مەملەكەتتىك يندۋستريالىق-يننوۆاتسيالىق دامۋ باعدارلاماسى اياسىندا ىسكە قوسىلعان «DALA-FRUIT.KZ» جشس-ندە باستاپقىدا 83 ادام تۇراقتى جۇمىسپەن قامتىلسا, كومپانيا جۇمىسىن باستاعان ءۇش جىلدا ونىڭ سانى 277 ادامعا جەتكەن. جالپى كولەمى 106,5 گەكتار بولاتىن سەرىكتەستىك باۋىنا 215 مىڭ تۇپتەن استام جەمىس اعاشتارى ەگىلگەن. مۇندا المانىڭ ءتۇر-ءتۇرى مەن شيەنىڭ «ستەنلەي» اتتى شەتەلدىك سۇرىپتارىن كەزدەستىرۋگە بولادى. ياعني, 1 گەكتەر جەرگە شامامەن 2500 ءتۇپ اعاش كوشەتى وتىرعىزىلعان. زاماناۋي تەحنيكامەن جابدىقتالعان باۋ تامشىلاتىپ سۋارۋ جۇيەسى ارقىلى جۇمىس ىستەيدى.
اقپاراتتىق توپ وكىلدەرى مەكەمەنىڭ المادان شىرىن شىعاراتىن تسەحىن, شەتەل نارىعىنا ساپالى ءونىم دايىندايتىن قويماسىن ارالاپ, كاسىپكەر بولاتبەك اليەۆتىڭ شەتەلدىك تۇقىم سۇرىپتاۋداعى وزىق ۇلگىلەر مەن تەحنولوگيالاردى كادەگە جاراتقان يگى باستاماسىنا ريزاشىلىعىن ءبىلدىردى.
مۇنان سوڭ سايرامداعى شەتەل نارىعىنا ەت ەكسپورتتايتىن «نۇرىم گرۋپپ» بورداقىلاۋ الاڭىندا بولعان ۆەدومستۆو باسشىسى سويىس مالدىڭ باسىن كوبەيتىپ, ءىرى شارۋا قوجالىقتارىن, ونىڭ ىشىندە قوي بورداقىلاۋ الاڭدارىن ارتتىرۋدى تاپسىردى.
«قازىردىڭ وزىندە قىتاي نارىعى كوپتەگەن اۋىلشارۋاشىلىق ونىمدەرىنە (بالىق ءونىمى, اسىل تۇقىمدى جىلقىلار, مۇزداتىلعان قوي ەتى, بال, بيداي, بيداي كەبەگى, سويا بۇرشاعى, سويىلاتىن جىلقىلار, راپس كۇنجاراسى, سيىر ەتى, جوڭىشقا, ۇن, وسىمدىك مايى) ەندەپ كەلەدى. يران تاراپىمەن قويدى, توڭازىتىلعان ءارى سالقىنداتىلعان قوي ەتىن, سيىر ەتىن, تاعامدىق جۇمىرتقانى جەتكىزۋگە ارنالعان ۆەتەرينارلىق تالاپتار كەلىسىلدى. ال بيىل تىرىدەي ءىرى قاراعا قويىلاتىن تالاپتاردى كەلىسۋ جوسپارلانىپ وتىر. سونداي-اق ءىرى قارانى جانە ۇساق مالدى ساۋد ارابياسى مەن بىرىككەن اراب امىرلىكتەرىنە, ەت پەن ەت ونىمدەرىن, تاۋىق جۇمىرتقاسىن بىرىككەن اراب امىرلىكتەرىنە جەتكىزۋگە قويىلعان شەكتەۋلەر الىندى. ەت جانە ءسۇتتى ءىرى قارا مال, قۇس, سۋارمالى جەرلەردى دامىتۋ بويىنشا ۇزاق مەرزىمدى سالالىق باعدارلامالار ازىرلەندى. سالالىق باعدارلامالاردىڭ شارالارى مەن كورسەتكىشتەرى ايماقتىق باعدارلامالاردا كورىنىس تابادى. ءىرى ينۆەستيتسيالىق جوبالاردى ىسكە اسىرۋ باستالدى. ۇلتارالىق كومپانيالاردى ەكسپورتتىق نارىقتارمەن قازاقستاننىڭ اگروونەركاسىپ كەشەنىنە تارتۋ ولاردىڭ كاپيتالعا عانا ەمەس, سونداي-اق جاڭا ءوندىرىس پەن تەحنولوگيالاردى ينۆەستيتسيالاۋىنا, جاڭا باسقارۋ تاسىلدەرىن ەنگىزۋگە جانە تانىمال الەمدىك برەندتەردىڭ بەلگىسىمەن اۋىل شارۋاشىلىعى ونىمدەرىن ەكسپورتتاۋعا مۇمكىندىك بەرەدى», دەدى ءو.شوكەەۆ.
