پرەمەر-مينيستر 11 ايدىڭ قورىتىندىسى وڭ دامۋ قارقىنىن كورسەتىپ وتىرعانىن اتاپ ءوتتى. ۇكىمەت مەملەكەت باسشىسىنىڭ تاپسىرمالارىن ىسكە اسىرۋدى جالعاستىرۋدا. كولىك جانە ساۋدا سالالارىندا قول جەتكىزىلگەن جوعارى ناتيجەلەر اتالىپ ءوتتى. بۇعان قوسا, ونەركاسىپتىك دامۋعا قوسىمشا سەرپىن بەرۋگە ءتيىستى بايلانىس جانە قۇرىلىس سالالارىنا ەرەكشە كوڭىل ءبولۋ تاپسىرىلدى. جىل قورىتىندىسىندا ءجىو ءوسىمىن 4% كولەمىندە قامتاماسىز ەتۋ بويىنشا ەلباسى تاپسىرماسىن ىسكە اسىرۋ ءۇشىن بارلىق مۇمكىندىكتەر بار.
قارجى مينيسترلىگىنىڭ بيۋدجەتتىڭ اتقارىلۋى ماسەلەسى بويىنشا مالىمەتتەرىنە سايكەس, رەسپۋبليكالىق بيۋدجەتتى يگەرۋ ءۇشىن بارلىق جاعدايلار جاسالعان. جىل قورىتىندىسى بويىنشا بيۋدجەت شىعىستارى 99,6%-عا ورىندالادى, وڭىرلەر بويىنشا 1,8 ملرد تەڭگە كولەمىندە يگەرمەۋ ورىن الۋى مۇمكىن. بىراق, وتىرىس بارىسىندا وبلىستار مەن رەسپۋبليكالىق ماڭىزى بار قالالاردىڭ اكىمدەرى بايانداعانداي, بيۋدجەت قاراجاتىن تولىق يگەرۋگە مۇمكىندىك بار.
پرەمەر-مينيستر ب.ساعىنتاەۆ مەملەكەت باسشىسىنىڭ تاپسىرماسى ورىندالۋى كەرەكتىگىن اتاپ ءوتتى. كەلەسى ۇكىمەت وتىرىسىندا بۇل ماسەلە, سونىمەن قاتار قويىلعان مىندەتتەردى ورىنداۋ بويىنشا ورتالىق مەملەكەتتىك ورگاندار مەن اكىمدىكتەردىڭ جۇمىس قورىتىندىلارى قارالاتىن بولادى.
