ءراسىم بارىسىندا پرەزيدەنت ن.نازارباەۆقا اۋعانستان يسلام رەسپۋبليكاسىنىڭ ەلشىسى موحامماد فارحاد ازيمي, قىرعىز رەسپۋبليكاسىنىڭ ەلشىسى جەەنبەك كۋلۋباەۆ, ليتۆا رەسپۋبليكاسىنىڭ ەلشىسى گينتاۋتاس ۆاسيۋليس, يران يسلام رەسپۋبليكاسىنىڭ ەلشىسى مادجيد سامادزادە سابەر, ارمەنيا رەسپۋبليكاسىنىڭ ەلشىسى گاگيك گالاچيان سەنىم گراموتاسىن تابىس ەتتى.
نۇرسۇلتان نازارباەۆ ەلشىلەردى قازاقستانداعى ديپلوماتيالىق قىزمەتتەرىنىڭ رەسمي تۇردە باستالۋىمەن قۇتتىقتاپ, بۇگىنگى سالتاناتتى ءراسىمنىڭ تاۋەلسىزدىك كۇنى قارساڭىندا ءوتۋىنىڭ سيمۆولدىق مانىنە توقتالدى.
– ءبىز 27 جىل ىشىندە ەكونوميكاسى قارقىندى ءوسىپ كەلە جاتقان زاماناۋي مەملەكەتكە اينالدىق. بۇگىندە ەلىمىزدە بەيبىتشىلىك پەن قوعامدىق كەلىسىمدى قامتاماسىز ەتىپ, حالىقتىڭ ءال-اۋقاتىن ارتتىرۋعا باسا ءمان بەرەمىز. الەمنىڭ وزىق دامىعان 30 ەلىنىڭ قاتارىنا قوسىلۋ ماقساتىمەن اۋقىمدى باعدارلامالار مەن رەفورمالاردى جۇزەگە اسىرىپ كەلەمىز, – دەدى قازاقستان پرەزيدەنتى.
ەلباسى ازاماتتاردىڭ تۇرمىس ساپاسىن جاقسارتۋ مەملەكەتتىك ساياساتتىڭ نەگىزگى باعىتتارىنىڭ ءبىرى ەكەنىن ايتتى.
مەملەكەت باسشىسى قازاقستاننىڭ حالىقارالىق جانە وڭىرلىك قاقتىعىستاردى شەشۋ جونىندەگى قىزمەتىنە ەرەكشە توقتالىپ, سونىڭ ءبىر ايعاعى رەتىندە سيريادا بەيبىتشىلىك ورناتۋعا باعىتتالعان «استانا پروتسەسىن» اتاپ ءوتتى.
– الەمدە اسكەري قاقتىعىس وشاقتارى كوبەيىپ, سانكتسيالىق تەكەتىرەس پەن ساۋدا سوعىسى ءورشىپ تۇرعان جاعدايدا ءوزارا سەنىم بولماسا, داعدارىسقا قارسى كەز كەلگەن ءىس-قيمىلدىڭ وڭ ناتيجەسى بولمايدى, – دەدى نۇرسۇلتان نازارباەۆ.
مەملەكەت باسشىسى ەلىمىزدىڭ قىرعىز رەسپۋبليكاسىمەن ساۋدا-ەكونوميكالىق ىنتىماقتاستىق پەن دوستىق قاتىناستاردى ودان ءارى دامىتۋعا نيەتتى ەكەنىنە توقتالىپ, بۇل ەل ورتالىق ازياداعى ماڭىزدى ارىپتەسىمىز عانا ەمەس, سونداي-اق تاريحي تامىرىمىز تەرەڭگە جايىلعان باۋىرلاس مەملەكەت بولىپ سانالاتىنىن ايتتى.
– ءبىز قىرعىزستانمەن دوستىققا جانە ءوزارا تۇسىنىستىككە نەگىزدەلگەن ستراتەگيالىق ارىپتەستىكتى دامىتۋعا ايرىقشا ءمان بەرەمىز. ۇكىمەتتەرىمىزدىڭ وسى باعىتتاعى ءتيىمدى جۇمىسى ەكى ەل اراسىنداعى قارىم-قاتىناستاردى جاڭا بەلەستەرگە كوتەرەدى دەپ سەنەمىن, – دەدى قازاقستان پرەزيدەنتى.
