وڭىردەگى اۋىل شارۋاشىلىعى دامىعان, استىقتى فەدوروۆ اۋدانى 90 جىلدىعىن اتاپ ءوتتى. وسى مەرەيلى مەرەكەگە بايلانىستى سالتاناتتى جيىندا اۋدان اكىمى ءتاۋبا يساباەۆ ءوڭىر تاريحىن, اعا ۇرپاقتىڭ ەرلىگى مەن ەڭبەگىن بايانداپ بەردى. 1928 جىلى قۇرىلعان اۋداننىڭ باي تاريحى بار. بۇل ءوڭىر ۇجىمداستىرۋدىڭ, اشتىقتىڭ, ساياسي قۋعىن-سۇرگىننىڭ, سوعىستىڭ الاپات قاسىرەتى مەن قيىندىقتارىن باستان كەشتى. العاشقى كەڭەستىك شارۋاشىلىقتار قۇرىلدى, قارا توپىراقتى وڭىردە وتكەن عاسىردىڭ 50-ءشى جىلدارى تىڭ جانە تىڭايعان جەرلەر يگەرىلدى.
ەلدىڭ ءال-اۋقاتى جاقساردى. اۋدان قازاقستاننىڭ تاۋەلسىزدىگىن العان جىلداردان كەيىن دە اۋىل شارۋاشىلىعىن دامىتۋعا بارىنشا اتسالىسىپ كەلەدى. مۇندا قازىر جاڭا تەحنولوگيالاردى, وزىق تاجىريبەلەردى پايدالانىپ, ەگىن جانە مال شارۋاشىلىعىن دامىتىپ وتىرعان شارۋاشىلىقتار جەتكىلىكتى. فەدوروۆ اۋدانىنىڭ ديقاندارى 11 ميلليون توننا استىق ءوندىردى, بيىل دا مەرەكەلى جىلى ولار 500 مىڭ توننا استىق جيناپ, گەكتار اينالىمىن 16,5 تسەنتنەرگە جەتكىزدى.
سالتاناتتى جيىنعا وبلىس اكىمى ارحيمەد مۇحامبەتوۆ قاتىسىپ, اۋدان تۇرعىندارىن مەرەكەمەن قۇتتىقتادى.
«ەلباسىنىڭ « ۇلى دالانىڭ جەتى قىرى» اتتى ماقالاسىندا: «ۋاقىت پەن كەڭىستىكتىڭ كوكجيەگى توعىسقان كەزدە ۇلت تاريحى باستالادى» دەگەن بولاتىن. فەدوروۆ اۋدانىنىڭ تاريحى دا ەل, ءوڭىر تاريحىنىڭ ءبىر بولشەگى. فەدوروۆ –وبلىستاعى ەكونوميكاسى قارقىندى دامىپ وتىرعان اۋداننىڭ ءبىرى. جىل سايىن اۋىل شارۋاشىلىعى, ءوندىرىس, وڭدەۋ ونەركاسىبى ءوسىپ كەلەدى. مەملەكەتتىك باعدارلامالارجۇزەگە اسىپ جاتىر. اۋدان ىرگەتاسىن قالاعان اتالار رۋحىنا باس يەمىز. وسى وڭىردە تۋىپ وسكەن كەڭەس وداعىنىڭ باتىرى گەورگي كراۆتسوۆ, يۆان جۋربا, 12 سوتسياليستىك ەڭبەك ەرلەرى, اكادەميكتەر مەن مەملەكەتتىك قىزمەت ارداگەرلەرى تەك فەدوروۆتىقتاردىڭ عانا ەمەس, ەلىمىزدىڭ, ۇلتىمىزدىڭ ماقتانىشتارى.بۇگىن دە اۋداننىڭ ەڭبەك تورىسىنداي مۇعالىمدەرىن, كاسىپكەرلەرىن, ديقاندار مەن مالشىلارىن, سپورتشىلار مەن ونەر ادامدارىن ماقتانىش تۇتامىز» دەدى ارحيمەد بەگەجان ۇلى.
فەدوروۆ اۋدانىندا ەكونوميكا جىلدان جىلعا دامىپ, ادامداردىڭ ءال-اۋقاتى جاقسارىپ كەلەدى. جاقىندا عانا تاۋلىگىنە 50 توننا تازارتىلعان وسىمدىك مايىن وندىرەتىن, ءونىمىن ەكسپورتتايتىن قۋاتتى ماي زاۋىتى ىسكە قوسىلدى. اۋدان كولەمىنە گاز قۇبىرى كەلدى. وسىنىڭ بارلىعى دا فەدوروۆ اۋدانىنىڭ گۇلدەنە بەرەتىنىنە كەپىل بولادى.
سالتاناتتى جيىندا فەدوروۆتىقتار ە.ومىرزاقوۆ اتىنداعى وبلىستىق فيلارمونيا ارتىستەرى مەن اۋدان ونەرپازدارىنىڭ كۇشىمەن قويىلعان كونتسەرتتى تاماشالادى.
ءنازيرا جارىمبەت,
«ەگەمەن قازاقستان»
قوستاناي