«نۇرىم گرۋپپ» كەشەندى مال بورداقىلاۋ الاڭى ماماندارىنىڭ ايتۋىنشا, جىل باسىنان بەرى وزبەكستانعا 800 توننا, يرانعا 200 توننا ەت جونەلتىلدى.
اقپاراتتىق-ناسيحاتتىق توپتىڭ ساپارى شىمكەنت قالاسىندا قورىتىندىلاندى. ءو.شوكەەۆ ەلباسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىن ءتۇسىندىرۋ ماقساتىندا قالا اكتيۆىمەن كەزدەستى.
بۇگىندە جولداۋدا كورسەتىلگەن مىندەتتەردى ورىنداۋ ماقساتىندا شىمكەنت قالاسىندا بىرقاتار جۇمىس اتقارىلىپ جاتقانىن ايتقان قالا باسشىسى عابيدوللا ءابدىراحىموۆ الداعى ۋاقىتتا «شىمكەنت» اگرويندۋستريالىق ايماعى قۇرىلاتىنىن جەتكىزدى. جوبادا اگرارلىق سەكتوردى ەكونوميكانىڭ جاڭا قوزعاۋشى كۇشتەرىنە اينالدىرۋ قاجەتتىگى ەسكەرىلەتىن بولادى. وعان 20 ملرد تەڭگە جەكە ينۆەستيتسيا تارتىلىپ, 40 كاسىپورىن اشۋ جوسپارلانۋدا. ناتيجەسىندە شىمكەنتتە بۇكىل وڭتۇستىكتە وسەتىن اۋىلشارۋاشىلىق ءونىمىن وڭدەيتىن كلاستەر قۇرىلىپ, 2022 جىلى اۋىلشارۋاشىلىق ءونىمىنىڭ كولەمى 67,5 ملرد تەڭگەگە جەتكىزىلمەك.
«اۋىلشارۋاشىلىق وندىرىستىك كەشەنىن قولداۋدىڭ جوسپارلانعان شارالارى ءۇش بلوكقا ءبولىنۋى مۇمكىن: جۇيە, يندۋستريا جانە ناقتى ينۆەستيتسيالىق جوبالار. ونەركاسىپ مەملەكەتتىك تەتىكتەر جەتىلدىرىلىپ, مەملەكەتتىك قولداۋ كولەمى ارتادى. سونداي-اق ءتيىمسىز سۋبسيديالاردى قىسقارتۋ جوسپارلانۋدا. بوسايتىن قاراجات نەسيەلەر مەن ليزينگ بويىنشا سىياقى مولشەرلەمەسىن, ءبىرىنشى كەزەكتە فەرمەرلەردى تەحنيكالىق جانە تەحنولوگيالىق قايتا جاراقتاندىرۋعا ارنالعان ينۆەستيتسيالىق سۋبسيديالاردى ازايتۋ ءۇشىن پايدالانىلاتىن بولادى», دەدى سالا باسشىسى.
نۇرشات توكەن,
«ەگەمەن قازاقستان»
تۇركىستان وبلىسى
