ب.ساعىنتاەۆ ەلىمىزدىڭ بارلىق وڭىرىنەن كەلگەن كوللەدجدەردىڭ ستۋدەنتتەرىنە سايىسقا قاتىسقاندارى ءۇشىن العىس ءبىلدىرىپ, بارلىق ۇيىمداستىرۋشىلاردى, دەمەۋشىلەر مەن قوناقتاردى رەسپۋبليكالىق چەمپيوناتتىڭ اياقتالۋىمەن قۇتتىقتادى. پرەمەر-مينيستر «اتامەكەن» ۇلتتىق كاسىپكەرلەر پالاتاسىنىڭ جۋىرداعى كەڭەيتىلگەن وتىرىسىندا بيزنەس وكىلدەرى شاقىرۋدى قابىل الىپ, كەلەسى جىلدان باستاپ WorldSkills Kazakhstan قاۋىمداستىعىمەن بىلىكتى كادرلاردى دايارلاۋ بويىنشا بەلسەنە جۇمىس ىستەيتىنىن حابارلادى.
WorldSkills Kazakhstan چەمپيوناتىنىڭ باستى ماقساتى – جۇمىسشى كاسىپتەرىنىڭ ابىرويىن ارتتىرۋ, جاس جۇمىسكەرلەرگە قازىرگى ەڭبەك نارىعىندا سۇرانىسقا يە پراكتيكالىق داعدىلار مەن جوعارى بىلىكتىلىكتەردى الۋ مۇمكىندىگىن بەرۋ.
قازاقستان WorldSkills قوزعالىسىنا 2014 جىلى قوسىلدى. قازىردىڭ وزىندە ايتۋعا تۇرارلىق ناتيجەلەر بار. ەگەر 2015 جىلى سان-پاولودا وتكەن WorldSkills Competition ءبىرىنشى الەم چەمپيوناتىندا قازاقستاندىق كوماندا 50-ورىندا بولسا, 2017 جىلى ءابۋ-دابيدە وتكەن جارىستا 24-ورىندى يەلەندى. سونىمەن قوسا, ەلىمىزدە كاسىپتىك-تەحنيكالىق جانە جوعارى ءبىلىمنىڭ دامۋى بۇل كورسەتكىشتەردى ودان ءارى جاقسارتۋ ءۇشىن پەرسپەكتيۆالار اشىپ وتىر.
ۇزدىكسىز وقىتۋ مەن جاڭا كاسىپتەردى يگەرۋ قاجەتتىگىنە ەرەكشە نازار اۋدارىلدى. بۇل جۇمىس ۇردىستەرىنىڭ تەحنولوگيالىق جاڭارۋىمەن بايلانىستى. وسىعان بايلانىستى, ۇكىمەت جۇمىس بەرۋشىلەرمەن, شەتەلدىك ساراپشىلارمەن بىرلەسىپ قۇبىلمالى ەڭبەك نارىعىندا وتاندىق كادرلاردىڭ باسەكەگە قابىلەتتىلىگىن ارتتىرۋ ءۇشىن كاسىپتىك-تەحنيكالىق ءبىلىم بەرۋ باعدارلاماسىن ودان ءارى جەتىلدىرۋ بويىنشا جۇيەلى جۇمىس جۇرگىزىپ وتىر.
ۇكىمەت باسشىسى بىرقاتار چەمپيونات قاتىسۋشىلارىنىڭ كورنەكتى جۇمىستارىن ايرىقشا اتاپ ءوتىپ, جەڭىمپازدارعا التى قۇزىرەت بويىنشا ماراپاتتار تاپسىردى. اتاپ ايتقاندا, بيزنەسكە ارنالعان IT جوبالار (3-ورىن – ي.ابدۋلاباەۆ, 2-ورىن – ي.چۋپرىنين, 1-ورىن – م.سوكولوۆسكي); ەلەكترونيكا (3-ورىن – ا. پروسەتسكي, 2-ورىن – و.حاليموۆ, 1-ورىن – پ.فەتيسوۆ); ۆەب-ديزاين (3-ورىن – ن.مينەەۆ, 2-ورىن – ا.مۋنكو, 1-ورىن – ي.سيمانوۆ); گرافيكالىق ديزاين (3-ورىن – ف.ەۆدوكيموۆ, 2-ورىن – ي.مەدحاتوۆ, 1-ورىن – د.بولات); كومپيۋتەرلىك قۇرىلىمداۋ تەحنولوگياسىن قولدانۋمەن CAD ينجەنەرلىك گرافيكاسى (3-ورىن – س.جايلاۋوۆ, 2-ورىن – و.شاتەرنيكوۆ,1-ورىن – د.زورين); ناۋبايحانا ءىسى (3-ورىن – ي.بورودۋلينا, 2-ورىن – ا.مارقاباي, 1-ورىن – ا.امانعوسوۆا).
