«بۇگىنگى فورۋمدى ەلباسىنىڭ باستامالارىن قولدايتىن ەلىمىزدىڭ جارقىن بولاشاعىنا سەنەتىن ازاماتتاردىڭ فورۋمى دەسەك تە بولادى. بۇل مەملەكەتتىك قوعام ءۇشىن دە ازاماتتىق سەكتور ءۇشىن دە ۇلكەن وقيعا. مۇنداي كەزدەسۋلەر حالىقتى قاناتتاندىرىپ, ولاردىڭ قىزمەتتەرىنە, جوبالارىن جۇزەگە اسىرۋعا سەپتىگىن تيگىزەدى دەپ ويلايمىن. پرەزيدەنتتىڭ باستامالارىن ىسكە اسىرۋعا قازاقستاننىڭ ازاماتتىق سەكتورىنىڭ ءرولى اسا ماڭىزدى. ەلباسى ءوزىنىڭ جولداۋىندا اتاپ وتكەندەي, ءاربىر قازاقستاندىق جۇرگىزىلىپ جاتقان رەفورمالاردىڭ ءمانىن جەتە ءتۇسىنۋى ءتيىس. رەفورمالاردى تابىستى جۇزەگە اسىرۋ ءۇشىن ورتاق ماقساتقا جۇمىلۋ اسا ماڭىزدى. بۇگىنگى فورۋم ءدال وسى ماقساتتى كوزدەيدى. سوندىقتان بۇل فورۋمنىڭ ماڭىزى دا, مارتەبەسى دە ەرەكشە», دەدى د.كالەتاەۆ پلەنارلىق وتىرىستىڭ اشىلۋىندا.
ازاماتتىق فورۋم الەۋمەتتىك باستامالاردىڭ ەڭ ۇزدىك تاجىريبەلەرىن ۇسىنىپ, ازاماتتىق قوعامنىڭ قازىرگى بەينەسىن كورسەتۋ ءۇشىن ءار ەكى جىل سايىن وتەدى. فورۋمنىڭ سەگىزىنشى وتىرىسىنىڭ شەڭبەرىندە سەمينارلار مەن ماستەر-كلاسستار, دوڭگەلەك ۇستەلدەر, پىكىرتالاس الاڭدارى, مينيسترلىكتەر جانە ۆەدومستۆو باسشىلارىمەن سالالىق كەزدەسۋلەر فورماتىندا 35 تاقىرىپتىق سەسسيا وتكىزىلەدى.
فورۋم بارىسىندا ازاماتتىق قوعام ينستيتۋتتارىنىڭ بىرىگە قىزمەت ەتۋ ماسەلەلەرى, مەملەكەتتىك مەكەمەلەر مەن ۇكىمەتتىك ەمەس ۇيىمدار اراسىنداعى قۇقىقتىق قارىم-قاتىناس بازاسىن دامىتۋ بويىنشا ۇسىنىستار تالقىلانادى.
مارجان تىلەۋبەك,
«ەگەمەن قازاقستان»
