ارينە, ەلىمىزدىڭ زەينەتاقى جۇيەسىن, ونىڭ قۇرىلىمىن تولىق تۇسىنبەي جاتىپ بولاشاق زەينەتاقىنى جوسپارلاۋ مۇمكىن ەمەس. سوندىقتان بجزق, جيناقتاۋشى زەينەتاقى جۇيەسىنىڭ بارلىق قارجىلىق جانە اقپاراتتىق اعىنىنىڭ بىرىڭعاي وپەراتورى رەتىندە ءار ءتۇرلى بايلانىس ارنالارى ارقىلى ماڭىزدى, شىنايى اقپاراتتى ءاربىر ازاماتقا جەتكىزۋگە كۇش سالۋدا.
2018 جىلدىڭ 20 قاراشاسىندا قوردىڭ بارلىق فيليالدارىندا «بارلىق سالىمشىلار ءۇشىن قولجەتىمدى بجزق» تاقىرىبىندا اشىق ەسىك كۇنى وتكەن ەدى. وعان العاش رەت جوعارى سىنىپ وقۋشىلارى مەن ستۋدەنتتەر شاقىرىلدى. سونداي-اق, بجزق باسشىلىعى اعىمداعى جىلدىڭ قاراشا-جەلتوقسان ايلارىندا ەلىمىزدىڭ جەتەكشى جوعارى وقۋ ورىندارىنىڭ ستۋدەنتتەرىمەن كەزدەسۋ وتكىزۋدى جوسپارلاعان بولاتىن. وسىعان وراي العاشقى ءۇش كەزدەسۋ وتكىزىلدى.
22 قاراشادا «بجزق» اق باسقارۋشى ديرەكتورى جانارا تولەگەنوۆا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ (الماتى ق.) ستۋدەنتتەرىمەن كەزدەسسە, قوردىڭ باسقارۋشى ديرەكتورى ماۋلەن وتەعۇلوۆ ق.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ (الماتى ق.) ستۋدەنتتەرىمەن كەزدەسىپ, زەينەتاقىمەن قامسىزداندىرۋ ماسەلەسى بويىنشا قىزىقتى اڭگىمە جۇرگىزىپ, بولاشاق جاس مامانداردىڭ سۇراقتارىنا جان-جاقتى جاۋاپ بەردى.
23 قاراشادا «بجزق» اق باسقارما ءتورايىمىنىڭ ورىنباسارى ساۋلە ەگەۋباەۆا وسكەمەن قالاسىندا د.سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىنىڭ ستۋدەنتتەرىمەن كەزدەسۋ وتكىزدى.
سپيكەرلەر زەينەتاقىمەن قامسىزداندىرۋ ماسەلەسىندە جيناقتاۋشى زەينەتاقى جۇيەسىنىڭ ەرەكشە ماڭىزعا يە ەكەندىگىن جەتكىزدى. ويتكەنى, جاستاردىڭ بولاشاق جيىنتىق زەينەتاقىسى جارنالاردىڭ قورعا تۇراقتى اۋدارىلۋىنا تىكەلەي بايلانىستى بولادى. سونىمەن قاتار قور باسشىلىعى زەينەتاقى زاڭناماسىنداعى وزگەرىستەر جانە زەينەتاقى كاپيتالىن كوبەيتۋ جولدارى تۋرالى اڭگىمەلەدى.
كەزدەسۋ بارىسىندا جاستاردىڭ كوپشىلىگىن قور مەن سالىمشىلار اراسىنداعى بايلانىس ارنالارى, سونداي-اق, زەينەتاقى قىزمەتتەرىن قاشىقتىقتان الۋ مۇمكىندىكتەرى قىزىقتىردى. ال جۇمىس ىستەيتىن ستۋدەنتتەر ازاماتتىق-قۇقىقتىق شارتتار بويىنشا العان تابىستان مىندەتتى زەينەتاقى جارنالارىن تولەۋ تۋرالى سۇراقتار قويدى.
جىل سوڭىنا دەيىن تاعى جەتى ۋنيۆەرسيتەتتە وسىنداي كەزدەسۋلەر وتكىزىلمەك. 26 قاراشادا س. تورايعىروۆ اتىنداعى پاۆلودار مەملەكەتتىك ۋنيۆەرسيتەتىندە, م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىندە جانە ە.بۋكەتوۆ اتىنداعى قاراعاندى مەملەكەتتىك ۋنيۆەرسيتەتىندە كەزدەسۋلەر وتكىزىلەدى. سونىمەن قاتار وسىنداي كەزدەسۋلەر 28 جانە 30 قاراشادا ت. رىسقۇلوۆ اتىنداعى قازاق ەكونوميكالىق ۋنيۆەرسيتەتى مەن حالىقارالىق اقپاراتتىق تەحنولوگيالار ۋنيۆەرسيتەتىندە جالعاسپاق. ال جەلتوقسان ايىندا مۇنداي كەزدەسۋلەر ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىندە ۇيىمداستىرىلادى
ايناش ەسالي,
«ەگەمەن قازاقستان».
الماتى
