مۇنايلى ايماق الەمنىڭ 50-دەن استام ەلىمەن تۇراقتى قارىم-قاتىناس ورناتقان, سونىڭ ناتيجەسىندە 1 مىڭنان استام بىرلەسكەن جانە شەتەل كاسىپورىندارى قۇرىلىپ, جۇمىس ىستەپ جاتىر. قازان ايىندا اتىراۋعا جۇمىس ساپارىمەن كەلگەن ينۆەستيتسيالار جانە دامۋ ۆيتسە-ءمينيسترى ارىستان قابەكەنوۆ: «ەلىمىزدىڭ ينۆەستيتسيالىق ساياساتى ينۆەستورلارعا بارىنشا قولايلى جاعداي جاساۋعا باعىتتالعان. وتكەن جىلى 20,8 ملرد اقش دوللارى كولەمىندە ينۆەستيتسيا تارتىلدى. اسىرەسە وڭدەۋ ونەركاسىبىنە سالىنعان قاراجات ەسەلەپ ارتتى. 2020 جىلعا دەيىن 658 ينۆەستيتسيالىق جوبا جۇزەگە اسۋى ءتيىس», – دەگەن ەدى.
يندۋستريالاندىرۋدىڭ ەكىنشى بەسجىلدىعىندا دا قولعا الىنعان جوبالاردىڭ يگىلىگىن ەل كورىپ وتىر. ەندىگى ماقسات – ەلىمىزدە كەلەر جىلى وڭدەۋ ونەركاسىبى ەكسپورتىنىڭ قۇندىق كولەمى ءوسىمىن – 19, ەڭبەك ونىمدىلىگىن 22 پايىزعا ءوسىرىپ, نەگىزگى كاپيتالعا سالىناتىن ينۆەستيتسيا كولەمىن 4,5 ترلن تەڭگەگە جەتكىزۋ. بۇل باعىتتا اتىراۋدا قولعا الىنىپ جاتقان جۇمىستاردىڭ اۋقىمى كەڭ. نەگىزىنەن مۇناي-گاز ءوندىرۋ سالاسى باسىمدىققا يە بولعانىمەن, قۇرىلىس, ماشينا جاساۋ, جەڭىل ونەركاسىپ, تاماق ونىمدەرىن ءوندىرۋ, حيميا ونەركاسىبى بويىنشا دا ىلكىمدى ىستەر بار. وڭىردە باسقا سالالاردا دا جاقسى جوبالار جۇزەگە اسۋدا.
شەتەل ينۆەستورلارى اتىراۋ وبلىسىنا ەرەكشە قىزىعۋشىلىق تانىتادى. وبلىستىق ءماسليحاتتىڭ كەزەكتى سەسسياسىندا ايماق باسشىسى نۇرلان نوعاەۆ 2019 جىلعا دەيىن 31 ينۆەستيتسيالىق جوبا ىسكە اسىرىلىپ, 3635 جاڭا جۇمىس ورنىن اشۋ كوزدەلىپ وتىرعانىن حابارلادى. بۇل ءوز كەزەگىندە ءوڭىردىڭ وندىرىستىك الەۋەتىنە تىڭ سەرپىن بەرىپ, جۇمىسسىزدىق دەڭگەيىن تومەندەتۋگە ىقپال ەتەدى.
وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى ايقىن ەلەۋسىزوۆتىڭ ايتۋىنشا, بيىل قاڭتار-قىركۇيەك ايلارىندا نەگىزگى كاپيتالعا سالىنعان ينۆەستيتسيالار 2 692,1 ملرد تەڭگە بولعان. جىل سايىن ءوڭىر ەكونوميكاسىنا ينۆەستيتسيا تارتۋ ماقساتىندا «ATYRAU INVEST» حالىقارالىق ينۆەستيتسيالىق بيزنەس-فورۋمى وتەدى. سونداي-اق, «Global Oil&Gas Atyrau» سولتۇستىك كاسپي ايماقتىق مۇناي جانە گاز كورمەسى جانە «Atyrau Build» سولتۇستىك كاسپي ايماقتىق قۇرىلىس جانە ينتەرەر كورمەسىن دە جىل سايىن ۇيىمداستىرۋ داستۇرگە اينالدى.
ء«بىر تەرەزە» قاعيداسى بويىنشا اقپاراتتىق-تالداۋ جانە سەرۆيستىك قولداۋ, وتاندىق جانە شەتەل ينۆەستورلارىنا ساپالى جانە جەدەل كومەك كورسەتۋ ماقساتىندا وڭىردە «اتىراۋ Innovations» جشس قۇرىلدى. «Kazakh Invest» ۇك» اق» دا وسى باعىتتا قىزمەت كورسەتىپ وتىر. ءوڭىردىڭ ينۆەستيتسيالىق قىزمەتىنە بايلانىستى پروبلەمالىق ماسەلەلەردى جەدەل شەشۋ ءۇشىن اتىراۋ وبلىسى اكىمدىگىمەن «ينۆەستورلار تارتۋ جانە ينۆەستيتسيالىق احۋالدى جاقسارتۋ جونىندەگى» وڭىرلىك كەڭەس قۇرىلعان. كەڭەس قۇرامىندا مەملەكەتتىك ورگانداردىڭ, قوعامدىق بىرلەستىكتەردىڭ باسشىلارى, شەتەلدىك كومپانيالار, شەتەل ەلشىلىكتەرىنىڭ وكىلدەرى بار. مۇنىڭ ءبارى – اتىراۋداعى ينۆەستيتسيالىق احۋالدىڭ تۇراقتىلىعىن قامتاماسىز ەتۋگە باعىتتالعان شارالار.
باقىتگۇل باباش,
«ەگەمەن قازاقستان»
اتىراۋ