نۇرسۇلتان نازارباەۆ ارمەنيامەن ساياسي, ساۋدا-ەكونوميكالىق جانە گۋمانيتارلىق ىنتىماقتاستىق ءوزارا سەنىم مەن قۇرمەت رۋحىندا دامىپ كەلە جاتقانىن ايتىپ, استانا مەن ەرەۆاننىڭ ەۋرازيا ەكونوميكالىق وداعى اياسىنداعى بايلانىستارىنىڭ پەرسپەكتيۆاسىنا ەرەكشە توقتالدى.
– سوڭعى جىلدارى ءوزارا تاۋار اينالىمىنىڭ كولەمى ارتىپ كەلەدى. 2017 جىلدىڭ قورىتىندىسى بويىنشا بۇل كورسەتكىش 68,4 پايىزعا جەتتى. سونىمەن قاتار ەلدەرىمىزدىڭ ساۋدا-ەكونوميكا سالاسىنداعى الەۋەتىن تولىق پايدالانعان ماڭىزدى, – دەدى مەملەكەت باسشىسى.
نۇرسۇلتان نازارباەۆ يران وڭىردەگى قازاقستاننىڭ ماڭىزدى سەرىكتەسى سانالاتىنىن ايتىپ, تەگەرانمەن كولىك, لوگيستيكا, اۋىل شارۋاشىلىعى, پايدالى قازبالار ءوندىرۋ جانە مەتاللۋرگيا سالالارىنداعى ىنتىماقتاستىق اياسىن كەڭەيتۋ قاجەتتىگىنە نازار اۋداردى.
– اقتاۋدا قول قويىلعان كاسپي تەڭىزىنىڭ قۇقىقتىق مارتەبەسى تۋرالى كونۆەنتسيا ەلدەرىمىز اراسىنداعى ءوزارا ىقپالداستىقتى نىعايتۋعا تىڭ سەرپىن بەرەتىنىنە سەنىمدىمىن. ءبىز يراننىڭ يادرولىق باعدارلاماسىنا قاتىستى حالىقارالىق كەلىسىمنىڭ ساقتالۋىن جانە ونىڭ ءارى قاراي ءتيىمدى جۇزەگە اسىرىلۋىن قۇپتايمىز, – دەدى قازاقستان پرەزيدەنتى.
مەملەكەت باسشىسى ەلىمىزدىڭ اۋعانستانمەن قارىم-قاتىناسى دوستىق پەن ءوزارا تۇسىنىستىك رۋحىندا ىلگەرىلەپ كەلە جاتقانىنا توقتالىپ, قازاقستان بۇل ەلدەگى جاعدايدى تۇراقتاندىرۋعا, ونى الەۋمەتتىك-ەكونوميكالىق تۇرعىدان دامىتۋعا ەلەۋلى ۇلەس قوسىپ وتىرعانىن اتاپ ءوتتى.
– ءبىز بىرىككەن ۇلتتار ۇيىمى قاۋىپسىزدىك كەڭەسىنىڭ مۇشەسى رەتىندە اۋعانستان ماسەلەلەرىن شەشۋگە اتسالىسىپ كەلەمىز. كابۋلعا جىل سايىن قارجىلاي, تەحنيكالىق جانە گۋمانيتارلىق كومەك كورسەتىلۋدە. اۋعان جاستارىنا ارنالعان ءبىلىم بەرۋ باعدارلاماسى جۇزەگە اسىرىلۋدا. سونداي-اق ءبىز كابۋلعا ازىق-ت ۇلىك تاۋارلارىن جەتكىزەتىن نەگىزگى ەلدەردىڭ ءبىرى بولۋعا ءازىرمىز, – دەدى نۇرسۇلتان نازارباەۆ.
قازاقستان پرەزيدەنتى ەلىمىزدىڭ ليتۆامەن ىقپالداستىعىنىڭ بۇگىنگى دەڭگەيىن جوعارى باعالاپ, كولىك-ترانزيت سالاسىنداعى ىنتىماقتاستىق, سونداي-اق استانا مەن ۆيلنيۋس اراسىندا تىكەلەي اۋە قاتىناسىنىڭ اشىلۋى ەكىجاقتى بايلانىستى ودان ءارى نىعايتۋعا مۇمكىندىك بەرەتىنىن ايتتى.
