مارات ءجۇنىس-بەك, رەسپۋبليكالىق «چەرنوبىل ارداگەرلەرى جانە مۇگەدەكتەرى» قوعامدىق بىرلەستىكتەرىنىڭ ۇيلەستىرۋ كەڭەسىنىڭ ءبىرىنشى توراعا ورىنباسارى (استانا قالاسىنان):
بۇگىنگى ازاماتتىق فورۋم مۇمكىندىگى شەكتەۋلى ءار ءتۇرلى جاستاعى ازاماتتار, الەۋمەتتىك قورعاۋدى قاجەت ەتەتىن مۇگەدەكتەر جانە جاستار ءۇشىن ۇلكەن قولداۋ بولعالى تۇر. ەلباسى ايتقانداي, بۇگىنگى قوعام ءۇشىن كەدەرگىسىز بولاشاق كەرەك. مەملەكەتتىك ەمەس ۇيىمداردىڭ وكىلدەرىمەن بايلانىستى قالىپتاستىرۋ جانە جانداندىرۋ جۇمىستارى ءجيى بولعان سايىن ازاماتتىق قوعامىمىزدىڭ الەۋەتى جاقسارا تۇسەدى. بۇگىنگى فورۋمنان كەيىن قاتىسۋشىلاردىڭ جۇرەكتەرىندە ۇلكەن ءبىر جالىن پايدا بولادى. ساناۋلى ادامدار عانا ءار وڭىردەگى شارالارعا قاتىسا الادى. ال بۇگىنگى فورۋم بارلىق ايماقتىڭ وكىلدەرىنىڭ باسىن قوستى. بۇل فورۋم ارقىلى بولاشاقتاعى جۇمىس جوسپارلارىمىزدى جاڭاشا تۇرلەندىرۋدىڭ مۇمكىندىگى تۋدى. ەڭ باستىسى بۇگىنگى فورۋمدا مۇمكىندىگى شەكتەۋلى ادامداردىڭ بىزبەن تەڭ ەكەندىگىن كورسەتە الدىق. 32 مىڭنان استام چەرنوبىل اپپاراتىنا قاتىسقان قازاقستاندىق بولسا, بۇگىندە ولاردىڭ 5 مىڭعا جۋىعى عانا قالدى. ءبىز بەيبىت كۇندە ادامداردان ايىرىلىپ جاتىرمىز. ءبىز وسى فورۋمنان تاجىريبە الا وتىرىپ, چەرنوبىلدىقتاردىڭ جۇمىسىن وزگەرتۋگە باعىت-باعدار الامىز دەگەن ۇمىتتەمىن. فورۋمنان العان جاڭا باعىتتاردى وڭىرلەردە جۇزەگە اسىرامىز دەپ ويلايمىز.
سابيرا بايزاقوۆا, «جالىن» جاستار ۇيىمى قوعامدىق بىرلەستىگىنىڭ جەتەكشىسى. (شىمكەنت قالاسىنان):
ازاماتتىق فورۋمعا ءبىرىنشى رەت قاتىسۋىم. ازاماتتىق سەكتورداعى ەڭبەك ءوتىلىمىم 8 جىل. بۇل فورۋمنان كوپتەگەن قوعامدىق ۇيىمدار وزىندىك ءبىر انىقتامالار الادى دەگەن ويدامىن. بۇل فورۋمدا مەملەكەتتىك باعدارلامالار, تۇجىرىمدامالار, بەلگىلى ءبىر جۇمىستىڭ پروتسەسىن جولعا قوياتىنداي جاقسى شەشىمدەر قابىلدانادى. مىسالى «جۇمىسپەن قامتۋ-2020» باعدارلاماسى وسى ازاماتتىق فورۋمنىڭ بىرىندە ۇيىمدارداردىڭ اتىنان باستاما بولىپ كوتەرىلگەن. ول باعدارلاما قازىر جاقسى ناتيجە بەرىپ جاتىر. ءدال سول سەكىلدى الداعى 10 جىلدىققا تيەسىلى نەمەسە 5 جىلدىققا تيەسىلى ۇزاق مەرزىمدى, قىسقا مەرزىمدى دەگەن سەكىلدى ءبىر جاقسى باستامانىڭ كۋاگەرى بولاتىنىما سەنىمدىمىن. مەن شىمكەنت قالاسىندا تىركەلگەن «جالىن» جاستار ۇيىمى اتىنان كەلىپ وتىرمىن. ازاماتتىق فورۋمعا جالپى شىمكەنت قالاسىنان 25 دەلەگات كەلدى. ودان بولەك رەسپۋبليكالىق «تانىم» جۇلدەسىنە قاتىسقان ارنايى ۇكىمەتتىك ەمەس ۇيىمدار بار. ولاردىڭ اراسىندا ەكى ۇكىمەتتىك ەمەس «ينتەللەكت» جانە ء«داريا» قوعامدىق ۇيىمدارى ءبىزدىڭ قالانىڭ اتىنان شىعىپ وتىر. ارىپتەستەرىمنىڭ باستاماسىنا وتە قۋانىشتىمىن. مۇنداي ازاماتتىق ويى بار ادامدار قوعامنان ارقاشان ورىن تابادى دەگەن ويدامىن. وسى فورۋمدا قازاقستانداعى جاستار ۇيىمدارىنىڭ جۇمىسى جاندانسا ەكەن دەيمىن. ايماقتارمەن بايلانىستى كۇشەيتسەك ەكەن نەمەسە ايماق-ايماق بولىپ جۇيەلى جۇمىستار جۇرگىزۋدى قولعا الساق ەكەن.
