قازىرگى تاڭدا وڭىردە بارلىعى 43 ساۋدا بازارى بار. ونىڭ 29-ى جاڭعىرتۋدى قاجەت ەتەدى. ال, بۇعان دەيىن 4 ساۋدا ورنى تولىق, 6 ساۋدا ورنى جارتىلاي جاڭعىرتۋدان وتسە, 4 ورىن قاجەت ەتپەيتىندەردىڭ تىزىمىندە ەكەن. جامبىل وبلىستىق كاسىپكەرلىك جانە يندۋستريالدى-يننوۆاتسيالىق دامىتۋ باسقارماسىنىڭ باسشىسى ارنۇر مۇحامەتجانوۆتىڭ ايتۋىنشا, تاراز قالاسىندا 19 ساۋدا بازارى تىركەلگەن. ونىڭ 17-ءسى امبەباپ, 2-ءى مامانداندىرىلعان ساۋدا نۇكتەلەرى.
بۇگىندە ايماقتاعى 5 ءىرى ساۋدا ورىندارىنا كەشەندى تەكسەرىس جۇرگىزىلىپ جاتىر. وسى ۋاقىتقا دەيىن ساۋدا ورىندارىنداعى پاۆيلون يەلەرىنىڭ شامامەن ۇشتەن ءبىرى سالىق ورگاندارىنا تىركەلمەگەنى انىقتالعان. بازار يەلەرىنەن قولداۋ بولماعاندىقتان تەكسەرىس بارىسىندا بىرقاتار قيىنشىلىقتار كەزدەسۋدە. سوعان وراي رەيدتىك تەكسەرىس ءبىر ايعا سوزىلماق. سونىمەن قاتار, بازاردىڭ تابىسى مەن شىعىسىن بارلاۋ ءۇشىن ارنايى حرونومەتراج جاسالىنباق.
جيىن بارىسىندا اسقار يسابەك ۇلى ەل ىشىندە ايتىلىپ جۇرگەن اڭگىمەلەردىڭ قيسىنسىزدىعىن العا تارتىپ, وڭىردەگى ەشقانداي بازار جابىلمايتىنىن, ونداعى ساۋدا جاساپ كۇن كورىپ وتىرعان حالىقتىڭ جاعدايى ەسكەرۋسىز قالمايتىنىن باسا ايتتى. الداعى ۋاقىتتا ساۋدا ورىندارىنىڭ يەلەرىمەن ارنايى مەموراندۋم جاسالماق. ول قۇجاتتا بازارداعى تازالىق, ءتارتىپ, توتەنشە جاعدايلاردىڭ الدىن-الۋعا ارنالعان ساقتىق شارالارى مەن قۇرىلىس نورمالارىنىڭ ساقتالۋى, وزگە دە تالاپتارعا ساي بولۋى سەكىلدى كوپتەگەن ماسەلەلەر قامتىلماق. بازاردىڭ سىرتقى كەلبەتى, بازارداعى دۇڭگىرشەكتەردەگى تاۋاردىڭ قارجىلاي كولەمىن ناقتىلاپ وتىرۋ سەكىلدى جايتتار دا نازارعا الىنادى. كۇن تارتىبىندەگى ماسەلە بويىنشا جۇمىس توبى قۇرىلىپ, جوسپار بەكىتىلمەك. سونداي-اق وبلىس باسشىسىنىڭ قاتىسۋىمەن تۇراقتى تۇردە باسقوسۋلار ءوتىپ تۇراتىن بولدى.
حاميت ەسامان,
«ەگەمەن قازاقستان»
جامبىل وبلىسى
