ءىس-شاراعا مەملەكەتتىك ورگانداردىڭ, ديپلوماتيالىق كورپۋستىڭ, ەكونوميكالىق ىنتىماقتاستىق جانە دامۋ ۇيىمى, بۇۇ دامۋ باعدارلاماسى, ازيا دامۋ بانكى سياقتى حالىقارالىق ۇيىمداردىڭ, اكادەميالىق قوعامداستىقتىڭ, ۇكىمەتتىك ەمەس سەكتوردىڭ وكىلدەرى قاتىستى.
مەملەكەتتىك حاتشى ءوز قۇتتىقتاۋىندا مەملەكەت باسشىسى نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا: «سىبايلاس جەمقورلىقپەن بەلسەندى كۇرەس جالعاساتىن بولادى» دەپ اتاپ وتكەنىنە توقتالدى.
– بىرىككەن ۇلتتار ۇيىمىنىڭ سىبايلاس جەمقورلىققا قارسى كونۆەنتسياسى ەرەجەسىنە جانە ۇلتتىق ەرەكشەلىكتەرىنە ساي قازاقستان ۇزدىك حالىقارالىق تاجىريبە نەگىزىندە سىبايلاس جەمقورلىقتان ازات قوعام قالىپتاستىرۋعا ۇمتىلاتىن زاماناۋي مەملەكەتتىڭ وزىندىك مودەلىن جاسادى, – دەدى گ.ابدىقالىقوۆا.
مەملەكەتتىك حاتشى «بەس ينستيتۋتسيونالدىق رەفورما» جانە قازاقستان رەسپۋبليكاسىنىڭ 2015-2025 جىلدارعا ارنالعان سىبايلاس جەمقورلىققا قارسى ستراتەگياسى اياسىندا سىبايلاس جەمقورلىققا قارسى ءىس-قيمىل جۇيەسى جاڭعىرىپ جاتقانىن اتاپ ءوتتى. زاڭنامالىق بازا جەتىلدىرىلۋدە, بەرىك ينستيتۋتسيونالدىق نەگىز قالىپتاستى, مەملەكەتتىك قىزمەتشىلەردىڭ ادامگەرشىلىك جانە ەتيكالىق مىنەز-قۇلقىنا قويىلاتىن ناقتى تالاپتار ەنگىزىلدى.
– سىبايلاس جەمقورلىققا قارسى ءىس-ارەكەتتىڭ ۇلتتىق جۇيەسىن جەتىلدىرە وتىرىپ, ءبىز جاھاندىق ترەندتەردى, سونداي-اق دامىعان مەملەكەتتەردىڭ جانە بىرىككەن ۇلتتار ۇيىمى, ەكونوميكالىق ىنتىماقتاستىق جانە دامۋ ۇيىمى, ەۋروپاداعى قاۋىپسىزدىك جانە ىنتىماقتاستىق ۇيىمى سياقتى حالىقارالىق بىرلەستىكتەردىڭ وسى سالاداعى وزىق تاجىريبەسىن جان-جاقتى ەسكەرەمىز, – دەدى گۇلشارا ابدىقالىقوۆا.
سوڭىندا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا كونفەرەنتسياعا قاتىسۋشىلارعا سىبايلاس جەمقورلىققا قارسى مەملەكەتتىك ساياساتتى ودان ءارى جەتىلدىرۋ جولىنداعى جۇمىستا تابىس تىلەدى.
جولدىباي بازار,
«ەگەمەن قازاقستان»
