پرەزيدەنت ماقالاسىنداعى التى تارماقتىڭ ىشىندە ەكى ماسەلەگە – بۇگىنگى تەلەۆيزيا سالاسى, فيلمدەر, سونىمەن قاتار دەرەكتى فيلمدەرگە جانە تۇركى الەمى ءۇشىن ۆيكيپەديا نەگىزىندەگى ونلاين-كىتاپحاناعا ەرەكشە نازار اۋدارىلعانىن اتاپ ايتار ەدىم.
اكادەميالىق تاجىريبەسى بار رەپورتەر رەتىندە مەن بۇل ەكى سالانىڭ قازاق حالقى ءۇشىن عانا ەمەس, بۇكىل الەم ءۇشىن, اسىرەسە تۇركى الەمى ءۇشىن اسا ءمان-ماڭىزعا يە ەكەنىن اڭعاردىم.
ءبىز فرانتسياداعى ەۋرونيۋس تۆ-عا نەگىزدەلگەن, قازاقستان بويىنشا ەلدىڭ ءيميدجىن كوتەرۋگە ارنالعان قىسقا باعدارلامالاردى ترانسلياتسيالايمىز. مەن قازاقستاننىڭ ءىرى قالالارى مەن كورىكتى جەرلەرىن ارقاۋ ەتكەن كوپتەگەن باعدارلامانى كوردىم. ونىڭ ىشىندە شەتەلدىكتەردىڭ باسىم بولىگى قازاقستانداعى اڭ اۋلاۋ ءداستۇرىنىڭ قىرى مەن سىرى جايىندا ەستىگەنىنە سەنىمدىمىن.
الايدا, قازاقستاننىڭ شىعىسى مەن باتىسىنىڭ, سولتۇستىگى مەن وڭتۇستىگىنىڭ اراسىن قامتيتىن اۋقىمدى, ساپالى دەرەكتى فيلمدەر سەرياسى بار ما؟
ادامداردىڭ تۇرمىس-تىرشىلىگىنەن باستاپ, تاڭعاجايىپ تابيعات, ءداستۇر مەن تاريح ۇندەسكەن مۇنداي اۋقىمدى دەرەكتى جوبا قازاق حالقىنا, اسىرەسە جاس تولقىنعا اسا قاجەت. سونداي-اق ساپالى تۇسىرىلگەن تۋىندى شەتەلدىك اۋديتوريا ءۇشىن دە تارتىمدى بولارى ءسوزسىز.
بۇگىنگى قالا جاستارىنىڭ ءداستۇرلى قازاق ءان ونەرىن ەمەس, باتىس مۋزىكاسىن تىڭداۋعا بەيىمدەلگەنى, كوڭىلگە كىربىڭ ۇيالاتادى.
مەن قازاق بولماسام دا, «اداي» كۇيىن تىڭدايمىن. بۇل تۋىندىنى تىڭداعان سايىن جاڭاشا اسەرگە بولەنىپ, كۇي كۇمبىرىنەن جاۋىنگەرلىك رۋحتى سەزىنەمىن. بۇل شىعارمانى نەگە قازاق قىزى مەن قازاق جىگىتى تىڭداپ وسپەسكە؟
مادەني مونوپوليا نەمەسە مادەني يمپەرياليزم ءۇشىن كۇرەسۋدىڭ قاجەتى جوق, تەك جاستارعا ءوز ۇلتىنىڭ قۇندىلىقتارىن ساقتاۋ قاجەت. ول ءۇشىن ۇلتتىق تەلەراديو ۇيىمدارى مەن مادەني مەكەمەلەر ەرەكشە ىقىلاسپەن ۇلتتىق ناقىشتاعى تۋىندىلاردى ناسيحاتتاي ءبىلۋى ءتيىس.
مەن پرەزيدەنت نۇرسۇلتان نازارباەۆتىڭ ماقالاسى جەر جاھاندا ءومىر سۇرەتىن, ءوز ءتۇپ-تامىرىن ىزدەگەن ميلليونداعان تۇركىلەر ءۇشىن ومىرلىك ماڭىزى بار باستاما دەپ بىلەمىن. مەنىڭ بىلۋىمشە, پرەزيدەنت ۇسىنعانداي ونلاين-دەرەك كوزى ءالى ەشبىر جەردە ايتىلعان جوق.
بۇل تەك قاراپايىم تۇركىلەرگە عانا ەمەس, سونىمەن قاتار زەرتتەۋشىلەر, اكادەميكتەر ءۇشىن دە, سونداي-اق ۇلى دالاعا ساياحات جاسايتىن تۋريستەر ءۇشىن دە وتە قۇندى بولماق.
ءسوز سوڭىندا, مەملەكەت باسشىسى نۇرسۇلتان نازارباەۆ ايتقانداي, ونىڭ بارلىق ۇسىنىلعان جوبالارى مەملەكەت قاراجاتىنا نەگىزدەلگەن «اكادەميالىق تۋريزمگە» اينالىپ كەتپەۋى ءتيىس.
ماسۋد يماني كالەسار,
جۋرناليست (يران)
