مىنە, سپەكتاكل دە اياقتالدى. سارت-سۇرت سوعىلعان الاقاندار كورەرمەندەردىڭ ىستىق ىقىلاسىن پاش ەتەدى. بىرەۋلەر ساحناعا شىعىپ, اكتەرلەرگە گۇل شوقتارىن سىيلاپ جاتىر. ساحنانى گۇل كومكەرىپ تاستادى. گۇل شوقتارى باس كەيىپكەردى ويناعان ورتا بويلى, قوڭىر ءوڭدى, ويلى, مۇڭلى جانارىمەن كورەرمەندەرگە كوز تىككەن تانىمال اكتەرگە, اسىرەسە كوبىرەك ۇسىنىلدى. بۇل ورىندى دا ەدى. ويتكەنى بۇگىنگى سپەكتاكلدىڭ ەڭ اۋىر جۇگىن ارقالاعان دا, شاعالا شابىتتىڭ اق قاناتىن اق الماستاي سەرمەپ, شەبەرلىك تانىتقان دا, ارىپتەستەرىنىڭ اجارىن اشىپ, ابىرويىن اسىرعان دا – سول. ءيا, جۇرەكتىڭ وتىن سوندىرمەي, ونەرىمەن جان-جاعىنا جارىق ساۋلە شاشقان دا – سول.
بۇل م.اۋەزوۆ تەاترىنىڭ ساحناسىندا رەجيسسەر ا.وتەگەنوۆ قويعان «بەلگىسىز باتىر» سپەكتاكلى ەدى. ال باس كەيىپكەردىڭ جان دۇنيەسىن جارقىراتىپ جايىپ سالعان الىمدى اكتەر, ساحنانىڭ بەلگىلى سۋرەتكەرى, قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى م ۇلىك سۇرتىباەۆ بولاتىن.
ونىڭ ونەردەگى جەمىستى جولى سوناۋ وتىزىنشى جىلداردان باستالادى. مەكتەپتە وقىپ جۇرگەن كەزىندە-اق ساحناعا شىعىپ, ونەرگە قابىلەتى بارلىعىن تانىتقان م ۇلىك ارناۋلى ءبىلىم الىپ, تۋعان حالقىنا تالماي قىزمەت ەتۋدى قالادى. سول ويى 1933 جىلى قاراعاندىداعى جاڭادان اشىلعان تەاتر ستۋدياسىنا الىپ كەلدى. ونى 1936 جىلى تامامداعان ول سول ساتتە اشىلعان قاراعاندى وبلىستىق دراما تەاترىنا جۇمىسقا ورنالاستى.
تەاتردىڭ تۇڭعىش رەجيسسەرى راقىم يلماتوۆ جاس اكتەرگە قوزى, تولەگەن ءتارىزدى جۇرەگى دەرت, جانى ءورت, عازيز عاشىقتاردىڭ ءرولىن جۇكتەدى. وسىناۋ ارداقتاردىڭ اق الماستاي وتكىر, تاڭعى شىقتاي تازا سەزىمدەرىن بەينەلەۋ ءۇشىن م ۇلىك ءوزىنىڭ بارلىق جاستىق جالىنىن جۇمسادى. سودان دا بۇل بەينەلەر اكتەردىڭ جاستىعىنا, تاجىريبەسىنىڭ ازدىعىنا قاراماستان, ءساتتى شىقتى. قاراعاندى تەاترى 1943 جىلى ك.گولدونيدىڭ «ەكى مىرزاعا ءبىر قىزمەتشى» پەساسى بويىنشا سپەكتاكل قويىپ, ترۋفالدينو ءرولى م ۇلىككە تاپسىرىلعان-دى. بۇل ۇلى وتان سوعىسىنىڭ اۋىر كەزەڭىنە وراي, كيەۆتىڭ لەسيا ۋكراينكا اتىنداعى دراما تەاترىنىڭ قاراعاندىعا كەلىپ, جۇمىس ىستەپ جاتقان كەزى ەدى. كيەۆ تەاترىندا ترۋفالدينونى ويناۋمەن اتى شىققان ۋكراين حالىق ءارتىسى لاۆرور م ۇلىككە قول ۇشىن سوزدى. ەكەۋى تالاي مارتە تەاتردا وڭاشا قالىپ, وبراز كىلتىن تابۋ ءۇشىن ايانباي تەر توكتى. سپەكتاكل ساحناعا شىققاندا, تاباندى اكتەردىڭ تالانتتى ويىنىنان ىزدەنىستىڭ جەمىستى ىزدەرى ايقىن تانىلدى.
