– ءبىز تۇڭعىش پرەزيدەنتتىڭ ءومىرى قاراعاندى وبلىسىمەن بايلانىستى ەكەنىن ماقتان تۇتامىز. تەمىرتاۋ – ونىڭ جاستىق شاعىنىڭ قالاسى. مۇندا نۇرسۇلتان ءابىش ۇلى نازارباەۆ جەتەكشى, كوشباسشى رەتىندە قالىپتاستى, – دەدى ءوڭىر باسشىسى.
كەزدەسۋ كەزىندە ەلباسىنىڭ سەرىكتەستەرى وزدەرىنىڭ ەستەلىكتەرىمەن ءبولىستى. مىسالى, ارداگەر-مەتاللۋرگ ەرمەك تىلەۋباەۆ بىلاي دەدى:
– مەن نۇرسۇلتان نازارباەۆپەن بىرگە وقىدىم. سول كەزدىڭ وزىندە ول كوشباسشىلىق قىرلارىن كورسەتەتىن.
ال ەلباسىنىڭ تاعى ءبىر ۇزەڭگىلەس سەرىگى, ارداگەر مەتاللۋرگ قۋانىش وماشەۆ بىلاي دەپ سىر تارقاتتى:
– تەمىرتاۋ قالاسىنا كەلگەندە نەبارى 17 جاستاعى جەتكىنشەك ەدىم. نۇرسۇلتان نازارباەۆپەن وسى قالادا تانىستىم. ءبىر كۋرستا وقىدىق, بىرگە جۇمىس ىستەدىك. كۇندىز جۇمىستا بولساق, تۇندە وقۋعا باراتىنبىز. اۋىر جۇمىسقا شىداماي, ەلگە قايتىپ كەتىپ جاتقاندار دا بولدى. نەسىن جاسىرايىن, مەنىڭ دە كەتكىم كەلگەن ەدى. الايدا, بۇل ويىمدى نۇرسۇلتان قولدامادى. قايتا «سەن كەتسەڭ, مەن كەتسەم, كىم قالادى؟ قازاق ونەركاسىبىن كىم كوتەرەدى؟», دەپ جىگەرلەندىرىپ, وسىندا قالۋعا كوندىردى. بۇگىندە ارداگەر مەتاللۋرگ بولىپ وتىرعانداردى وسى جەردە قالىپ, ەڭبەك ەتۋگە ۇگىتتەگەن دە ەلباسىمىز بولاتىن.
شارا بارىسىندا تاريحي-مادەني ورتالىق, وبلىستىق مۇراعات جانە ن.ۆ.گوگول اتىنداعى وبلىستىق امبەباپ كىتاپحاناسى بىرلەسىپ شىعارعان «سارىارقا توسىندەگى كەزدەسۋلەر» كىتابىنىڭ تۇساۋكەسەر ءراسىمى ءوتتى. كىتاپتا ەلباسىنىڭ 1990 جىلدان 2018 جىلعا دەيىنگى ارالىقتا قاراعاندى وبلىسىنا جاساعان ساپارلارى تۋرالى گازەت ماقالالارى مەن مۇراعات ماتەريالدارى توپتاستىرىلعان.
– جيناقتىڭ نەگىزگى ماقساتى – جاستارعا ەلباسىنىڭ ءومىرى مەن قىزمەتى تۋرالى تاعىلىمدى اقپارات ۇسىنۋ. مەملەكەت باسشىسىنىڭ 90-شى جىلدان باستاپ, بۇگىنگە دەيىنگى قاراعاندى وبلىسىنا كەلگەن ءار ساپارىن قامتىپ, كىتاپقا ەنگىزدىك, – دەيدى ورتالىقتىڭ عىلىمي زەرتتەۋ ءبولىمىنىڭ باسشىسى دارىبەك كەتەباەۆ.
سونىمەن قاتار پرەزيدەنتتىڭ سۇيىكتى اندەرى جانە نۇرسۇلتان نازارباەۆتىڭ جازعان تۋىندىلارى ورىندالعان مەرەكەلىك كونتسەرت ۇيىمداستىرىلدى.
تاياۋدا اتالعان ورتالىق استانادان جەتكىزىلگەن جادىگەرلەرمەن تولىققان بولاتىن. ولاردىڭ قاتارىندا پرەزيدەنتتىڭ جەكە زاتتارى, باسقا مەملەكەتتەردىڭ باسشىلارى جانە تانىمال ساياسي قايراتكەرلەر تارتۋ ەتكەن سىيلىقتار بار. جاڭادان قوسىلعان جادىگەرلەردىڭ ىشىندە قازاقستان كونستيتۋتسياسىنىڭ ۇلكەن كوركەم باسىلىمىن اتاپ وتۋگە بولادى. سونىمەن قاتار وليمپيادا چەمپيونى الەكساندر ۆينوكۋروۆتىڭ پرەزيدەنتكە سىيلاعان ۆەلوسيپەدى دە ورتالىق تورىنەن ورىن العان. بۇدان بولەك, بۇل جەردە ەلباسىنىڭ جەكە سپورتتىق جابدىقتارىن: تەننيسكە ارنالعان فورماسى مەن راكەتكاسىن دا كورۋگە بولادى.
ايتا كەتۋ كەرەك, بيىل تۇڭعىش پرەزيدەنتتىڭ تاريحي-مادەني ورتالىعى كۇردەلى جوندەۋدەن وتكەن بولاتىن. بۇعان بيۋدجەتتەن 215 ملن تەڭگە ءبولىنىپ, عيماراتتىڭ ءىشى مەن سىرتىنا جوندەۋ جۇمىستارى جۇرگىزىلدى.
قايرات ءابىلدا,
«ەگەمەن قازاقستان»
قاراعاندى وبلىسى, تەمىرتاۋ قالاسى
