ورتالىقتىڭ اشىلۋىنا پرەمەر-ءمينيستردىڭ ورىنباسارى اسقار جۇماعاليەۆ, ىشكى ىستەر ءمينيسترىنىڭ ورىنباسارى ەرلان تۇرعىمباەۆ جانە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ولجاس بەكتەنوۆ قاتىستى. ورتالىقتىڭ اشىلۋ سالتاناتىندا مەملەكەتتىك قىزمەتتەردى بيومەتريالىق دەرەكتەر بويىنشا ۇسىنۋ جوباسى ىسكە قوسىلدى. بۇل جوباعا سايكەس ەندى فرونت-وفيستەر مەن ەلەكتروندى ۇكىمەت پورتالىندا قىزمەتتەردى الۋ ءۇشىن تولقۇجات پەن ەلەكتروندى تسيفرلى قولتاڭبا قاجەت ەمەس, ازاماتتاردىڭ ساۋساق تاڭباسى مەن بەت-الپەتىنىڭ سكان-بەينەسى بولسا جەتكىلىكتى.
ازىرشە بيومەتريالىق دەرەكتەردى استانا قالاسىندا جاڭادان اشىلعان «Elektrondy qyzmet ortalyǵynda» جانە الماتى قالاسىنىڭ بوستاندىق اۋداندىق حقو-دا تاپسىرۋعا بولادى. ورتالىقتا وپەراتورلاردىڭ قىزمەتىن جاساندى ينتەللەكت – ۆيرتۋالدى كەڭەسشىلەر اتقارادى. كىرە-بەرىستە تۇلعانى انىقتايتىن ينتەللەكتۋالدى بەينەباقىلاۋ ورناتىلعان. ەگەر ورتالىققا كەلگەن ازاماتتىڭ بازادا بيومەتريالىق مالىمەتتەرى بولماسا, وعان تىركەلىپ, بيو-مالىمەتتەرىن قالدىرۋعا ۇسىنىس جاسالادى.
I-sana اتتى ۆيرتۋالدىق كەڭەسشى كەلۋشىلەردى قارسى الىپ, قاجەتتى انىقتامالاردى قالاي الۋ كەرەكتىگىن ايتىپ, سەكتورلارعا باعىتتايدى. وسى جەردە «M-gov» ءموبيلدى قوسىمشاسىنىڭ مۇمكىندىكتەرىمەن تانىسىپ, SIM كارتاعا ەتسق جازىپ الۋعا بولادى. سونداي-اق جۇرگىزۋشى كۋالىگىن الۋدى ماقسات ەتكەن ازاماتتار مامانداندىرىلعان حقو-داعى اۆتودروم نۇسقاسىنا سايكەس جاساقتالعان ايماقتا «digital drive» جابدىعىنىڭ كومەگىمەن الدىن الا بايقاۋ سىناعىنان ءوتىپ, اۆتوكولىك جۇرگىزۋگە ماشىقتانا الادى.
ءالي بيتورە,
«ەگەمەن قازاقستان»
