تاۋەلسىز قازاق انيماتسياسى تاريحىندا تۇڭعىش رەت ءتول قاھارماندار تۋرالى ارقايسىسى 10 سەريادان تۇسىرىلگەن «ايدار», «دالا ويىندارى» جانە «ەرتەمىر» اتتى 3D فورماتتاعى مۋلتحيكايالار – بۇگىنگى وتاندىق تەلەۆيزيا سالاسىنداعى بىرەگەي ۇزدىك جوبالار ساناتىندا. «Balapan» تەلەارناسى ديرەكتورى ماقپال جۇمابايدىڭ باستاماسىمەن جارىققا شىققان ايتۋلى تۋىندىلاردىڭ ارقايسىسى ءوزىنىڭ يدەيا سونىلىعى, ماعىنالىق مازمۇن جانە ەڭ باستىسى قازاقى بوياۋ-قالىبىمەن دارالانادى.
ء«بىز تۇڭعىش رەت قازاقتىڭ ءتول انيماتسيالىق سۋپەر قاھارماندارىن كورەرمەن نازارىنا ۇسىنىپ وتىرمىز. بۇل جوبالاردى جۇزەگە اسىرۋ ءۇشىن ەلىمىزدىڭ انيماتسيالىق قاۋىمداستىعى جۇدىرىقتاي جۇمىلىپ جۇمىس ىستەدى. وسى مۋلتحيكايالار ارقىلى وتاندىق انيماتسيانىڭ جاڭا كەزەڭى باستالارىنا سەنىمدىمىز. «Balapan» قاھارماندارى «دالا ويىندارى», «ايدار», «ەرتەمىر» مۋلتحيكايالارى ارقىلى ءار بالانىڭ جۇرەگىنە جول تارتادى. بۇل – ءار جوبانى زور جاۋاپكەرشىلىكپەن جۇزەگە اسىرعان, ءار كەيىپكەردى ايالاپ, الپەشتەگەن شىعارماشىلىق كوماندامىز ءۇشىن دە, قازاق بالاسى ءۇشىن دە تاريحي ءسات دەپ ويلايمىز», دەدى م.جۇماباي.
10 جەلتوقساننان باستاپ «Balapan» تەلەارناسى ارقىلى كىشكەنتاي كورەرمەندەر نازارىنا جول تارتقان تۋىندىلار ءالى-اق «ورمەكشى ادام» سەكىلدى جاھان جەتكىنشەكتەرىنىڭ جۇرەگىن جاۋلاعان كەيىپكەردىڭ ورنىن باسىپ, قازاق بالاسى ءوزىنىڭ ءتول قاھارماندارىنا ەلىكتەپ, سولارعا قاراپ بوي تۇزەيدى دەگەن سەنىم مول.
نازەركە جۇماباي,
«ەگەمەن قازاقستان»
