قازىر يۋنەسكو ماماندارى قاجەتتى ارحەولوگيالىق جانە تابيعي اقپاراتتاردىڭ ساراپتاماسىن جاساپ جاتىر. اۋقىمدى جوبا ماڭعىستاۋدىڭ كەرەمەتتەرىن بۇكىل الەمگە تانىتىپ, ەلىمىزگە كەلەتىن ساياحاتتاۋشىلاردىڭ سانىن ارتتىرۋعا مۇمكىندىك بەرمەك.
- قايتالانباس تابيعات پەن تاريحي ەسكەرتكىشتەرى بار گەوباق تۇپقاراعان جانە ماڭعىستاۋ اۋداندارىنىڭ اۋماعىن قامتيدى. سەبەبى وسى اۋماقتا تابيعي جانە مادەني كورىكتى جەرلەر كوپ جانە اۆتوموبيل جولدارىنىڭ جەلىسى دامىعان», دەدى باسقارما باسشىسى.
باسقارما باسشىسىنىڭ ايتۋىنشا, «ماڭعىستاۋ گەوپاركى» نوميناتسياسىن الۋ ءۇشىن يۋنەسكو-نىڭ شتاب-پاتەرىنە ءوتىنىم جولدانعان. جىل بويى يۋنەسكو-نىڭ ساراپشىلارى مەن ينسپەكتورلارى وسى اۋماقتى زەرتتەپ, ونىڭ الەۋمەتىنە جوعارى باعا بەردى. قازىرگى ۋاقىتتا يۋنەسكو-نىڭ ماماندارى باسشىلىققا ۇسىنىستار دايىنداۋدا. ول ۇسىنىستاردى ورىنداعان جاعدايدا, جاھاندىق گەوپارك مارتەبەسىن الۋعا مۇمكىندىك بولماق.
جەتى جۇرت كەلىپ, جەتى جۇرت كەتكەن ماڭعىستاۋ مەكەنى – اشىق اسپان استىندا جاتقان مۇراجاي. ەلىمىزدەگى تاريحي-مادەني ەسكەرتكىشتەردىڭ ۇشتەن ءبىر بولىگى وسى وڭىردە ورنالاسقان. 13 مىڭ ەسكەرتكىش بار. سونىڭ جيىرماعا جۋىعى «گەوباق» ارقىلى وتاندىق جانە شەتەلدىك ساياحاتتاۋشىلارعا تانىستىرىلماق. قوناقتار ماڭعىستاۋدا عانا كەزدەسەتىن سۇلتان ءۇپى, شاقپاق اتا سىندى جەراستى مەشىتتەرى, شار تارىزدەس الىپ تاستار, قازبا جۇمىستارى ءجۇرىپ جاتقان ەجەلگى قالا ورىندارىن ارالاپ, تاماشالاي الادى.
قازىرگى تاڭدا الەمنىڭ 38 ەلىندە 140 جاھاندىق گەوباق بار.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
