جازعى وليمپيا ويىندارىنداعى 60 مەدالدى وبلىس سپورتشىلارىنا وليمپيادالىق جۇيەمەن ۇلەستىرەتىن بولساق, الماتى قالاسىنىڭ ساڭلاقتارى 3 التىن, 3 كۇمىس, 4 قولا جۇلدەمەن كوش باستاپ تۇر. الماتىلىق سپورتشىلار التىن مەدالدى بوكس (باقىت سارسەكباەۆ), سۋ سپورتى (دميتري بالاندين) جانە جەڭىل اتلەتيكا (ولگا شيشيگينا) سپورتىنان جەڭىپ العان. ەكىنشى ورىندا 2 التىن, 3 كۇمىس, 2 قولاسى بار الماتى وبلىسى كەلەدى. بۇل ءوڭىر كۇرەس سپورتى مەن اۋىر اتلەتيكاعا بەيىم. مىسالى, 7 جۇلدەنىڭ تورتەۋىن بالۋاندار يۋري مەلنيچەنكو (التىن), ماۋلەن مامىروۆ (قولا), گەورگي تسۋرتسۋميا (كۇمىس), نۇرباقىت تەڭىزباەۆ (كۇمىس) يەلەنسە, ەكى جۇلدەنى زىلتەمىرشى سەرگەي فيليمونوۆ (كۇمىس) پەن كارينا گوريچەۆا (قولا) ولجالاعان. سونداي-اق جەڭىلاتلەت الەكساندر پارىگين التىن جۇلدە جەڭىپ العان.
ۇزدىك ۇشتىكتى قاراعاندى وبلىسى 2 التىن, 1 كۇمىس, 3 قولا مەدالمەن قورىتىندىلاپ تۇر. كەنشىلەر ايماعى بوكس سپورتىنا ەپتى كەلەدى. بۇل وبلىستا بوكسشى ۆاسيلي جيروۆ پەن سەرىك ساپيەۆتىڭ التىن جۇلدەسى, گ.گولوۆكين مەن س.ەلەۋوۆتىڭ كۇمىسى مەن قولاسى بار. ياعني, ءتورت جۇلدەنى وبلىس قورجىنىنا بوكسشىلار سالعان. ەكى قولا ونسايىسشى د.كارپوۆ پەن ەركىن كۇرەس شەبەرى ە.سىزدىقوۆاعا تيەسىلى. ءتورتىنشى ورىن 1 التىن, 4 كۇمىس,
3 قولا جۇلدەسى بار وڭتۇستىك قازاقستان وبلىسىنا (قازىرگى تۇركىستان وبلىسى) بۇيىردى. وڭتۇستىك وڭىرىنە ەڭ ءبىرىنشى جانە قازىرشە جالعىز التىن مەدالدى 2000 جىلى سيدنەي وليمپياداسىندا مارقۇم بەكزات ساتتارحانوۆ (بوكس) اپەرگەن بولاتىن. سودان بەرى بۇل ءوڭىردىڭ ورەندەرى وليمپ شىڭىن باعىندىرا الماي كەلەدى. ريو وليمپياداسىندا اۋىراتلەت جازيرا جاپپارقۇل كۇمىس جۇلدە يەلەنىپ, التىنعا قول سوزىم جەردەن سۇرىنگەن-ءدى.
جامبىل وبلىسىنىڭ سپورتشىلارى وقو-دان ءبىر قولا جۇلدە كەم الىپ, ۇزدىك بەستىكتى تۇيىندەپ تۇر. جامبىلدىڭ جامپوزدارى 1 التىن, 4 كۇمىس, 2 قولا جۇلدەنى تەك ەكى سپورت تۇرىنەن العان. ءبىرى – بوكس, ەكىنشىسى – كۇرەس. 2004 جىلى باقتيار ارتاەۆتىڭ التىنىنىڭ جانىندا بولات ءجۇمادىلوۆتىڭ ەكى كۇمىسى, بولات نيازىمبەتوۆتىڭ ءبىر قولاسى بار. ال بالۋاندار يسلام بايرامۋكوۆ كۇمىس, اقجۇرەك تاڭاتاروۆ قولا, دزيۋدوشى ەلدوس سمەتوۆ كۇمىس جۇلدە يەلەنگەن. ارينە, سمەتوۆتىڭ قاتىسقان سپورت ءتۇرى دزيۋدو بولعانىمەن, كۇرەس تۇرلەرىنە جاتاتىنىن ەسكەرگەن ءجون. التىنشى ورىنداعى استانا قالاسىنىڭ قورجىنىندا 1 التىن, 1 كۇمىس, 2 قولا مەدال بار. بوكسشى دانيار ەلەۋسىنوۆ (التىن), ۆاسيلي لەۆيت (كۇمىس), مارينا ۆولنوۆا (كۇمىس), دزيۋدوشى اسحات جىتكەەۆ (كۇمىس) جانە بالۋان گيۋزەل مانيۋروۆا (كۇمىس) العان.
