مەرەكەلىك ءىس-شارا «نۇر وتان» پارتياسىنىڭ حاتشىسى تامارا دۇيسەنوۆانىڭ قۇتتىقتاۋ سوزىمەن اشىلدى.
«تاۋەلسىز قازاقستان حالقى وسىدان 27 جىل بۇرىن ءوزىنىڭ تۇڭعىش پرەزيدەنتىن سايلاپ, ءوز تاڭداۋىن جاسادى. ەلىمىزدىڭ بۇگىنگى جەتىستىكتەرىنە قاراپ سول كەزدە قازاقستاندىقتاردىڭ قاتەلەسپەگەنىن اڭعارۋعا بولادى. ءبىز ازاتتىقتىڭ 27 جىلىندا ەلباسى ساياساتىنىڭ ارقاسىندا كوپتەگەن جەتىستىكتەرگە جەتتىك. حالىقارالىق ارەنادا دا ءوز ورنىمىزدى ايقىنداپ, ۇلكەن ابىروي-بەدەلگە يە بولدىق. سوندىقتان مەملەكەت باسشىسىنىڭ ەلگە سىڭىرگەن ەڭبەگىن دارىپتەيتىن بۇگىنگى مەرەكەنىڭ ءمانى مەن ماڭىزى زور. «نۇر وتاننىڭ» جاڭا مۇشەلەرىنە پارتيا بيلەتتەرىن تابىستاۋ ءراسىمى وسى ءبىر اتاۋلى كۇنمەن تۇسپا-تۇس كەلىپ وتىر. ءاربىرىڭىز ەل الەۋەتىنىڭ دامۋىنا ءوز ۇلەستەرىڭىزدى قوساسىزدار دەپ سەنەمىن», دەدى ول.
بۇدان ءارى ت.دۇيسەنوۆا ەل يگىلىگى ءۇشىن ەڭبەك ەتىپ جۇرگەن 20 قازاقستاندىققا پارتيا بيلەتتەرىن تابىستادى. ونىڭ ايتۋىنشا, جاس جانە بەلسەندى ازاماتتاردىڭ «نۇر وتان» پارتياسىنا مۇشە بولۋى ولاردىڭ مەملەكەت باسشىسىنىڭ باستامالارىن جۇزەگە اسىرۋعا دايىن ەكەنىن بىلدىرەدى.
«نۇر وتاننىڭ» جاڭا مۇشەلەرى قاتارىندا بەلگىلى جۋرناليست, «قازاق راديولارى» جشس-نا قاراستى «قازاق راديوسى» رەسپۋبليكالىق راديوارناسىنىڭ ديرەكتورى سەرىك ابدۋاليەۆ تە بار. ول ەلباسى كۇنى قارساڭىندا پرەزيدەنت پارتياسىنىڭ مۇشەسى اتانعانىنا قۋانىشتى ەكەنىن ايتتى.
«قازاقتا «ەكى دۇنيەڭ ابات بولسىن, ەكى تويىڭ قابات بولسىن» دەگەن ءسوز بار. سول سياقتى بۇگىن مەن ءۇشىن ەكى بىردەي قۋانىش قاتار كەلىپ وتىر. تۇڭعىش پرەزيدەنتىمىزدىڭ كۇنىندە وسىنداي ۇلكەن قۇرمەتكە بولەنىپ, ەلباسىمىزدىڭ بارلىق ساياساتىن دارىپتەپ, سەنىمدى تىرەگى بولىپ وتىرعان «نۇر وتان» پارتياسىنىڭ مۇشەسى اتانىپ وتىرمىن. بۇل مەن ءۇشىن ۇلكەن ابىروي ءارى زور جاۋاپكەرشىلىك. سوندىقتان الداعى ۋاقىتتا ەلباسى باستامالارىنىڭ جۇزەگە اسۋىنا ءوز ۇلەسىمدى قوسۋ ءۇشىن ايانباي ەڭبەك ەتەمىن», دەدى ول.
ءداستۇر بويىنشا ءار جىل سايىن تۇڭعىش پرەزيدەنت كۇنىنە وراي ەلىمىزدىڭ بارلىق وڭىرىندە پارتياعا قابىلداۋ ءراسىمى وتەدى. بيىل رەسپۋبليكا بويىنشا 2 مىڭنان استام قازاقستاندىق پارتيالىق بيلەتكە يە بولدى.
مارجان تىلەۋبەك,
«ەگەمەن قازاقستان»
