تۋىندىنى تاماشالاۋعا كەلگەن قالا تۇرعىندارى, اسىرەسە جاستار كوپ بولدى. قويىلىم شىمىلدىعى اشىلار الدىندا تۇركىستان وبلىسىنىڭ اكىمى جانسەيىت تۇيمەباەۆ وبلىستىق وپەرا جانە بالەت تەاترى ۇجىمىن قۇتتىقتاپ, ونەردى دامىتۋعا ۇلەس قوسىپ حالىقتىڭ العىسىنا بولەنۋ جولىنداعى ەڭبەكتەرىنىڭ ەسەلەنە بەرۋىنە تىلەكتەستىگىن ءبىلدىردى. ماحاببات ليريكاسى بەينەلەنگەن تۋىندىنى ساحنالاۋعا تەاتردىڭ 60-تان استام ءارتىسى قاتىسقان. ميۋزيكلدىڭ اۋەنىن جازعان كومپوزيتور سۆەتلانا احمەتوۆا, مۋزىكاسىن وڭدەگەن كومپوزيتور رۋسلان شىنىقۇلوۆ. ال ميۋزيكلدىڭ ءسوزىن جازعان جاس اقىن مۇقاعالي كەنجەتاي ۇلى, ساحنالاعان مۇحتار اۋەزوۆ اتىنداعى اكادەميالىق قازاق دراما تەاترىنىڭ قويۋشى – رەجيسسەرى ەلىك نۇرسۇلتان.
ءوڭىر جاستارىنىڭ ومىرىنەن الىنعان, ماحاببات جولىنداعى ادالدىق پەن باتىلدىق, قىزعانىش پەن كۇرەس كورىنىستەرىن سۋرەتتەيتىن, زاماناۋي ليريكالىق شىعارما ەكى كورىنىستەن تۇرادى. ميۋزيكلدىڭ باس كەيىپكەرى ايان سۇيىكتىسى مادينا ەكەۋىنىڭ ماحابباتىن قورعاۋ ءۇشىن ەشتەڭەدەن تايىنبايدى. مادينانىڭ ساحنادا ءان ايتۋعا دەگەن ىقىلاسى مەن ارمانى قوس عاشىقتىڭ اراسىندا قىزعانىش تۋعىزىپ, كەلىسپەۋشىلىككە اپارادى. دەگەنمەن جاستار وقيعاسىن سۋرەتتەيتىن ميۋزيكلدىڭ بارلىق كەيىپكەرلەرى ءوز مۇراتىنا جەتەدى. بۇگىنگى جاستار ءومىرى شىنايى سۋرەتتەلگەن قويىلىم كورەرمەندەر كوڭىلىنەن شىعىپ, قوشەمەتكە يە بولدى.
عالىمجان ەلشىباي,
«ەگەمەن قازاقستان»
تۇركىستان وبلىسى