كۇلاش شاكيروۆا, وڭتۇستىك قازاقستان مۇسىلمان ايەلدەرى ء«بيبى فاتيما» قوعامدىق بىرلەستىگىنىڭ ءتورايىمى (تۇركىستان وبلىسىنان):
ءبىز قازاق قىزدارىنىڭ ۇلتتىق تاربيەسىن جانداندىرىپ, ايەل قۇقىقتارىن قورعاۋعا ارنالعان جۇمىستار اتقارامىز. قىز بالالار مەن ايەلدەر قاۋىمىنىڭ تۇرمىستىق جاعدايداعى قيىندىقتارى ءالى دە كەزدەسەدى. ءبىز مۇسىلمان ايەلدەرىنىڭ بىرلەستىگى اۋدانداردى ارالاپ قىز-كەلىنشەكتەرمەن كوپتەگەن كەزدەسۋلەر ۇيىستاستىرىپ ءجۇرمىز. مەكتەپ جاسىنداعى قىزداردىڭ ساناسىنا قازاقى تاربيە مەن ۇلتتىق سالت-ءداستۇردىڭ وزىعىن ويعا سالىپ وتىرامىز. بۇگىنگى فورۋم بارىسىندا وزگە دە كوپتەگەن قوعامدىق بىرلەستىكتەردىڭ وكىلدەرىمەن اۋقىمدى ديالوگ الاڭىندا بىرقاتار ماسەلە كوتەرەمىز. فورۋم بارىسىندا تانىستىرىلاتىن تۇجىرىمداما نەگىزىندە ءار ازامات ءۇشىن وڭ شەشىم قابىلدانادى دەپ ويلايمىز.
فارحات قاتىرەنوۆ, «TIFLOSMART مۇگەدەكتەر قوعامى» قوعامدىق بىرلەستىگىنىڭ جەتەكشىسى (استانا قالاسىنان):
«Tiflosmart» مۇگەدەكتەر قوعامىن اشقانىمىزعا 1 جىلدان استى. ءبىزدىڭ باستى مىندەتىمىز كوزى ناشار كورەتىن ادامدارعا تيفلوتەحنيكالىق قۇرالدار ارقىلى ساباق بەرۋ. سونداي-اق ءبىز كورۋ مۇمكىندىگى شەكتەۋلى ازاماتتاردىڭ قۇقىقتارىن قورعاۋمەن, ولارعا مورالدىق جاعىنان قولداۋ كورسەتۋمەن اينالىسامىز. تيفلوتەحنيكا دەگەنىمىز تەلەفون, سمارتفوندار كومەگىمەن دىبىستىق سۇيەمەلدەۋ ارقىلى ارنايى دارىستەر جۇرگىزۋ. بۇل جوبا اياسىندا بۇگىنگە دەيىن 60 ادام وقۋدان ءوتتى. وسى فورۋم بارىسىندا وزىمىزگە قاجەت كوپتەگەن اقپاراتتار الامىز دەگەن ويدامىز. مۇگەدەكتەردىڭ جاعدايىن جاساۋعا ارنالعان باعدارلامالاردىڭ كوپتىگى قۋانتادى.
دايىنداعان:
مارجان تىلەۋبەك,
«ەگەمەن قازاقستان»
