كەڭەسكە ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا قاتىسىپ, مەملەكەت باسشىسىنىڭ تاپسىرماسىن جۇزەگە اسىرۋ اياسىندا دايىندالعان زاڭ جوباسىنىڭ ماڭىزدىلىعىنا توقتالدى. سونداي-اق پەداگوگ مارتەبەسىن ارتتىرۋعا باعىتتالعان بارلىق مۇمكىندىكتەردىڭ قاراستىرىلىپ وتىرعاندىعىن جەتكىزدى.
قازىرگى كەزدە اتالعان مينيسترلىكتىڭ سايتىندا, الەۋمەتتىك جەلىلەردە زاڭ جوباسىنا قاتىستى قىزۋ تالقىلاۋ ءجۇرىپ جاتىر. زاڭ جوباسىن ازىرلەۋگە بايلانىستى 78 ادامنان قۇرىلعان كوميسسيا قۇرامىندا عالىمدار, ۇستازدار مەن دەپۋتاتتار بار. اينالاسى ءبىر ايدىڭ ىشىندە زاڭ جوباسى سۇزگىدەن وتكىزىلىپ, ەندىگى كەزەكتە كاسىبي ورتاعا تانىستىرىلىپ, تالقىلاۋ جۇمىستارى جالعاسىن تابۋدا.
ەلميرا سۋحانبەرديەۆانىڭ ايتۋىنشا, ءبىلىم جانە عىلىم مينيسترلىگىنىڭ سايتىنا ەلىمىزدىڭ بارلىق وڭىرلەرىنەن سەگىز جۇزدەن استام ۇسىنىس كەلىپ تۇسكەن. قازىرگى كەزدە ەلىمىزدە 300 مىڭنان اسا مۇعالىم ەڭبەك ەتسە, اتالعان زاڭعا قاتىستى كەز كەلگەن سالا مامانى ءوزىنىڭ پىكىرىن بىلدىرە الادى. جۇمىس توبى بارلىق وڭىرلەردى ارالاپ, تالقىلاۋلارعا قاسادى. ءمينيستردىڭ تاپسىرماسى بويىنشا زاڭ جوباسىنان ءاربىر مۇعالىم حاباردار بولۋى قاجەت. وسىعان وراي ءار مەكتەپ ۇجىمى ارنايى سىلتەمەدە كورسەتىلگەن زاڭ جوباسىمەن تانىسىپ, ءوز پىكىرلەرىن, ۇسىنىستارىن جولدايتىن بولادى.
بعم مەكتەپكە دەيىنگى جانە ورتا ءبىلىم دەپارتامەنتى ديرەكتورىنىڭ ورىنباسارى ساۋلە قابيمولداەۆا پەداگوگيكالىق قاۋىمداستىقتىڭ قاتىسۋىمەن ازىرلەنگەن زاڭ جوباسىنىڭ كوتەرىپ وتىرعان جۇگى پەداگوگ مارتەبەسىن ارتتىرۋمەن سيپاتتالاتىندىعىن جەتكىزدى. سونداي-اق زاڭ جوباسى بارلىق ءبىلىم بەرۋ مەكەمەلەرىندە ەڭبەك ەتىپ جۇرگەن ۇستازداردىڭ الەۋمەتتىك دارەجەسىن انىقتاپ, ولارعا قولداۋ كورسەتۋگە باعىتتالعاندىعىن اتاپ ءوتىپ, 6 ءبولىم, 21 باپتان تۇراتىن قۇجاتتاعى ماڭىزدى ماسەلەلەرگە توقتالدى.
زاڭ جوباسىن تالقىلاۋعا ارنالعان كەڭەستە مۇعالىمدەردىڭ, مەكتەپ ديرەكتورلارى مەن كوللەدجدەر وقىتۋشىلارىنىڭ پىكىرلەرى مەن ۇسىنىستارى تىڭدالدى. تۇرعىن ءۇي, مەديتسينالىق ساقتاندىرۋ, زەينەت جاسى, مۇعالىمدەردىڭ جۇكتەمەسىن جەڭىلدەتۋ, مۇعالىم مەن اتا-انانىڭ مىندەتى, قۇقىعى تۇرعىسىنداعى, سونداي-اق مەكتەپ مۇعالىمى مەن جوعارى وقۋ ورىندارى وقىتۋشىلارىنىڭ مىندەتى, ەڭبەك اقىسى جانە دە بىلىكتىلىكتى تەكسەرۋگە ارنالعان تەستكە بايلانىستى كوپتەگەن تۇيتكىلدى ماسەلەلەر ايتىلدى. ۆيتسە-مينيستر ەلميرا سۋحانبەرديەۆا زاڭ جوباسىندا بۇل ۇسىنىستاردىڭ تولىقتاي ەسكەرىلگەندىگىن ءارى ۇستازدار تاراپىنان ايتىلعان ءارىبىر پىكىردىڭ قۇندى ەكەندىگىنە توقتالدى. ۇستازدار قاۋىمى ءۇشىن مارتەبەلى قۇجاتتىڭ جوعارى دەڭگەيدە دايىندالىپ, سالاعا قاتىستى كەز كەلگەن ماسەلەنى تولىعىمەن قامتۋى قوعام كەلەشەگى ءۇشىن اسا ماڭىزدى.
ەلۆيرا سەرىكقىزى,
«ەگەمەن قازاقستان»
الماتى