1951 جىلى م ۇلىك سۇرتىباەۆتىڭ شىعارماشىلىق ومىرىندەگى ەلەۋلى ءبىر كەزەڭ بولدى. سول جىلى م ۇلىك ەڭبەك ەتەتىن قاراعاندى تەاترى ۇلى جازۋشى م.اۋەزوۆتىڭ «ابايىن» ساحناعا شىعاردى. اباي رولىندە – م ۇلىك. بۇل ءوسۋ ۇستىندەگى, ىزدەنىس جولىنداعى اكتەر ءۇشىن اسا قيىن اسۋ ەدى. تاعى دا تالانت پەن تاباندىلىق كومەككە كەلدى. ۇيقىسىز تۇندەر, كۇلكىسىز كۇندەردەن كەيىن ومىرگە كەلگەن ۇلى اقىن ابايدىڭ ساحنالىق بەينەسى حالىقتىڭ قامىن ويلاعان, ادىلدىكتى, ماحابباتتى قورعاعان كۇرەسكەر اقىن بولىپ كورەرمەن كوكەيىنە ۇيالادى. سۇرتىباەۆ ويشىل اقىن ابايدىڭ «مىڭمەن جالعىز الىسقان» قاراڭعى تۇنەكتەگى جالقى جارىق تۇلعاسىن دا كورەرمەن كوڭىلىن سەندىرە بەينەلەدى.
ن.گوگولدىڭ «رەۆيزورىنداعى» حلەستاكوۆ وبرازىن شەبەر بەينەلەپ, ەرەكشە كوزگە تۇسكەن م ۇلىك سۇرتىباەۆ تالانتى كينو رەجيسسەرلەردىڭ دە نازارىن اۋداردى. 1955 جىلى «قازاقفيلم» كينوستۋدياسىن وداقتىق ەكرانعا شىعارعان پ.پ.بوگوليۋبوۆتىڭ «وجەت قىز» فيلمىندە اڭعارباي رولىندە م ۇلىك وينادى. ءوڭى دە, ءوزى دە ويناقى ماشينا ر ۇلىندەگى اڭعارباي – م ۇلىك كورەرمەننىڭ كوز الدىندا قالىپ قويدى.
1958 جىلدىڭ قۋانىشى ەرەكشە. بۇل جىلى م ۇلىك م.اۋەزوۆ اتىنداعى اكادەميالىق دراما تەاترعا شاقىرىلدى. ونىڭ استانا تەاترىنىڭ ساحناسىندا العاش كەزدەسكەنى ءا.تاجىباەۆتىڭ «مايراسىنداعى» تەنتەك دەۋگە قيمايتىن, تەكتى دەۋگە سىيمايتىن باقتيار ەدى. سودان بەرى ول وسى تەاتر ساحناسىندا تالاي تارتىمدى رولدەردى وينادى. سولاردىڭ ىشىنەن, اسىرەسە ءساتتى شىققاندارى «قاراگوزدەگى» نارشا, «ەڭلىك-كەبەكتەگى» كەبەك, «ايمان-شولپانداعى» الىبەك, «ۇيلەنۋدەگى» پودكولەسين, «اساۋعا تۇساۋداعى» سلاي, «اقان سەرى – اقتوقتىداعى» جالمۇقان, «توي بولارداعى» بايبول, «اقىن جۇرەگىندەگى» ءنابي, «بولتىرىك بورىك استىنداعى» ساپار, «قۇداعي كەلىپتىدەگى» سۇڭعات, «قىزعانىشتان ماحابباتتاعى» تريستان, «جات ەلدەگى» جۇمان, «قارا قىپشاق قوبىلاندىداعى» قارامان, «كۇننەن تۋعاندارداعى» پروتاسوۆ, «سونبەيتىن وتتاعى» تايمان. بۇلار, ءبىر سوزبەن ايتقاندا, ءبىر-بىرىنە ۇقسامايتىن كوپ قىرلى, الۋان سىرلى بەينەلەر.
