار. وسى سەبەپتى ەكى تاراپ ەكونوميكانىڭ ءتۇرلى سەكتورلارىندا, ونىڭ ىشىندە وتىن-ەنەرگەتيكا جانە كولىك-كوممۋنيكاتسيا سالالارىندا ىنتىماقتاستىقتى ورىستەتە تۇسۋگە ىنتا تانىتۋدا», - دەپ ءسوزىن ساباقتادى م. چاقىەۆ.
قازاقستاننىڭ تۇرىكمەنستانداعى ەلشىسى جاندوس اسانوۆ قازاقستاننىڭ قازىرگى كەزەڭدەگى دامۋى, «رۋحاني جاڭعىرۋ», «5-20-25», «100 ناقتى قادام» جانە باسقا دا مەملەكەتتىك باعدارلامالاردىڭ ورىندالۋ بارىسى جايلى ايتتى.
«قازاقستان جانە تۇرىكمەنستان حالىقتارىنىڭ كوپعاسىرلىق دوستىعى ەلدەرىمىزدىڭ مارتەبەلى پرەزيدەنتتەرى نۇرسۇلتان نازارباەۆ پەن گۋربانگۋلى بەردىمۇحامەدوۆتىڭ جەكە دوستىعىنىڭ ارقاسىندا دامىپ كەلەدى. 2017 جىلى ساۋىردە استانادا قازاقستان مەن تۇرىكمەنستان اراسىنداعى ستراتەگيالىق ارىپتەستىك تۋرالى شارتقا قول قويىلۋى ەكىجاقتى ىنتىماقتاستىقتىڭ پوتەنتسيالىنىڭ كەڭەيۋىنە كەڭ مۇمكىندىكتەر اشتى», - ەلشى اتاپ ءوتتى.
قازاقستاندىق ديپلومات ەكىجاقتى بايلانىستاردىڭ ءوربۋ تاريحىنداعى ماڭىزدى مەجەلەرىنە توقتالعان كەزىندە مەملەكەتتىك شەكارانىڭ حالىقارالىق-حۇقىقتىق رەسىمدەلگەنىن, ەكى ەل اراسىن جالعاعان تەمىر جول ماگيسترالىنىڭ اشىلعانىن, مادەني-گۋمانيتارلىق ارەكەتتەستىكتىڭ نىعايا تۇسكەنىن جانە اشحاباد قالاسىندا بيىلعى جىلدىڭ 29-30 قاراشاسىندا قازاقستان مادەنيەت كۇندەرىنىڭ تابىستى وتكەنىن ەسكە الدى.