ماراپاتتاۋ سالتاناتىنا سونىمەن قاتار پارلامەنت سەناتىنىڭ دەپۋتاتى ب. ءايتىموۆا, پارلامەنت ءماجىلىسىنىڭ دەپۋتاتى ج.نۇرمانبەتوۆا, پرەمەر-ءمينيستردىڭ ورىنباسارى ە.دوساەۆ, ءبىلىم جانە عىلىم ءمينيسترى ە.ساعاديەۆ, ەڭبەك جانە حالىقتى الەۋمەتتىك قورعاۋ ءمينيسترى م.ابىلقاسىموۆا جانە باسقالارى قاتىستى.
رەسپۋبليكالىق چەمپيوناتتىڭ جەڭىمپازدارى 2019 جىلى قازاندا وتەتىن حالىقارالىق چەمپيوناتتا قازاقستان اتىنان سايىسقا تۇسەتىن بولادى.
قاراعاندى كولىك-تەحنولوگيالىق كوللەدجىنىڭ وقىتۋشىسى, ساراپشى اقبار تاشەن «جەڭىل اۆتوموبيلدەر» قۇزىرەتىندە بايقاۋعا قاتىسۋشىلار اۋىسپالى بەرىلىس قورابىن قۇراستىرعانىن ايتتى. ونىڭ ايتۋىنشا, بۇل وتە قيىن. بىراق, قاتىسۋشىلار ءوز ءىسىن جاقسى بىلەدى, قازىرگى تەحنيكالاردى جاقسى يگەرگەن.
«بۇل چەمپيوناتتى مىندەتتى تۇردە جالعاستىرۋ قاجەت. جاستاردىڭ داعدىلارىن جەتىلدىرۋ ۇلكەن جۇمىس. چەمپيوناتتا وتكەن ءتورت جىلدان بەرى اسا اۋقىمدى جۇمىس اتقارىلعان. ءبىز جوعارى ناتيجەلەرگە قول جەتكىزدىك, بىراق ءالى دە شەبەرلىكتى شىڭداۋ قاجەت. باسقا ەلدەردىڭ, ازيا جانە ەۋروپا ەلدەرىنىڭ تاجىريبەسىنەن ۇيرەنۋ كەرەك, دەدى ا.تاشەن.
الماتى قالاسىنان كەلگەن تەحنيكالىق دەلەگات قۋاتبەك ءابىلدينوۆ قازاقستاندىق چەمپيوناتتىڭ ەۋروپالىق ستاندارتتار دەڭگەيىندە وتكەنىن اتاپ ءوتتى.
«بۇل بايقاۋدا ءبىز تەحنيكالىق ماسەلەلەردى: راسىمدەردىڭ ساقتالۋىن, ساراپشىلار جۇمىسىن, الاڭداعى جۇمىستى ۇيىمداستىرۋمەن اينالىستىق. ءبىزدىڭ پىكىرىمىزشە, چەمپيونات وتە جوعارى دەڭگەيدە ءوتتى. قاتىسۋشىلارعا حالىقارالىق ستاندارتتار بويىنشا تالاپتار قويىلدى. باعدارلاما, سونداي-اق ەۋروپا چەمپيوناتى پەن ءابۋ-دابيدە وتكەن الەم چەمپيوناتىنا ساي كەلدى. تاپسىرمالاردىڭ ءبىر بولىگى تمد چەمپيوناتىنىڭ تاپسىرمالارىنا ۇقساس بولدى. الەم چەمپيوناتتارىنىڭ تاجىريبەسىندە تەحنيكالىق قۇزىرەتتەر بويىنشا تاپسىرمالاردىڭ تولىق ورىندالۋى سيرەك كەزدەسەدى. سەبەبى, ولار كۇردەلى. ءبىزدىڭ چەمپيوناتتا كوپتەگەن قاتىسۋشىلار ءوز تاپسىرمالارىن تولىق اياقتاي العانىنا تاڭعالدىم. بۇل تۇستا قاتىسۋشىلاردىڭ وڭىرلەردە پسيحولوگيالىق دايىندىقتان ءوتۋى ۇلكەن ءرول وينادى دەپ ويلايمىن», دەدى ق.ءابىلدينوۆ.
