مەكەمە باسشىسى تولەۋ ءاشىرحاننىڭ ايتۋىنشا, ەلباسى تاپسىرماسىنا سايكەس, كوممۋنالدىق قىزمەتتىڭ قۇنى 136-دان 103,88 تەڭگەگە نەمەسە 23,88 پايىزعا ارزانداتىلعان. سونداي-اق, تومەن جالاقى الاتىن 60-تان استام ازاماتتىڭ ەڭبەكاقىسىن كوتەرۋ ماقساتىندا مەكەمە بيۋدجەتىنەن 1 ملن. 600 مىڭ تەڭگە قارالىپ وتىر. قالانى جىلۋمەن قامتاماسىز ەتەتىن مەكەمە 2011 جىلى قۇرىلعان. سەرىكتەستىكتە 395 ادام جۇمىس ىستەيدى. كەنتاۋ قالاسىنا ارنايى جۇمىس ساپارىمەن بارعان تۇركىستان وبلىسىنىڭ اكىمى جانسەيىت تۇيمەباەۆ حالىققا ساپالى قىزمەت كورسەتۋ باعىتىندا ءتيىستى شارالاردى دەر كەزىندە اتقارۋدى تاپسىردى.
سونىمەن قاتار وبلىس اكىمى ورانعاي اۋىلدىق وكرۋگىندەگى ء«ال-بەرەكە» اۋىل شارۋاشىلىعى وندىرىستىك كووپەراتيۆىنىڭ تىنىس-تىرشىلىگىمەن تانىستى. كوكونىس جانە جەمىس-جيدەكتەردى قايتا وڭدەۋ, ساقتاۋ جانە دايىن ءونىمدى وتكىزۋمەن اينالىساتىن كووپەراتيۆ جىلىنا 450 مىڭ ليتر جەمىس-جيدەك شىرىنىن, 1500 توننا كوكونىس مارينادىن, 1200 توننا تومات, الما, اسقاباق ەزبەلەرىن دايىنداۋعا قاۋقارلى. كووپەراتيۆتە 30 ادام تۇراقتى جۇمىسپەن قامتىلعان. بيىلعى 11 ايدا جالپى سومماسى 292 ملن. تەڭگەنى قۇرايتىن 1950 توننا تاۋار وندىرگەن, ونىڭ 1200 تونناسىن ىشكى نارىققا وتكىزسە, 750 تونناسىن رەسەيگە ەكسپورتتاعان.
عالىمجان ەلشىباي,
«ەگەمەن قازاقستان»
تۇركىستان وبلىسى