م ۇلىك سۇرتىباەۆتىڭ ونەردەگى ءومىرى جايلى ويلاعاندا اعىلشىن اكتەرى دجون گيلگۋد ويعا ورالادى. وسى ۇلكەن ەكى اكتەردىڭ ءبىر-بىرىنە ۇقسامايتىن وزگەشە تاعدىرى, وزىندىك تالانتتارىمەن بىرگە, زەر سالىپ قاراساڭىز, كەيبىر ۇقساس جايلار دا بار. ول ەكى تالانتتىڭ دا جەتپىس دەيتىن جەتى بەلگە ونەردىڭ اۋىر جۇگىن, قىمبات قازىناسىن اكەلگەندىگىنە, ءبىراز جاسقا كەلگەنىنە قاراماستان, ءوز دارىندارىنىڭ جاڭا ءبىر قىرلارىن تانىتىپ, جەتپىستەن اسقاندا دا ساحنادا جاي وعىنداي جارقىلداۋىندا عانا ەمەس, ءار ءرول سايىن ورشەلەنە العا ۇمتىلىپ, ۇنەمى ءوسىپ وتىراتىن اكتەرلىك شەبەرلىكتەرىندە, ويىندارىنداعى اكتەرلىك العىرلىق پەن اۋقىمدىلىقتىڭ تۇتاستىعى مەن تۋىستىعىندا.
«جول اناسى – ءىز» دەيدى حالىق دانالىعى. بۇگىندە اپ-ايقىن بولىپ سايراپ جاتقان سۇرتىباەۆتىڭ ونەرگە كەلۋ جولى سوناۋ وتىزىنشى جىلدارى قاراعاندى تەاترىنىڭ ستۋدياسىندا وقىپ جۇرگەن شاعىنداعى ءى.جانسۇگىروۆتىڭ «كەك» پەساسىندا قويشى تاستابان ءرولىن ويناعان العاشقى, ءالى ايقىن بولماسا دا, سونى ىزىنەن باستالىپ ەدى. كەيىن م ۇلىك سول ىزبەن تولەگەن, سويدو, قوزى, تەمىرلەردى اداستىرماي الىپ ءجۇردى دە, كەلە-كەلە حالىققا ايقىن تانىلعان ءوزىنىڭ ونەردەگى داڭعايىر جولىنا ف.شيللەردىڭ «ز ۇلىمدىق پەن ماحابباتىنداعى» شىن سۇيىسپەنشىلىك قۇربانى فەرديناندتى, ن.ۆ.گوگولدىڭ «رەۆيزورىنداعى» داڭعوي حلەستاكوۆتى, ش.قۇسايىنوۆتىڭ «الدار كوسەسىندەگى» ايلاكەر, تاپقىر الداردى, م.اقىنجانوۆتىڭ «ىبىراي التىنسارينىندەگى» عۇلاما اعارتۋشى ىبىرايدى, م.اۋەزوۆتىڭ «قارا قىپشاق قوبىلاندىسىنداعى» باتىر قوبىلداندىنى, وسىلار سىندى تاعى دا باسقا الۋان ءتۇرلى, سان قىرلى ساڭلاق بەينەلەردى الىپ شىقتى.
