الدىمەن «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆتىڭ قاتىسۋىمەن, وبلىس اكىمى, پارتيانىڭ وبلىستىق فيليالىنىڭ توراعاسى بولات باقاۋوۆتىڭ توراعالىعىمەن ۇيىمنىڭ وبلىستىق اكتيۆىنىڭ وتىرىسى ءوتتى. وتىرىستى اشقان ب.باقاۋوۆ ەلباسى جولداۋىنان تۋىندايتىن مىندەتتەردىڭ ورىندالۋ بارىسىمەن تانىستىردى.
– ءوڭىر تۇرعىندارى ەلباسى جولداۋىندا ايقىندالعان رەفورمالاردىڭ ماڭىزدىلىعىن جەتە تۇسىنەدى, – دەدى بولات باقاۋوۆ. باسىم باعىت بۇل قازاقستاندىقتاردىڭ ءال-اۋقاتىن ارتتىرۋ. بۇل كۇندەرى وڭىردە ەڭبەكاقىلارى تومەن جۇمىسشىلاردىڭ ايلىعىن كوبەيتۋ بويىنشا بارلىق كاسىپورىندارمەن ءتۇسىندىرۋ جۇمىسى قولعا الىنۋدا. كاسىپورىندار جۇمىسشىلاردىڭ جالاقىسىن ورتاشا ەسەپپەن 12 پايىزعا ارتتىرماق.
وبلىس باسشىسى اتاپ وتكەندەي, ەلىمىزدە قابىلدانعان «7-20-25» باعدارلاماسى بويىنشا وڭىردەگى ەكىنشى دەڭگەيلى بانكتەرگە 65 ءوتىنىش تۇسكەن. قازىر ونىڭ 29-ى ماقۇلدانعان. ەلباسى تاپسىرماسىنا سايكەس, وڭىردەگى تۇرعىن ءۇي-كوممۋنالدىق شارۋاشىلىق سالاسىندا دا جىلۋ, سۋ تولەم قىزمەتتەرىنىڭ باعاسىن تومەندەتۋ ءۇشىن جۇمىستار جۇرگىزىلۋدە.
كەزدەسۋدە «نۇر وتان» پارتياسى توراعاسىنىڭ ءبىرىنشى ورىنباسارى ەلباسىنىڭ جولداۋى مەن جاقىندا جاريالانعان « ۇلى دالانىڭ جەتى قىرى» اتتى ماقالاسىندا ايتىلعان باسىمدىقتاردى جۇزەگە اسىرۋ بارىسىن ءسوز ەتتى.
– قازىرگى تاڭدا پارتيامىزدىڭ الدىندا تۇرعان باستى مىندەتتەردىڭ ءبىرى – ەلباسى جولداۋىنا اقپاراتتىق قولداۋ كورسەتۋ. سوندىقتان اتالعان قۇجاتتىڭ ءمانى مەن ماڭىزىن ءار قازاقستاندىققا جەتكىزۋدە ەسەلى ەڭبەك ەتۋىمىز كەرەك, – دەدى ول.
ساپار اياسىندا پارتيا توراعاسىنىڭ ءبىرىنشى ورىنباسارى م.اشىمباەۆ پەن پاۆلودار وبلىسىنىڭ اكىمى ب.باقاۋوۆ «قازحروم» تۇك» اق فيليالى اقسۋ فەرروقورىتپا زاۋىتىندا وتكەن «لايىقتى ەڭبەك – مەملەكەتتىڭ تۇراقتىلىق نەگىزى» اتتى فورۋمعا قاتىستى.
فورۋمدا م.اشىمباەۆ اقسۋ فەرروقورىتپا زاۋىتىنىڭ وسىنداي ءىرى ءوندىرىس ورىندارىنىڭ ءبىرى سانالاتىنىن ايتتى. بيىل قۇرىلعانىنا 50 جىل تولعان, بۇگىندە قازاقستاننىڭ فەرروقورىتپا ءوندىرىسىنىڭ 60 پايىزىن قامتيتىن كاسىپورىننىڭ ونىمدەرى جاپونيا, كورەيا, قىتاي, اقش, رەسەي مەن ەۋروپانىڭ بىرقاتار ەلدەرىنە ەكسپورتتالادى.
«نۇر وتان» پارتياسى توراعاسىنىڭ ءبىرىنشى ورىنباسارى ەلباسى ايقىنداپ بەرگەن ماقساتتارعا قول جەتكىزۋ ءۇشىن ەڭبەك ادامىنا لايىقتى جاعداي جاساۋدىڭ ماڭىزى زور ەكەنىنە توقتالدى.