تورەشى, تۇركىستان وبلىسىنان كەلگەن تەحنيكالىق دەلەگات ايدوس اپپازوۆ قازاقستاندا كاسىپتىك-تەحنيكالىق ءبىلىم بەرۋ دەڭگەيى كوتەرىلىپ كەلە جاتقانىن ايتتى.
«WorldSkills Kazakhstan جوباسى قازاقستاننىڭ كاسىپتىك-تەحنيكالىق ءبىلىمىنىڭ ءيميدجىن كوتەرۋگە باعىتتالعان. مەن ەكى قۇزىرەتكە تورەشى بولدىم: مەحاترونيكا جانە ەلەكترومونتاج. «ەلەكترومونتاج» قۇزىرەتىندە قاتىسۋشىلار كوپ بولدى دا, بىزگە تورەلىك ەتۋ ءبىراز قيىنعا ءتۇستى. سونىمەن قاتار ەلەكترومونتاجدا پريبوردىڭ جۇمىسىن رەتتەيتىن ۇساق بولشەكتەر وتە كوپ. بىراق بالالار ونى دا يگەردى. «مەحاترونيكا» قۇزىرەتىندە قاتىسۋشىلار كومپيۋتەرلىك قۇرىلعىنىڭ كومەگىمەن جۇمىس ىستەيتىن تۇتاس ستانسا قۇراۋى ءتيىس ەدى. بۇل اسا قىزىقتى بولدى. كاسىپتىك-تەحنيكالىق ءبىلىم دەڭگەيى كوتەرىلىپ كەلەدى, جابدىقتار دا زامانعا ساي, بالالار حالىقارالىق ستاندارتتارعا سايكەس دايىندالعان», دەيدى ا.اپپازوۆ.
ساراپشى, كەنتاۋ پوليتەحنيكالىق كوللەدجىنىڭ ارنايى پاندەر بويىنشا وقىتۋشىسى نۇرجان سىزدىقوۆ مەملەكەت تاراپىنان تەحنيكالىق ماماندىقتارعا ءتۇسىپ جاتقان ستۋدەنتتەرگە كورسەتىلىپ وتىرعان قولداۋدىڭ ماڭىزدىلىعىن اتاپ ءوتتى.
«ەلەكترومونتاج, ەلەكترونيكا جانە روبوتتەحنيكا مودۋلدەرى بويىنشا ستۋدەنتتەردى دايارلاۋ كەزىندە جاۋاپكەرشىلىك سەزىلەدى, سەبەبى ستۋدەنتتەرگە الەمدىك ستاندارتتاردىڭ تالاپتارىنا ساي ءبىلىم بەرۋ كەرەك. ءبىز حالىقارالىق ستاندارتتاردى ۇستانۋعا تىرىسامىز. بۇگىندە ستۋدەنتتەردىڭ دەڭگەيى ءبىرشاما كوتەرىلىپ كەلەدى, ال وقۋدى بىتىرگەن سوڭ ولار ءوز ءىسىنىڭ ناعىز شەبەرى بولادى. WorldSkills Kazakhstan ستۋدەنتتەر ءۇشىن ءوز بىلىمدەرىن تەكسەرۋدىڭ ەڭ جوعارعى دەڭگەيى. وقىتۋ كەزىندە ولارمەن بىرگە ءبىز دە ۇيرەنەمىز. بىزدە دۋالدى وقىتۋ جۇيەسى بار, ستۋدەنتتەردىڭ 60%-دان استامى زاۋىتتار مەن ونەركاسىپتىك كاسىپورىنداردا تاعىلىمدامادان وتەدى, دەمەك, ءوز داعدىلارىن ەداۋىر ارتتىرادى. ءبىزدىڭ ستۋدەنتتەر 3 كۋرستا وقي ءجۇرىپ جۇمىس ىستەي باستايدى. بۇگىندە ينجەنەرلىك ماماندىقتاردىڭ مارتەبەسى ايتارلىقتاي جوعارى كوتەرىلگەنىن ايتۋعا بولادى, ستۋدەنتتەردىڭ باسىم بولىگى وسىنداي كاسىپتەردى تاڭداۋدا. سەبەبى ەلىمىزدە وعان سۇرانىس بار, وزەكتىلىگى سەزىلۋدە, مەملەكەتتىڭ قولداۋى دا زور, جالاقىسى دا بۇرىنعىدان جوعارىلادى», دەدى ن.سىزدىقوۆ.
سۇڭعات ءالىپباي,
«ەگەمەن قازاقستان»
