جازدىڭ سوڭعى كۇندەرى «استانا ىرگەسىنەن وسىدان 2200 جىل بۇرىن سالىنعان كونە قورعان تابىلدى» دەپ سۇيىنشىلەي حابارلانعان بولاتىن. استانا قالاسى مادەنيەت جانە سپورت باسقارماسى مەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ك.ا.اقىشەۆ اتىنداعى ارحەولوگيا عىلىمي-زەرتتەۋ ينستيتۋتى بىرلەسىپ قولعا العان زەرتتەۋ جۇمىستارى كەزىندە قورعاننىڭ جوعارعى قاباتىنداعى باستاپقى جەتى زيرات اشىلىپ, زەرتتەلگەن ەدى. تاستى ساۋىت ۇيىندىلەرىمەن قاپتالعان قورعان بيىكتىگى – 3,5 مەتر بولسا, ديامەترى 50 مەترگە جەتەقابىل. ەندى سول ساق داۋىرىندەگى پاتشالىق قورعاندارىنان تابىلعان كونە جادىگەرلەردى كوزبەن كورۋگە تاماشا مۇمكىندىك تۋىپ وتىر.
ك.ا.اقىشەۆ اتىنداعى ارحەولوگيا عىلىمي-زەرتتەۋ ينستيتۋتىنىڭ ديرەكتورى, ارحەولوگيالىق توپتىڭ جەتەكشىسى مارال حابدۋلينانىڭ ايتۋىنشا, ساۋلەتى مەن قۇرىلىسى قورىمنىڭ 2200 جىل بۇرىن سالىنعانىن كورسەتەدى. ءبىر وكىنىشتىسى, قورىم تىپ-تيپىل تونالعان, ايتسە دە ادامزات تاريحىنداعى اسا ماڭىزدى كەزەڭ سانالاتىن ەرتە تەمىر داۋىرىندەگى قورعاندار جۇيەسىنە قاتىستى ءبىرشاما ماڭىزدى اقپارات بەلگىلى بولعان. «ۇيىلگەن توپىراقتان جەتى كىرە بەرىس جەرلەۋ ورىندارى تابىلدى. جەرلەۋ ءراسىمىن زەرتتەي كەلە, ولاردىڭ ورتا عاسىرعا تيەسىلى ەكەنى بەلگىلى بولدى. تۇركى داۋىرىندە ەر ادامدى جەرلەۋ راسىمىندەگى ءبىر ەرەكشەلىك كۇمىس سىرعالار مەن بەلبەۋ قوسا تابىلىپ وتىر», دەيدى ول.
ايا ءومىرتاي,
«ەگەمەن قازاقستان»
