تۇساۋكەسەر ءراسىمى «قازاقستان: بولاشاققا ۇمتىلعان ەل» عىلىمي-تاجىريبەلىك كونفەرەنتسياسى اياسىندا گۋمبولدت اتىنداعى بەرلين ۋنيۆەرسيتەتىندە ۇيىمداستىرىلدى (بەرلين, گەرمانيا).
ءىس-شاراعا قر گفر توتەنشە جانە وكىلەتتى ەلشىسى بولات ءنۇسىپوۆ, گۋمبولدت اتىنداعى بەرلين ۋنيۆەرسيتەتىنىڭ ۆيتسە-پرەزيدەنتى, پروفەسسور پەتەر فرەنش, گفر ۇكىمەتىنىڭ رەسەي, ورتالىق ازيا ەلدەرىمەن جانە «شىعىس سەرىكتەستىك» قوعامارالىق ىنتىماقتاستىق بويىنشا ۋاكىلەتتى ديرك ۆيزە, گفر ءسىم شىعىس ەۋروپا, وڭتۇستىك كاۆكاز جانە ورتالىق ازيا ەلدەرى بويىنشا ۋاكىلەتتى ميحاەل زيبەرت, گەرمان بۋندەستاگىنىڭ «گەرمانيا – ورتالىق ازيا» پارلامەنتتىك توبىنىڭ توراعاسى, بۋندەستاگتاعى ءحدو/حاو فراكتسياسى تورالقاسىنىڭ مۇشەسى مانفرەد گرۋند, بۇرىنعى مەملەكەتتىك مينيستر گەرنوت ەرلەر, گفر ەكونوميكا جانە تەحنولوگيانىڭ بۇرىنعى فەدەرالدى ءمينيسترى ميحاەل گلوس, قازاقستان-گەرمان دوستىق قوعامىنىڭ توراعاسى, بۋندەستاگ دەپۋتاتى كارين شترەنتس, بۋندەستاگ دەپۋتاتتارى اندرە حاحن جانە ارمين-پاۋليۋس حامپەل, «Schneider Group» كومپانيالار توبىنىڭ باس ديرەكتورى جانە قۇرىلتايشىسى, شىعىس كوميتەتى ەۋرازيالىق توبىنىڭ جەتەكشىسى ۋلف شنايدەر, گفر مينيسترلىكتەر مەن ۆەدومستۆولاردىڭ وكىلدەرى قاتىستى.
تۇساۋكەسەر بارىسىندا قر گفر توتەنشە جانە وكىلەتتى ەلشىسى بولات ءنۇسىپوۆ «پرەزيدەنتتىڭ «تاۋەلسىزدىك ءداۋىرى» اتتى كىتابى حالىقارالىق تىلدەرگە اۋدارىلىپ, ماسكەۋ, سانكت-پەتەربۋرگ, لوندون جانە باكۋ قالالارىندا تۇساۋى كەسىلدى. بۇگىن تۇڭعىش پرەزيدەنت قورىنىڭ ارقاسىندا بىزدە بەرليندە ءوتىپ جاتىر.
بۇل ءىس-شارا جەلتوقساندا اتاپ وتىلەتىن قازاقستاننىڭ ۇلكەن مەرەكەلەرى – تۇڭعىش پرەزيدەنت جانە تاۋەلسىزدىك كۇندەرى قارساڭىندا وتكىزىلىپ وتىر. مەرەكەلەردىڭ ءبىر-بىرىنە جاقىن تۇرۋى زاڭدىلىق, سەبەبى ولاردىڭ اراسىندا تەرەڭ اجىراماس بايلانىس بار», - دەپ اتاپ ءوتتى.
قازاقستان پرەزيدەنتىنىڭ جاڭا كىتابى ءار وقىرمانعا وزىنشە تۇسىنىك بەرەدى. ونىڭ بىرەگەيلىگى – كەڭ اۋقىمدى اۋديتورياعا ارنالعان.
«تاۋەلسىزدىك ءداۋىرى» ءتورت بولىمنەن تۇرادى, ول تاۋەلسىز قازاقستاننىڭ قالىپتاسۋى بارىسىنداعى تاريحي كەزەڭدەر تۋرالى باياندايدى. وندا قازاقستان جاڭعىرۋىنىڭ ءۇش تولقىنى جانە تابىستارى سيپاتتالعان. وقيعاعا تىكەلەي قاتىسۋشى رەتىندە, پرەزيدەنت قازاقستاننىڭ وتكەن كۇردەلى جولدارى تۋرالى ءوز كوزقاراسىن بىلدىرەدى.
سونىڭ ىشىندە 2000-2010 جىلدارداعى كەزەڭ ارالىعىندا 1997 جىلى مەملەكەت باسشىسى قابىلداعان «قازاقستان - 2030» ستراتەگياسىن ىسكە اسىرۋ قادامدارى قامتىلعان.
كىتاپتىڭ سوڭعى ءبولىمى 2010 جىلدارداعى كەزەڭ ارالىعىنا ارنالادى. ول كەزدە قازاقستان جەتكەن جەتىستىكتەرىمەن شەكتەلمەي, جاڭا امبيتسيالىق «قازاقستان - 2050» ستراتەگياسىن ورىنداۋعا كىرىسەدى.
مەملەكەت باسشىسىنىڭ «تاۋەلسىزدىك ءداۋىرى» كىتابى قازاقستاندىق وقىرمانعا 2017 جىلعى جەلتوقساندا جول تارتتى.
ايتا كەتۋ كەرەك, تۇڭعىش پرەزيدەنت قورىنىڭ قىزمەتى ادامي كاپيتالدى دامىتۋعا ارنالعان جوبالاردى ىسكە اسىرۋعا, دارىندى جاستاردىڭ باستامالارى مەن شىعارماشىلىق پوتەنتسيالىن قولداۋعا باعىتتالعان.
بۇل تۇرعىدا «تاۋەلسىزدىك ءداۋىرى» كىتابىنىڭ ستراتەگيالىق جولداۋ رەتىندە وسكەلەڭ ۇرپاققا ارنالعاندىعى اسا ماڭىزدى.
سونداي-اق, ەلباسى ەڭبەگىنىڭ تۇساۋكەسەرى اياسىندا تۇڭعىش پرەزيدەنت قورى دايىنداعان استانانىڭ 20 جىلدىعىنا ارنالعان «استانا – ۇلى دالانىڭ جاۋھارى» اتتى فوتوكورمەسى ۇيىمداستىرىلدى. وندا استانانىڭ بىرەگەي عيماراتتارى بەينەلەنگەن 40 سۋرەت قويىلدى.
