تۇرعىنداردى تۇڭعىش پرەزيدەنت كۇنىمەن قاتار كەلگەن قۋانىشتارىمەن وبلىس اكىمى بولات باقاۋوۆ قۇتتىقتاپ, پاتەر كىلتتەرىن سالتاناتتى تۇردە تابىس ەتتى.
جاڭا ۇيدەن پاتەر العان ينديرا سايفۋروۆا 15 جىلداي كەزەكتە تۇرىپ, قاراجاتىن «تۇرعىن ءۇي قۇرىلىس جيناق» اق بانكىندە جيناعان ەكەن.
– «نۇرلى جەر» باعدارلاماسى بويىنشا پاتەر قۇنىنىڭ 50 پايىزىن جيناپ, پاتەر الدىم. ەندى 6 جىل ىشىندە قالعان اقشاسىن تولەيمىن, – دەيدى ينديرا.
پاتەردىڭ ءبىر شارشى مەترى – 121 مىڭ تەڭگە. مەملەكەتتىك باعدارلامالارعا قاتىسۋ ءۇشىن «تۇرعىن ءۇي قۇرىلىس جيناق» اق بانكىندە پاتەر قۇنىنىڭ 20 پايىزىن قۇرايتىن سالىمعا يە بولۋ كەرەك. بۇل كۇندەرى ءوڭىردىڭ ءاربىر 13-ءشى تۇرعىنى, ياعني 55 مىڭ ادام «تۇرعىن ءۇي قۇرىلىس جيناق بانكى» ارقىلى ءۇي الۋعا اقشا جيناۋدا.
ال «تۇرعىن ءۇي قۇرىلىس جيناق بانكى» اق وبلىستىق فيليالىنىڭ باسشىسى تالعات بايىلوۆتىڭ ايتۋىنشا, بانكتەن ەسەپشوت اشىپ, تۇرعىن ءۇي الۋ ماقساتىندا اقشا سالۋشىلاردىڭ قاتارى كوبەيۋدە. جاڭا جىل مەرەكەسى قارساڭىندا تاعى دا 288 بانك سالىمشىسى پاتەر الماق. ال 2019 جىلدىڭ ناۋرىز ايىنا دەيىن 216 پاتەر پايدالانۋعا بەرىلەدى دەپ جوسپارلانعان.
بىلتىر شاعىن اۋداندا 6 تۇرعىن ءۇيدىڭ قۇرىلىسى اياقتالىپ, كوپتەگەن تۇرعىندار قونىس تويىن تويلاعان-دى. وبلىستىق قۇرىلىس باسقارماسىنىڭ مالىمەتىنشە, وبلىس ورتالىعىنىڭ باس جوسپارىنا سايكەس شاعىن اۋداندا 600 بالاعا ارنالعان مەكتەپ سالۋ جوباسى دايىندالۋدا. بۇرىنعى ەسكى قالاشىقتاعى №159-ءۇي بۇزىلىپ, بۇل اۋماق قازىر قىزۋ قۇرىلىس الاڭىنا اينالدى.
ال «2020 جىلعا دەيىن وڭىرلەردى دامىتۋ» باعدارلاماسى ارقىلى سالىنىپ جاتقان «سارىارقا» تۇرعىن ۇيلەر كەشەنىنىڭ قۇرىلىسى 2021 جىلى اياقتالادى دەپ جوسپارلانعان. سونىمەن بىرگە «نۇرلى جەر» باعدارلاماسى بويىنشا بۇل كۇندەرى وبلىس ورتالىعىندا «دوستىق» شاعىن اۋدانىنىڭ قۇرىلىسى باستالدى.
فاريدا بىقاي,
«ەگەمەن قازاقستان»
پاۆلودار
