زاۋىتتاعى ارىپتەستەرى ونىڭ ەڭبەكقورلىعىنا تاڭدانادى. «مەن پەتر ءپاۆلوۆيچتى تۇڭعىش رەت كورگەندە 37 جاستاعى قىلشىلداعان جىگىت ەدى. زاۋىتتا ۋاقىتشا داعدارىس بولعان جىلدارى باسقا مەكەمەدە جۇمىس ىستەۋگە تۋرا كەلدى. مىنە, 10 جىلدان استام ۋاقىتتان بەرى ۇيرەنشىكتى مەكەنىنە ورالىپ, جاستاردان قالىسپاي ەڭبەك ەتۋدە. وسى جىلدار ىشىندە قاريانىڭ بىرەۋگە داۋىس كوتەرگەنىن ەستىمەپپىن. قول قۋسىرىپ وتىرعان كەزىن دە كورمەپپىن. قاشان كورسەڭ, ستانوك باسىنان شىقپايدى. ەڭبەكقورلىعىن كورمەيسىز بە, كوندەنساتور زاۋىتىنان وسىندا اۋىسقاننان كەيىن ءوزى جۇمىس ىستەيتىن ۇلكەن ستانوكتىڭ جانىنا «جۇمىس اراسىندا بوسقا وتىرمايىن, ءىشىم پىسپاسىن» دەپ تاعى دا ءبىر شاعىن ستانوك قويىپ الدى», - دەيدى «گيدروستال» جشس ديرەكتورى اناتولي سينيتسىن.
راسىندا, پەتر شينكارەۆتى توقسانعا قيعىڭىز كەلمەيتىندەي. ءجۇرىسى شيراق. ءازىلىن دە تاستامايدى. ءالى كۇنگە دەيىن كولىكتى ءوزى جۇرگىزەدى. «كوپ نارسە ادامنىڭ مىنەزىنە بايلانىستى. مەن ءوزىم ەشكىمنەن ەشتەڭەنى جاسىرماي ەل الدىندا, اشىق جۇرگەندى جاقسى كورەمىن. ءۇيىمدى دە ەلدىڭ كوز الدىندا سالدىم. جۇرتتى كورىپ جۇرەيىن, جۇرت مەنى كورسىن دەپ. ارينە, 90 جاسقا كەلىپ, ستانوك باسىندا تۇرعانىم زاۋىتتاعى كەيبىر ادامدارعا ۇنامايتىن دا شىعار. بالكىم, جاستاردىڭ كوزىنە سۇيەل بوپ تا كورىنەتىن شىعارمىن» دەيدى ءسوزىن ازىلگە سۇيەگەن قاريا.
توقسان جاسقا كەلسە دە, توپتان قالماي, تەمىر جونىپ جۇرگەن پەتر شينكارەۆ تۋرالى بەكەرگە ايتىپ وتىرعان جوقپىز. تۇڭعىش پرەزيدەنت كۇنى قارساڭىندا قازاقستان ماشينا جاساۋشىلار وداعىنىڭ ديرەكتورى ريشات اسانسەيىتوۆ استانادان ارنايى كەلىپ, ەڭبەكقور قارتقا «قۇرمەتتى ماشينا جاساۋشى» توسبەلگىسىن ارىپتەستەرى الدىندا سالتاناتتى تۇردە تاپسىرىپ, العىسىن ايتتى. ء«بىز نەگىزى ءوز سالامىزداعى ۇزدىك قىزمەتكەرلەردى, ەڭبەگى سىڭگەن ارداگەرلەردى جىل سايىن قىركۇيەكتىڭ سوڭعى جەكسەنبىسىندە, ماشينا جاساۋشىلار كۇنىندە ماراپاتتايمىز. وسكەمەندە 90 جاستاعى وسىنداي كىسىنىڭ بار ەكەنىن, ءالى دە ستانوك باسىندا تۇرعانىن بىلگەندە مەكەمە باسشىلىعىنا ينۆەستيتسيالار جانە دامۋ مينيسترلىگىنە ۇسىنىس حات جازۋىن وتىندىك. مينيسترلىك ۇسىنىسىمىزدى قولدادى. ارينە, 90 جاستا ستانوكتا تۇرۋ وڭاي شارۋا ەمەس. بۇل - جاستارعا ۇلگى بولارلىق دۇنيە دەپ ويلايمىز. جاسىراتىنى جوق, كوبىمىز ستانوكتا تۇرماق تۇگىلى, وسى جاسقا جەتسەك دەپ ارماندايمىز», - دەدى ول.
ازامات قاسىم,
«ەگەمەن قازاقستان»
وسكەمەن
