نۇرسۇلتان نازارباەۆتىڭ سىرتقى ساياساتتا, اسىرەسە ورتالىق ازياداعى كورشىلەس ەلدەرمەن ماسەلەلەردى شەشۋدە اشىقتىعىن ءارى شەشىمدىلىگىن ەرەكشە اتاپ وتكەن ءجون. ديپلوماتيا سالاسىنداعى جاسامپاز ىستەرى قازاقستان رەسپۋبليكاسى پرەزيدەنتىنىڭ كورەگەندىگىن ايگىلەيدى. مىسالى, ورتالىق ازيا ەكونوميكالىق دوستاستىعى ونىڭ جەكە باستاماسى بويىنشا قۇرىلىپ, قازاقستان, قىرعىزستان, وزبەكستان جانە تاجىكستان اراسىنداعى ساۋدا-ەكونوميكالىق قارىم-قاتىناستاردىڭ قۇقىقتىق نەگىزدە ىسكە اسۋىنا زور ىقپال ەتتى. ايماقتاعى ءۇردىستى ءجىتى تۇسىنگەن قازاقستان پرەزيدەنتىنىڭ باستاماسى بويىنشا بۇل ماسەلەلەر مەملەكەت باسشىلارى دەڭگەيىندە شەشىمىن تاپتى.
سونىمەن قاتار نۇرسۇلتان نازارباەۆ باستاماسىمەن ەۋرازيا اۋماعىندا ءىرى ساياسي فورۋم – ءبىرىنشى «ەۋرازيا – 2000» حالىقارالىق ءسامميتى ءوتتى.
ونىڭ باستاماسى بويىنشا 2002 جىلى 4 شىلدەدە الماتىدا رەسەي, قىتاي, ءۇندىستان, پاكىستان, تۇركيا, قىرعىزستان, تاجىكستان, موڭعوليا, اۋعانستان جانە قازاقستان مەملەكەت باسشىلارىنىڭ قاتىسۋىمەن ازيالىق وڭىردە بەيبىتشىلىك پەن كەلىسىمدى ساقتاۋ جونىندە سامميت وتكىزىلدى. اتالعان فورۋمنىڭ قورىتىندىسى بويىنشا الەمدىك ماندەگى تاريحي قۇجات قابىلداندى. الەمدە بەيبىتشىلىكتى ساقتاۋعا شاقىرعان الماتى فورۋمىنىڭ شەشىمى مەن الەمدىك قوعامداستىققا ۇندەۋى حالىقارالىق ۇيىمداردا قىزۋ تالقىلاندى. مۇنداي ءىرى ساياسي فورۋمدى وتكىزۋ جانە ونىڭ قورىتىندىلارى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ الەمدىك ارەناداعى بەدەلىن نىعايتىپ قانا قويماي, ارتتىرا ءتۇستى.
سىرتقى ساياساتتا نۇرسۇلتان نازارباەۆتىڭ الەمدىك دەڭگەيدە دىندەر اراسىندا بەيبىتشىلىك پەن كەلىسىمدى ساقتاۋعا جانە نىعايتۋعا ۇمتىلىسى بايقالۋدا. نۇرسۇلتان نازارباەۆتىڭ باستاماسى بويىنشا استانادا ءار ءۇش جىلدا ءبىر رەت الەمدىك جانە ءداستۇرلى دىندەر كوشباسشىلارىنىڭ سەزى ءوتىپ تۇرادى. قازاقستان رەسپۋبليكاسىنىڭ پرەزيدەنتى جۇرگىزىپ وتىرعان تولەرانتتىلىق ديالوگىن ساقتاۋ ساياساتىنىڭ دۇرىستىعىن ءومىردىڭ ءوزى دالەلدەپ وتىر.
سونداي-اق بۇۇ, يۋنەسكو, ەقىۇ, تمد, شىۇ سىندى حالىقارالىق ۇيىمدار جيىندارىندا سويلەگەن سوزدەرىندە نۇرسۇلتان نازارباەۆ قاشاندا ەكونوميكا, حالىقارالىق قاۋىپسىزدىك, مادەني-تاريحي مۇرانى ساقتاۋ سياقتى جاھاندىق ماسەلەلەردى شەشۋگە ۇمتىلادى. مۇنىڭ ءبارى ونىڭ كوشباسشىلىق قاسيەتىنىڭ جارقىن دالەلى. نۇرسۇلتان نازارباەۆ – الەمدىك دەڭگەيدەگى قايراتكەر.
اسان ورمۋشەۆ,
كۋۆەيت حالىقارالىق ۋنيۆەرسيتەتىنىڭ رەكتورى,
دوكتور, پروفەسسور