م ۇلىك سۇرتىباەۆتىڭ ونەر ولكەسىن وزگەلەر وسىرمەگەن وزگەشە گۇلمەن كومكەرگەن جارتى عاسىردان استام قيىن دا قاستەرلى ەڭبەگىنىڭ العاشقى جيىرما جىلى قاراعاندى دراما تەاترىمەن, سوڭعى قىرىق جىلى م.اۋەزوۆ تەاترىمەن تىعىز بايلانىستى. وسى ەكى ساحنادا ول جاساعان ۇزىن سانى ەكى جۇزدەن استام كوركەم وبرازداردىڭ ءبارىن بىردەي ءتىزىپ شىعۋ مۇمكىن دە, قاجەت تە ەمەس. سولاردىڭ تاعى ءبىرى دەپ, ءبىز بيازى الىبەك, قاسارما قۇدايبەرگەن, ويلى, مۇڭلى جانسۇگىر, ايلاكەر ابىلقايىر, مانساپقور ساتتار, سىرتى ءبۇتىن, ءىشى ءتۇتىن كەرىمباي سياقتى ءبىر-بىرىنە سىرت تۇلعاسىمەن دە, ىشكى جان دۇنيەسىمەن دە مۇلدەم ۇقسامايتىن, سونىسىمەن قيىن دا قىزىقتى كوپتەگەن كوركەم بەينەنى ايتار ەدىك. اۋدارما دەپ اتالاتىن اسىل قازىناعا م.سۇرتىباەۆ قوسقان ۇلەستىڭ قوماقتىلىعىنا «وتەللوداعى» جالعىز رودريگونىڭ ءوزى-اق ايقىن ايعاق بولا الادى.
م.سۇرتىباەۆ جاساعان «وجەت قىزداعى» اڭعارباي, ء«بىزدىڭ سۇيىكتى دارىگەردەگى» مۇرات, «بوتاگوزدەگى» ماديار ءتارىزدى ەكراندىق بەينەلەر ۆ.گ.بەلينسكيدىڭ: «ونەر دەگەنىمىز – كوركەم وبراز ارقىلى ويلاۋ» دەگەن انىقتاماسىنا لايىق ەڭبەك.
ءبىز سۇرتىباەۆ جاساعان رولدەردىڭ وتىزدان ءبىرىن عانا ەسكە الدىق. سونىڭ وزىنەن-اق اكتەر ەرەكشەلىگىن اڭعارۋ قيىن ەمەس. ەڭ الدىمەن, سۇرتىباەۆتىڭ اكتەرلىك اۋقىمىنىڭ كەڭدىگى, العىرلىعى, الىمدى تالانتى كورەرمەن كوپتى وزىنە ءتانتى ەتپەي قويمايدى. پلاستيكالىق قوزعالىس, كەيىپكەردىڭ جان دۇنيەسىنە ۇڭىلە الاتىن, ساحنانىڭ ساڭلاق سۋرەتكەرىنە ءتان سۇڭعىلالىق, قازاق ءسوزىنىڭ قايماعىن بۇزباي جەتكىزەتىن قۇلاققا جاعىمدى قوڭىر ءۇن, ايتار ويىن ەركىن جەتكىزە الاتىن ۇتىمدى تراكتوۆكا. مىنە, ساحنانىڭ مايتالمان شەبەرىنىڭ وزىندىك ەرەكشەلىگى دە, سان مىنەزدى ءمىنسىز مۇسىندەيتىن ايرىقشا اجارلى زەرگەرلىگى دە وسىنداي سان ءتاسىل, الۋان ءتۇرلى اسەم بوياۋلاردان ءنار العان.
