كونفەدەراتسيا كۋبوگىنىڭ "س" توبىنداعى ىرىكتەۋ كەزەڭى 28-ءشى قازان كۇنى اتىراۋ قالاسىندا ءوتتى. وندا كوماندامىز قارسىلاس شاق كەلتىرمەي, فينالدىق كەزەڭگە جولداما العان بولاتىن.
سپورتشىلارىمىز جارتىلاي فينالدا بقو كومانداسىن 4:2 ەسەبىمەن ۇتسا, فينالدا قاراعاندى وبلىسى كومانداسىن ءدال وسىنداي ەسەپپەن تىزە بۇكتىردى. اتىراۋ قۇراماسى ساپىندا اقجول قايىپحان, نازگۇل قۇباشەۆا, سايدا قاپسالىقوۆا, ەلميرا ساميعوللاەۆا, ەرجان تەمىرجانوۆ, ناۋرىزبەك مايلاشەۆ, سۇڭعات زاكارياەۆ جانە ارمان قاليەۆ بەلدەستى.
- اتىراۋ وبلىسى قۇراما كومانداسى ساپىندا بىردە-ءبىر ەل چەمپيونى بولماسا دا, سپورتشىلارىمىز بەن جاتتىقتىرۋشىلارىمىزدىڭ بىرلەسكەن جۇمىسى ارقاسىندا جەڭىسكە جەتتىك. قازىرگى تاڭدا اتىراۋدا دزيۋدو كۇرەسى جوعارى قارقىندا دامىپ كەلەدى. سپورتشىلارىمىزدىڭ بۇگىنگى جەڭىسى سونىڭ دالەلى. بىلتىر كونفەدەراتسيا كۋبوگىندە قولا جۇلدەگە يە بولساق, بيىل التىن جۇلدەگەر اتانىپ وتىرمىز, دەيدى اتىراۋ وبلىسى دەنە شىنىقتىرۋ جانە سپورت باسقارماسىنىڭ باسشىسى رينات يبراگيموۆ.
ايتا كەتۋ كەرەك, قاراشا ايىندا وتكەن قازاقستان چەمپيوناتىندا اتىراۋلىق سپورتشىلار كوماندالىق سىندا چەمپيون اتانعان بولاتىن.
كونفەدەراتسيا كۋبوگى 2016 جىلدان باستاپ سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسىنىڭ ۇيىمداستىرۋىمەن قولعا الىنعان كوماندالىق جارىس. وندا بوكس, دزيۋدو, تاەكۆوندو, ەركىن كۇرەس, گرەك-ريم كۇرەسى جانە قازاق كۇرەسىنەن سايىستار وتەدى. جارىستىڭ جۇلدە قورى – 145 ملن تەڭگە.
