ەلباسى ماقالاسىنىڭ «تۇركى الەمىنىڭ گەنەزيسى» اتتى بولىمىندە «قازاقستان – كۇللى تۇركى حالىقتارىنىڭ قاسيەتتى «قارا شاڭىراعى» دەلىنگەن.
پرەزيدەنتتىڭ جازۋىنشا, بۇگىنگى قازاقتىڭ سايىن دالاسىنان الەمنىڭ ءار تۇكپىرىنە تاراعان تۇركى تەكتەس تايپالار مەن حالىقتار باسقا ەلدەر مەن وڭىرلەردىڭ تاريحي ۇدەرىستەرىنە ەلەۋلى ۇلەس قوستى.
«وسىعان بايلانىستى, «تۇركى وركەنيەتى: ءتۇپ تامىرىنان قازىرگى زامانعا دەيىن» اتتى جوبانى قولعا الۋ قاجەت. بۇل جوبا اياسىندا 2019 جىلى استانادا تۇركولوگتاردىڭ دۇنيەجۇزىلىك كونگرەسىن جانە ءارتۇرلى ەلدەر مۋزەيلەرىنىڭ ەكسپوزيتسيالارىنا ەجەلگى تۇركى جادىگەرلەرى قويىلاتىن تۇركى حالىقتارىنىڭ مادەني كۇندەرىن ۇيىمداستىرۋ كەرەك. سونداي-اق, ۆيكيپەديانىڭ ۇلگىسىندە قازاقستاننىڭ مودەراتورلىعىمەن تۇركى حالىقتارىنا ورتاق تۋىندىلاردىڭ بىرىڭعاي ونلاين كىتاپحاناسىن اشۋ دا ماڭىزدى», دەپ اتاپ وتەدى ەلباسى.
قازاقستاننىڭ ەجەلگى استاناسى تۇركىستان حالقىمىزدىڭ رۋحاني ورتالىعى عانا ەمەس, بۇكىل تۇركى الەمى ءۇشىن كيەلى ورىن بولىپ سانالاتىنىن ايتقان ەلباسى تۇركىستاندى دامىتۋ جايىنا توقتالدى.
«سونىمەن قاتار جاڭا وبلىس ورتالىعى رەتىندە تۇركىستاندى دامىتۋ بارىسىندا ونىڭ حالىقارالىق ارەناداعى بەدەلىن جۇيەلى تۇردە ارتتىرۋ قاجەت», دەيدى پرەزيدەنت.