تالانتتى ونەرپاز م ۇلىك سۇرتىباەۆتىڭ اكتەرلىك تالانتىن ادەبيەت پەن ونەردىڭ اسا كورنەكتى وكىلدەرى دە وتە جوعارى باعالادى. زامانىمىزدىڭ ۇلى جازۋشىسى مۇحتار اۋەزوۆ: «سۇرتىباەۆ –كوزىنىڭ ءبىر عانا قىرىمەن كوپتى اڭعارتاتىن ۇلكەن شەبەر اكتەر», دەپ باعالايدى. تەاتر ونەرىنىڭ قىرى مەن سىرىنا جەتىك, قىران جانارى قياداعىنى شالاتىن عابيت مۇسىرەپوۆ سوناۋ 1951 جىلدىڭ وزىندە-اق بىلاي دەپ جازىپتى: «سۇرتىباەۆ جاساعان اباي وبرازىنا قالتقىسىز سەنىپ وتىراسىڭ... بىزدىڭشە, اباي رولىندە ويناعان قازاق ارتىستەرىنىڭ ىشىندە ەڭ ۇنامدى وبراز جاساعانى, وسى سۇرتىباەۆ جولداس».
ادەبيەتىمىزدىڭ الىپتارى ايتقان وسى ۇزىك پىكىر كوپ سىردى اڭعارتسا كەرەك.
سۇرتىباەۆ كومەديالىق رولدەردەن تراگەديالىق رولدەرگە دەيىن ويناي الاتىن اۋقىمدى اكتەر دەسەك تە, بىزدىڭشە, ونىڭ سان قىرلى تالانتىنىڭ بارىنشا جارقىراپ اشىلاتىن كەزى كۇردەلى پسيحولوگيالىق پلانداعى كەيىپكەرلەر مەن تراگەديالىق كلاسسيكالاردى ويناعان ءسات. م.سۇرتىباەۆتىڭ اكتەرلىك ەرەكشەلىكتەرى مەن شىعارماشىلىق تابىستارى جايلى ورتالىق «پراۆدا» گازەتىنەن باستاپ, وداقتىق, رەسپۋبليكالىق, وبلىستىق كەيدە ءتىپتى اۋداندىق گازەتتەردە دە كوپ جازىلدى. تەاتردىڭ بەلگىلى سىنشىلارى ن.ي.لۆوۆ, و.ن.قايدالوۆا ماسكەۋدە جارىق كورگەن كىتاپتارىندا, ن.ابالكين, ە.د.سۋركوۆ وداقتىق باق-تا سۇرتىباەۆ تالانتىن جوعارى باعالادى.
ەسىمى ەلگە ايگىلى بولعان م ۇلىك سۇرتىباەۆتى وسىناۋ بيىككە جەتكىزگەن ءبىر عانا تابيعي تالانت دەسەك, اعات ايتقان بولار ەدىك. راس, ونەردە تابيعي تالانتتىڭ ەڭ باستى, شەشۋشى ماڭىزى بار. ايتسە دە, جان قيناپ, ازاپقا سالاتىن اۋىر ەڭبەكسىز قانداي قۇدىرەتتى تالانتتىڭ ءوزى دە تۇل. ەندەشە, م.سۇرتىباەۆتىڭ جاستار ۇلگى الار ەرەكشە قاسيەتىنىڭ ءبىرى – وزگەشە ەڭبەكقورلىعىندا, ىزدەنىمپازدىعىندا دەر ەدىك. اكتەر م.سۇرتىباەۆ ءوزىنىڭ ونەردەگى, ومىردەگى سەرىگى, قازاقستاننىڭ حالىق ءارتىسى ايكەن مۇسابەكوۆا ەكەۋى ءتورت بىردەي پەرزەنت تاربيەلەپ وسىرگەن ارداگەر اكە دە. «قۇرمەت بەلگىسى» وردەنىنىڭ كاۆالەرى ايكەن مۇسابەكوۆا 1956 جىلدان بەرى م.اۋەزوۆ تەاترىندا ونەر كورسەتتى. ايكەن جاساعان سان الۋان ساحنالىق وبرازدار ساپىندا ءوز باقىتى مەن ماحابباتى ءۇشىن كۇرەسكەن ەڭلىك پەن بايان («ەڭلىك-كەبەك» پەن «قوزى كورپەش-بايان سۇلۋ»), ويناقى ايمان مەن ويلى زاۋرە («ايمان-شولپان مەن «مايدان»), اياۋلى ايگەرىم, اجارلى ايبارشا («اباي» مەن «مايرا»), كۇتۋشى ايەل («فارحات-شىرىن») جانە باسقا دا ءبىراز بەينەلەر بار.
