جيىنعا وزبەكستاننىڭ قازاقستانداعى ەلشىسى سايديكرام نيازحودجاەۆ, نوكىس (قاراقالپاقستان), اتىراۋ, الماتى قالالارىنان كەلگەن عالىمدار, ەۇۋ وقىتۋشىلارى, ماگيسترانتتار, دوكتورانتتار قاتىستى.
كونفەرەنتسيانى استانا قالالىق قازاقستان حالقى اسسامبلەياسىنىڭ ساراپتامالىق توبى, «جايحۋن» قاراقالپاق ەتنومادەني بىرلەستىگى مەن ەۇۋ ارحەولوگيا جانە ەتنولوگيا كافەدراسى ۇيىمداستىردى.
كونفەرەنتسيانىڭ اشىلۋ سالتاناتىندا وزبەكستاننىڭ قازاقستانداعى ەلشىسى س.نيازحودجاەۆ ۇلى دالادا ومىرگە كەلگەن ءىرى تۇلعالاردىڭ ءبىرى, عالىم قاللى ايىمبەتوۆتىڭ تۇركى حالىقتارىنا ورتاق قايراتكەر ەكەنىن ايتا كەلىپ, ونىڭ ەسىمى استانادا ارداقتالىپ جاتقانى قازاق حالقىنىڭ كەڭپەيىلدىلىگىن بىلدىرەتىنىن جەتكىزدى.
شارا بارىسىندا وزبەكستان عىلىم اكادەمياسى قاراقالپاق بولىمشەسىنىڭ ن.داۋقاراەۆ اتىنداعى ءتىل جانە ادەبيەت ينستيتۋتىنىڭ (وزبەكستان) ديرەكتورى, فيلولوگيا عىلىمدارىنىڭ كانديداتى ايتمۇرات ءالنيازوۆ «قاللى ايىمبەتوۆتىڭ عىلىمي جۇمىسى مەن ءومىر جولى» تاقىرىبىندا بايانداما جاساپ, عالىمنىڭ بالا كەزدەن زەرەك, العىر, قۇيماقۇلاق بولعانىن, مەكتەپتى جاقسى وقىپ, الماتىدا م.اۋەزوۆتەن ءدارىس العانىن ايتتى. سونداي-اق ول ءتىلتانۋ, الىپپە وقۋلىقتارىن, «قاراقالپاق فولكلورى» كوپتومدىعىن جازعان ق.ايىمبەتوۆتىڭ ەڭبەكتەرىنە تاريحي-ەتنوگرافيالىق دايەكتەمە دەگەن انىقتاما بەردى.
نازارباەۆ ورتالىعىنان كەلگەن جاس عالىم جاقسىلىق ءسابيتوۆ قاراقالپاق پەن قازاقتىڭ باۋىرلاس ەكەنىنە تاريحي دەرەكتەر كەلتىرىپ, ەكى ەلدىڭ باتىرلار جىرلارىنداعى ۇقساستىقتارعا تالداۋ جاسادى. ال ەۇۋ ارحەولوگيا جانە ەتنولوگيا كافەدراسىنىڭ دوتسەنتى, تاريح عىلىمدارىنىڭ كانديداتى زىليحا ومىربەكقىزى ءوز بايانداماسىندا قازاقستانداعى قاراقالپاقتاردىڭ سانى 4 مىڭنان اساتىنىن, ولاردىڭ قازاققا قان جانە ءتىل جاعىنان ەڭ جاقىن ۇلت ەكەنىن ايتا كەلىپ, قاراقالپاقتىڭ بەلگىلى اقىنى بەرداقتىڭ «شەجىرە» ەڭبەگىنەن ءۇزىندى وقىپ بەردى.
جيىندا ت.ساليەۆا ءوزى باسقاراتىن «جايحۋن» ەتنو-مادەني بىرلەستىگىنىڭ قاراقالپاق حالقىنىڭ مادەنيەتى مەن سالت-ءداستۇرىن ساقتاۋ باعىتىندا اتقارىلىپ جاتقان جۇمىستارىنا توقتالدى. كونفەرەنتسيا سوڭىندا قاراقالپاقستاننان ارنايى كەلگەن جاس جىرشى سالامات اياپوۆ «ەدىگە» جىرىنان ءۇزىندى ايتتى. ەلىمىزدە قاراقالپاق ەتنومادەني بىرلەستىكتەرى بار الماتى, اقتاۋ, اتىراۋ, شىمكەنت قالالارىنان كەلگەن ونەرپازدار قاراقالپاقتىڭ ءبيىن بيلەپ, ءانىن شىرقادى. سونداي-اق ق.ايىمبەتوۆتىڭ نەمەرەسى يلحام ۆيولونچەلدە ابايدىڭ «ايتتىم سالەم, قالامقاسىن» ناقىشىنا كەلتىرە ورىندادى.
ايدانا شوتبايقىزى,
«ەگەمەن قازاقستان»