– ەلىمىزدە ەلباسىنىڭ تىكەلەي باستاماسىمەن ەڭبەك قاۋىپسىزدىگىن ساقتاۋ, ەڭبەكتى قورعاۋ جانە ونى لايىقتى باعالاۋ جونىندە اۋقىمدى جۇمىستار اتقارىلىپ كەلەدى. وسى ماقساتتاعى بۇگىنگى فورۋم ەلباسىمىزدىڭ قازاقستاننىڭ ءۇشىنشى جاڭعىرۋى باستاماسىن جۇزەگە اسىرۋدا ۇلكەن ماڭىزعا يە. سەبەبى كەز كەلگەن ءىستىڭ ادام كۇشىمەن, ادام ەڭبەگىمەن ىسكە اساتىنى بەلگىلى. سوندىقتان ەڭبەكتىڭ قورعالۋى قولعا العان ءىستىڭ ناتيجەلى بولۋىن قامتاماسىز ەتەتىن ءتيىمدى تەتىك, – دەدى م.اشىمباەۆ.
ءوز كەزەگىندە, كاسىپوداقتار فەدەراتسياسىنىڭ توراعاسى باقىتجان ءابدىرايىم فەدەراتسيانىڭ 2018 جىلدى ەڭبەك قاۋىپسىزدىگى جانە قورعاۋ جىلى دەپ جاريالاعانىنا نازار اۋدارىپ, سول باعىتتا اتقارىلعان جۇمىستارعا توقتالدى.
ايتا كەتەيىك, 2017 جىلدىڭ قورىتىندىسى بويىنشا ەلىمىزدە 1678 جۇمىسشىنىڭ ەڭبەك جاراقاتىن العانى انىقتالعان. وكىنىشكە قاراي, ولاردىڭ 244-ءى قايعىلى اياقتالدى. سوندىقتان وسىنداي ولقىلىقتاردىڭ الدىن الۋ ءۇشىن بۇل ماسەلەنى كۇن تارتىبىنەن تۇسىرمەي, ۇدايى باستى نازاردا ۇستاپ وتىرۋ اسا ماڭىزدى.
فورۋم سوڭىندا كاسىپوداقتار فەدەراتسياسىنىڭ ۇيىمداستىرۋىمەن وتكىزىلگەن «ەڭبەكتى قورعاۋ جونىندەگى ۇزدىك تەحنيكالىق ينسپەكتور» بايقاۋىنىڭ جەڭىمپازدارى ماراپاتتالدى.
قازىرگى تاڭدا «نۇر وتان» پارتياسى قولعا العان جوبالاردىڭ ءبىرى – ەلىمىزدەگى كىتاپحانالاردىڭ قىزمەتىن بۇگىنگى تالاپتارعا ساي قايتا جاڭعىرتىپ, ولاردى زاماناۋي ءبىلىم ورتالىعىنا اينالدىرۋعا باعىتتالعان. سوندىقتان م.اشىمباەۆ ساپار كەزىندە س.تورايعىروۆ اتىنداعى وبلىستىق كىتاپحاناعا ارنايى باردى. اتالعان نىساننىڭ بۇگىندە 550 مىڭ دانادان استام كىتاپ قورى بار. قازىرگى كەزەڭدە اتالعان كىتاپتار «قازاقستاننىڭ اشىق كىتاپحاناسى» پارتيالىق جوباسى اياسىندا تسيفرلى فورماتقا كوشىرىلىپ جاتىر. بۇل جۇمىستار Book Drive, Laren سياقتى سكانەر قۇرىلعىلاردىڭ كومەگىمەن جۇرگىزىلۋدە.
«نۇر وتان» پارتياسىنىڭ كىتاپحانا قىزمەتىن جاڭعىرتۋداعى كەزەكتى باستاماسى زاماناۋي ءبىلىم ورتالىقتارىن قۇرۋ ءىسى بويىنشا پاۆلودار وبلىسىندا ايتارلىقتاي جۇمىستار اتقارىلعان. بۇگىندە وڭىردە 25 كوۆوركينگ ورتالىعى اشىلىپ, وندا كىتاپ وقۋمەن قاتار, ءتۇرلى تاقىرىپتاردا پىكىرتالاستار مەن ترەنينگتەر جانە بەلگىلى تۇلعالاردىڭ دارىستەرىن وتكىزۋ ءىسى جۇيەلى جولعا قويىلعان.
كىتاپحانا وقىرماندارىمەن جانە ءوڭىردىڭ ءبىر توپ جاس اقىن-جازۋشىلارىمەن كەزدەسكەن م.اشىمباەۆ مۇنداي باستامالاردىڭ ماڭىزى زور ەكەنىن ايتتى.
– ەلباسىنىڭ «رۋحاني جاڭعىرۋ» باعدارلاماسىنىڭ نەگىزگى ءمانى جاستاردىڭ بىلىمگە دەگەن قۇشتارلىقتارىن ارتتىرۋ. ال بار ءبىلىمنىڭ نەگىزى كىتاپتا ەكەنى بەلگىلى. سوندىقتان پارتيا توراعاسىنىڭ تاپسىرماسى بويىنشا ءبىز وسىنداي يگى ءىستى قولعا الدىق. بۇل – باسەكەگە قابىلەتتى, ينتەللەكتۋالدى ۇلت قالىپتاستىرۋعا جانە ەلىمىزدىڭ ەكونوميكالىق دامۋىنا ۇلەس قوسۋعا باعىتتالعان ناقتى جۇمىستار, – دەدى ماۋلەن اشىمباەۆ.
فاريدا بىقاي,
«ەگەمەن قازاقستان»