ءا.مۇسابەكوۆانىڭ «پارتورگ» سپەكتاكلىندە پارتورگ جامال بەينەسىن ءساتتى شىعارۋى – تالانتتى اكتريسانىڭ ءىرى تۆورچەستۆولىق تابىسى بولدى.
اكتريسا «ەگەر ءبىزدىڭ ارقايسىمىز», «بوتاگوز» كينوفيلمدەرىنە ءتۇسىپ, ەستە قالار بەينەلەر جاسادى.
م ۇلىكتىڭ تەاترعا جىل سايىن كەلىپ قوسىلىپ جاتقان جاڭا تولقىن جاستارعا دەگەن قامقورلىعى وزىنشە ءبىر اڭگىمە. بەينەلەپ ايتساق, ول شىلدەنىڭ اپتابى مەن اڭىزاعىندا ساياسىندا سان ادامدى پانالاتقان ونەر دەيتىن عالامات الەمدەگى عاجاپ ءبىر بايتەرەك. تەاتر تابالدىرىعىن جۇرەكسىنە اتتاعان تالاي جاسقا سول بايتەرەك ءوزىنىڭ ىستىق, قامقور قۇشاعىن جايىپ ءجۇردى. ول ونەردىڭ بۇرىلىسى كوپ قيىن جولىنا تۇسكەن بارلىق جاستىڭ, بارشا تالانتتىڭ قامقورى. ايتسە دە, سول ماحاببات ونى ونەردەگى ءپرينتسيپتى اڭگىمەلەردى, اششى شىندىقتاردى اشىپ ايتۋىنا ەشقانداي كەدەرگى كەلتىرىپ كورگەن ەمەس. م ۇلىك سۇرتىباەۆتىڭ جانىنا, اسىرەسە, جاقىن ەكى دوسى بار. ونىڭ العاشقىسى – تالانت, ەكىنشىسى – شىندىق. ادامنىڭ ءاۋ باستاعى, جاراتىلىسىنداعى, ءبىتىم-بولمىسىنداعى قاسيەتتەر, ءتىپتى كەيىنگى تاربيە جەمىسى دە ونىڭ ونەرىنە اسەر ەتپەي قويمايدى, قاشان قانداي تالانت بولماسىن, ءوز تۋىندىسىندا از دا بولسا ءوز وي سەزىمىن كورسەتپەي قالا المايدى. بۇل ونىڭ ستيحياسى. ولاي بولسا, ومىردەگى تازالىقتىڭ ونەرگە دە ابدەن قاتىسى بار. بۇل تۇرعىدان العاندا دا م.سۇرتىباەۆ ءوزىنىڭ جالتاڭى جوق, پايىمى كوپ پاراساتتى ءوز تالانتىنا دارىتا العان سۇڭعىلا سۋرەتكەر. حالقىمىز قادىرلەپ, ەڭبەگىن لايىقتاپ باعالاعان تارلان تالانتتار, باقىتىمىزعا وراي ۇلتتىق تەاتر ونەرىمىزدە دە بارشىلىق. تاستىڭ وزىنە ءتىل ءبىتىرىپ, ۇياڭ جىميعان ۋىلجىعان كەلىنشەكتىڭ ءسال عانا ەزۋ تارتقان جۇمساق تا جۇمباق كۇلكىسىنە ونىڭ جان دۇنيەسىندەگى جاسىرىن سىرلاردى ورە بىلگەن الەمگە ايگىلى «دجاكوندانىڭ» اۆتورى