قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ « ۇلى دالانىڭ جەتى قىرى» اتتى ماقالاسى – «رۋحاني جاڭعىرۋ باعدارلاماسىنىڭ» جالعاسى ءارى قوعامدىق تۇتاستىق پەن بىرلىككە باستاۋ بولاتىن تاريحي سانانى جاڭعىرتۋ تۇرعىسىنداعى مازمۇنى مەن ءمانى تەرەڭ وي-تولعام. ماقالادا پرەزيدەنت ۇلى دالانىڭ ماقتانىش ەتە الاتىن جەتى ەرەكشە قىرىن اتاپ وتەدى. «جەتى» – بۇل الەم حالقىنىڭ بارلىعىنا اسا ءبىر قۇرمەتتى ماعىناعا يە رامىزدىك سيپاتتاعى سان. جاراتۋشى دۇنيەنى جەتى كۇن ىشىندە جاراتتى. جەتى كۇن – ۋاقىتتى ولشەۋدىڭ ەڭ قاراپايىم ءارى تابيعاتپەن (كۇننىڭ اتۋى مەن باتۋى ارالىعىنداعى مەجە) ۇندەسكەن كورىنىسى.
بۇگىنگى شارتاراپتاعى ءاربىر قوعامىنىڭ كوكىرەگى وياۋ, كوڭىلى تەرەڭ ازاماتتارىنىڭ ءتىلىنىڭ ۇشىندا «الەمنىڭ جەتى كەرەمەتى» دەگەن تىركەس قالىپتاسقانى بەلگىلى. ۇلى دالانىڭ ەرەكشە جەتى قىرىن تىلگە تيەك ەتە وتىرىپ, پرەزيدەنت قازاقستاننىڭ تاريحىن تەرەڭ زەردەلەۋگە ۇندەيدى جانە ونى ەل-جۇرتتىڭ رۋحاني يگىلىگىنە پراكتيكالىق تۇرعىدا اينالدىرۋ ماقساتىندا ءىرى, ماڭىزدى جوبالاردى ۇسىنىپ وتىر. ول جوبالار «ارحيۆ – 2025», « ۇلى دالانىڭ ۇلى ەسىمدەرى», «تۇركى الەمىنىڭ گەنەزيسى», « ۇلى دالانىڭ ەجەلگى ونەر جانە تەحنولوگيالار مۋزەيى», «دالا فولكلورى مەن مۋزىكاسىنىڭ مىڭ جىلى», «تاريحتىڭ كينو ونەرى مەن تەلەۆيزياداعى كورىنىسى» دەپ اتالادى. بۇلاردى جۇزەگە اسىرۋ رۋحانيات سالاسىن جاڭا ورلەۋ ساتىسىنا جەتەلەيتىنى انىق.
قازاقتىڭ ۇلى دالاسى جانە سول كەڭىستىكتى مەكەندەگەن ۇلت پەن ۇلىستار دۇنيە ءجۇزىنىڭ ماتەريالدىق ءھام رۋحاني مۇراسىنا زور ۇلەس قوستى. ونىڭ نەگىزى تۇپقازىعى كوشپەلى وركەنيەت پەن وتىرىقشىلىق مادەنيەتتىڭ توعىسىندا جاسالدى. كوشپەلىلەر يمپەرياسىنىڭ الەم كارتاسىنا ەلەۋلى وزگەرىستەر ەنگىزگەنى, ماتەريالدىق مادەنيەت پەن رۋحاني مۇرالاردىڭ باي قازىناسىن قالدىرعانى تاريحتا ءمالىم. جىلقى ۇستاۋ مەن ونى ادام يگىلىگىنە پايدالانۋ مادەنيەتى شەڭبەرىندەگى تەحنولوگيالىق جەتىستىكتەردى ادامزات قوعامى سان-مىڭداعان جىلدار بويى قولدانىپ كەلدى, ونى ءارتۇرلى مازمۇندا بايىتا ءبىلدى. ال تۇركىلەردىڭ, سونىڭ ىشىندە قازاق حالقىندا فولكلورلىق مۇرالاردىڭ, سونىمەن قاتار مۋزىكالىق ونەردىڭ مول قازىناسى ساقتالىپ بۇگىنگى زامانعا جەتتى.
ۇلى دالانىڭ كوپ عاسىرلىق رۋحاني ءھام ماتەريالدىق مۇرالارىن زاماناۋي تەحنولوگيالار مەن جاڭا قالىپتاسىپ جاتقان تسيفرلى وركەنيەتتىڭ سۇرانىمىنا ساي قايتا جاڭعىرتا ءبىلۋ, ونى ەل جۇرتتىڭ پايداسىنا جاراتا ءتۇسۋ – ەلىمىزدىڭ رۋحاني جانە تەحنولوگيالىق تۇرعىدان دامۋىنا جاڭا ەكپىن قوساتىنى ءسوزسىز.
الماسبەك ابسادىق,
فيلولوگيا عىلىمدارىنىڭ دوكتورى, پروفەسسور,
ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ «رۋحاني جاڭعىرۋ» جوبالىق ءوفيسىنىڭ جەتەكشىسى
