ياعني بۇعان دەيىنگى جاسالعان تالداۋلار مەن زەرتتەۋلەر جانە مونيتورينگتىك باقىلاۋلار ناتيجەلەرى وبلىستا جوعارىدا اتالعان كاتەگورياعا كىرەتىن جۇمىس ىستەۋشىلەر قاتارى تۇپ-تۋرا 70 مىڭ ەكەنىن كورسەتەدى. ونىڭ 32 مىڭى بيۋدجەت سالاسىنىڭ قىزمەتكەرلەرى. بۇل رەتتە ءبىرىنشى كەزەكتە ءبىلىم بەرۋ سالاسىندا قىزمەت جاسايتىن مامانداردىڭ جالاقى مولشەرىن كوبەيتۋگە ماعدار ۇستالعان.
جۇمىس توبى وڭىردە اتالعان ساناتتا 25 مىڭنان استام قىزمەتكەر بار دەپ مالىمدەدى. ولاردىڭ ەڭبەكاقىلارى ورتاشا ەسەپپەن العاندا 48 600 تەڭگەگە دەيىن وسەدى دەپ كۇتىلۋدە. وسى ورايدا وبلىستاعى جالاقى مولشەرىن ءوسىرۋ جونىندەگى ناقتى ءىس-قيمىلدار ەكونوميكالىق جانە الەۋمەتتىك سەكتوردىڭ بارلىق سالالارىنا قاتىستى ەكەنىن ايتقان ءجون. بۇل رەتتە بۇگىنگى كۇنى وڭىردە 15 872 جەكەمەنشىك يەلەرى مەن شاعىن كومپانيالار بار ەكەنى دە ۇدايى نازاردا بولىپ كەلەدى. ارنايى جۇمىس توبى بۇل قۇرىلىمداردا جالاقىلارى 42 500 تەڭگەدەن تومەن 39 مىڭعا جۋىق ادام بار ەكەنىن دە شوتقا ءتۇسىردى.
ءبىر سوزبەن ايتقاندا قازىرگى كۇنى وبلىستا ەڭ تومەن جالاقى الاتىن ازاماتتاردىڭ ناقتى سانىن انىقتاۋ جۇمىستارى ودان ءارى جالعاسۋدا. بۇگىنگى كۇن تاقىرىبىنا وراي ءوز وي-پىكىرىن اقتوبە وبلىسىنىڭ اكىمى بەردىبەك ساپارباەۆ گازەت تىلشىسىنە بىلايشا جەتكىزدى.
جالاقى – ادامداردىڭ الەۋمەتتىك كوڭىلكيۇىنە اسەر ەتەتىن نازىك تە شەتىن كۇردەلى ماسەلە.
ونى رەتتەۋ مەن ءوسىرۋ جونىندەگى ءىس-شارالار ۇستىرتتىك پەن فورمالدىلىقتى كوتەرمەيدى. ءبىز وڭىردەگى بارلىق ءىرى جانە ورتاشا كاسىپورىن جەتەكشىلەرى جانە ارنايى جۇمىس توبىنىڭ مۇشەلەرى وسى ءجايتتى نازاردان تىس قالدىرماۋىن ايتىپ كەلەمىز. بۇل رەتتە تەك ستاتيستيكالىق مالىمەتتەرگە عانا ارقا سۇيەۋ ازدىق ەتەرى انىق. ياعني ءىستىڭ جاعدايىن ۋاقىت توزدىرماي تەز ارادا ءارى ءتيىستى جەردە شەشۋ – ناقتى ناتيجەگە جاقىنداتا تۇسپەك. بۇگىندە ءبارىمىزدىڭ العا قويىپ وتىرعان ماقساتىمىز وسىنداي.
قازىرگى كۇنى وڭىردەگى بارلىق جۇمىس بەرۋشىلەر 2019 جىلدىڭ ءبىرىنشى قاڭتارىنان باستاپ پرەزيدەنت تاپسىرماسى ويداعىداي ورىندالۋىنا ءبىر كىسىدەي جۇمىلعان.
تەمىر قۇسايىن,
«ەگەمەن قازاقستان»
اقتوبە