لەوناردو دا ۆينچي 1519 جىلى ەكىنشى ماي كۇنى: «شارشاعاننان ولگەن جاقسى», دەپتى دە, الپىس جەتى جاسىندا كوز جۇمىپتى. بۇل ۇلى ما, كىشى مە – ءبارىبىر, بارلىق تالانت اتاۋلىنىڭ ستيحياسى, شىعارماشىلىق توقىراۋدى جۇرەكتىڭ توقتاۋىمەن بىردەي كورەتىن تالانتتاردىڭ ءبىرى – ۇلكەن ءىس تىندىرعان قازاق ساحنا ونەرىنىڭ سايىپقىرانى, حالقىمىزدىڭ ماقتانىشى – م ۇلىك سۇرتىباەۆ, مۇنداي قايراتتى, پاراساتتى ازامات, ۇلكەن تالانت يەسى قاي قۇرمەتكە دە لايىق.
ءار اكتەردىڭ وزگەگە ۇقسامايتىن وزگەشەلىكتەرى بولادى. بىرەۋلەرى كومەديالىق, ەكىنشىلەرى پسيحولوگيالىق, تاعى بىرەۋلەرى تراگەديالىق رولدەرگە بەيىم كەلەدى. م ۇلىكتىڭ ارتىقشىلىعى – اكتەرلىك امپۋلاسى كەڭ, سان قىرلى تالانت ەدى.
سۇلۋلىقتىڭ, ونەردىڭ سۇلۋلىعىن ەشبىر داۋىل, ەشقانداي جاۋىن سوندىرە المايدى. ونەرىمەن, تالانتىمەن كەڭ دۇنيەگە تانىلعان ۇلى ادامداردى ۋاقىت تا ولتىرە المايدى. سۇرتىباەۆتىڭ ءوزى ولگەنمەن, اتى ولگەن جوق. مۇلىك ەسىمى – ەل ەسىندە, جۇرەكتە. ونىڭ تالانتىن كەلەر ۇرپاق, كەمەل تاريح ءالى تالاي تانىپ الادى. ءيا, سۇلۋلىق سونبەيدى, ۇلىلىق ولمەيدى...
II
قازاقتىڭ تاۋلارى قانداي اسۋ بەرمەس اسقار بولسا, ونىڭ تالانتتى پەرزەنتتەرى دە سونداي اسقاق. قازاقتىڭ دالاسى قانداي كەڭ بولسا, سول دالانى دۇبىرگە بولەپ كوسىلە شاپقان جۇيرىكتەرى دە سونداي كەڭ تىنىستى, كەمەل ويلى. سول ۇلان-عايىر ۇلى دالانى ۇيقىسىنان وياتىپ كوسىلە شاپقان تۇلپارلار تۇياعىنىڭ ءدۇرسىلى قۇلاق قۇرىشىن قاندىرادى. م ۇلىك سۇرتىباەۆ بىزدەن الىستاپ بارا جاتسا دا, كەڭ دالانى كوسىلە شاپقان ءدۇبىرى قۇلاق تۇبىنەن كەتپەيتىن سونداي قاناتتى تۇلپارلارىمىزدىڭ ءبىرى.
حالقىنىڭ قاسيەتىن جانىمەن ۇققان ونەرپازعا ءولىم جوق. حاس تۇلپارلار قاشاندا حالىقتىڭ كوكىرەگىندە!..
ءسابيت دوسانوۆ,
جازۋشى, قازاقستان رەسپۋبليكاسى مەملەكەتتىك سىيلىعىنىڭ لاۋرەاتى
الماتى