سوڭىندا مەملەكەت باسشىسى ەلشىلەردى قازاقستانداعى جاۋاپتى ءارى مارتەبەلى ميسسيالارىنىڭ باستالۋىمەن تاعى دا قۇتتىقتاپ, ولاردىڭ قىزمەتتەرى ەلدەرىمىز اراسىنداعى ىنتىماقتاستىقتى دامىتۋعا زور ۇلەس قوساتىنىنا سەنىم ءبىلدىردى.
بۇدان كەيىن قازاقستاندا ديپلوماتيالىق ميسسيالارى جاڭادان باستالعان ەلشىلەر جۋرناليستەرگە ارناپ بريفينگ وتكىزدى.
ءبىرىنشى كەزەكتە ءسوز العان اۋعانستان يسلام رەسپۋبليكاسىنىڭ ەلشىسى موحامماد فارحاد ازيمي قازاقستان حالقىنا ءوز ەلىنىڭ ىستىق سالەمىن جولداي وتىرىپ, ەكى ەلدىڭ ءوزارا ىنتىماقتاستىعى جىل وتكەن سايىن نىعايىپ كەلە جاتقانىن جەتكىزدى. سونداي-اق ول قازاقستان تاراپى اۋعانستانعا ءتۇرلى باعىتتار بويىنشا ۇلكەن قولداۋ كورسەتىپ كەلە جاتقانىن اتاپ ءوتتى ءارى ەلىمىزدى ۇلىق مەرەكەمىز − تاۋەلسىزدىك كۇنىمەن قۇتتىقتادى.
قىرعىز رەسپۋبليكاسىنىڭ ەلشىسى جەەنبەك كۋلۋباەۆ قازاقستان-قىرعىزستان بايلانىستارى ءوز دەڭگەيىندە ەكەنىن, تاراپتاردىڭ اراسىنداعى ساۋدا-ەكونوميكالىق جانە گۋمانيتارلىق باعىتتارداعى قارىم-قاتىناس ەكى ەلدىڭ ءوزارا ىنتىماقتاستىعىن كورسەتەتىنىن ءسوز ەتتى. ونىڭ ايتۋىنشا, قازاقستاننىڭ شەتەلدەن ينۆەستيتسيا تارتۋ, ەكونوميكانى تسيفرلاندىرۋ, كلاستەرلەر قۇرۋ ىسىندەگى مول تاجىريبەسى قىرعىزستان ءۇشىن اسا ماڭىزدى. بۇدان بولەك, ول باۋىرلاس مەملەكەتتەردىڭ اراسىنداعى رۋحاني بايلانىستىڭ تاريحى جوعارى دەڭگەيدە جالعاسىن تاۋىپ وتىرعانىن ايتا كەلىپ, بەلگىلى جازۋشى شىڭعىس ايتماتوۆتىڭ 90 جىلدىق مەرەيتويى قازاقستاندا كەڭ كولەمدە اتالىپ وتكەنىن, ونىڭ ەسىمى استانا كوشەلەرىنىڭ بىرىنە بەرىلگەنىن, بۇل شارالارعا پرەزيدەنت نۇرسۇلتان نازارباەۆتىڭ باسا نازار اۋدارعانىن جەتكىزدى.
سونداي-اق بريفينگتە ليتۆا رەسپۋبليكاسىنىڭ ەلشىسى گينتاۋتاس ۆاسيۋليس, يران يسلام رەسپۋبليكاسىنىڭ ەلشىسى مادجيد سامادزادە سابەر, ارمەنيا رەسپۋبليكاسىنىڭ ەلشىسى گاگيك گالاچيان ءوز ەلدەرىنىڭ قازاقستانمەن ىنتىماقتاستىعىن ودان ءارى ارتتىرا تۇسۋگە كۇش-جىگەرلەرىن جۇمسايتىنىن جەتكىزە كەلىپ, بارشا قازاقستاندىقتاردى الدا كەلە جاتقان تاۋەلسىزدىك مەرەكەسىمەن قۇتتىقتادى.
جولدىباي بازار,
«ەگەمەن قازاقستان»