ەكى وليمپيادادا ءبىر التىن, ءبىر كۇمىس جۇلدە العان ۆەلوشاباندوز الەكساندر ۆينوكۋروۆتىڭ جالعىز ءوزى ءبىر وبلىستىڭ (سولتۇستىك قازاقستان وبلىسى) جۇگىن ارقالاپ, سولتۇستىك ءوڭىرىن جالپى ەسەپتىڭ قورىتىندىسى بويىنشا جەتىنشى ورىنعا كوتەردى. سونىمەن قاتار 1 التىن, 1 قولاسى بار اقتوبە وبلىسى سەگىزىنشى ورىندا كەلەدى. اقتوبەگە التىن مەدالدى بوكسشى ەرماحان ىبرايىموۆ, ال قولا جۇلدەنى اۋىراتلەت فارحاد حاركي سىيلاعان. ءدال اقتوبە وبلىسىمەن بىردەي مەدال جيناپ, تەك التىن جۇلدەنى 2016 جىلى ريو وليمپياداسىندا العان اتىراۋ وبلىسى توعىزىنشى ورىندا تۇر. اتىراۋ وبلىسىنىڭ قورجىنىنا التىن مەدالدى زىلتەمىرشى نيجات راحيموۆ, قولا جۇلدەنى تاەكۆوندوشى ارمان شىلمانوۆ سالعان. ۇزدىك وندىقتى سوڭعى ەكى وليمپيا ويىندارىندا 1 التىن, 1 قولا جۇلدە العان جەڭىلاتلەت ولگا رىپاكوۆانىڭ ارقاسىندا شقو قورىتىندىلادى.
ماڭعىستاۋ وبلىسى بوكسشى ادىلبەك نيازىمبەتوۆ ەكى وليمپيادادا ەكى كۇمىس مەدالى مەن بالۋان ماريد مۋتاليموۆ 2008 جىلى قولا مەدالىمەن 11-ورىننان كورىندى. اقمولا وبلىسى 1996 جىلعى اۋىراتلەت اناتولي حراپاتىيدىڭ كۇمىس جۇلدەسىنىڭ ارقاسىندا 12-ورىنعا جايعاسقان. وبلىستىق رەيتينگتىڭ 13-ءشى جانە 14-ورىندارىن قوستاناي وبلىسى مەن باتىس قازاقستان وبلىسى ءبولىسىپ تۇر. قوستاناي وبلىسىنا بوكسشى يۆان دىچكونىڭ 2 قولا مەدال, بقو-عا بالۋان دانيال گادجيەۆ پەن ەكاتەرينا لاريونوۆا ءبىر-ءبىر قولا جۇلدە سالعان. الەكساندر زايچيكوۆتىڭ قولا جۇلدەسىنەن كەيىن قىزىلوردا وبلىسى ءبىر جۇلدەمەن 15-ورىنعا جايعاستى. ەلىمىز بويىنشا جازعى وليمپيا ويىندارىندا ەل قورجىنىنىنا مەدال سالماعان جالعىز وبلىس پاۆلودار كوش سوڭىندا قالىپ قويدى. ازىرشە بۇل وبلىستىڭ جازعى سپورتشىلارى جۇلدەگە ىلىگىپ, كوزگە تۇسەر ەمەس.
ەندى قىسقى سپورتشىلاردىڭ ناتيجەسىنە توقتالساق. قىسقى وليمپياداداعى قازاقستاندىق سپورتشىلاردىڭ ناتيجەسى كوڭىلى كونشىتەرلىك ەمەس. 7 وليمپيا ويىندارىنا قاتىسقان وتانداستارىمىز نەبارى 8 مەدال يەلەنگەن. ءتىپتى, 2002 جىلى سولت-لەيك-سيتي (اقش) مەن 2006 جىل تۋرين (يتاليا) وليمپياداسىندا سپورتشىلارىمىز تۇعىر بيىگىنەن كورىنە الماي, ەلگە جۇلدەسىز ورالدى.
ءبىر قىزىعى, 8 مەدالدىڭ تەڭ جارتىسىن اقمولالىق شاڭعىشى ۆلاديمير سميرنوۆتىڭ ءبىر ءوزى ولجالاپ, وبلىستىق رەيتينگتە كوش باستادى. 1994 جىلى ليللەحامەردە 1 التىن, 2 كۇمىس, 1998 جىلى ناگانودا قولا جۇلدە الدى. ەكىنشى ورىنداعى الماتى قالاسىنىڭ سپورتشىلارى قورجىنىندا 2 مەدال بار. 2010 جىلعى ۆانكۋۆەردە (كانادا) وتكەن كەزەكتى وليمپيادادا كۇللى قازاق جۇرتى ەلەنا حرۋستالەۆانىڭ (بياتلون) كۇمىسىن قاناعات تۇتسا, 2014 جىلعى سوچي وليمپياداسىندا دەنيس تەن (مəنەرلەپ سىرعاناۋ) قولا جۇلدە سىيلادى. جازعى وليمپيا ويىندارىندا قورجىنى بوس تۇرعان پاۆلودار وبلىسى قىسقى وليمپيادادا ءبىر جۇلدە سالدى. ناگانوداعى بايراقتى باسەكەدە كونكيمەن جۇگىرۋ سپورتىنىڭ وكىلى ليۋدميلا پروكاشەۆا قولا مەدال يەلەندى. بيىلعى پحەنچحان (وڭتۇستىك كورەيا) وليمپياداسىندا شىعىسقازاقستاندىق موگۋلشى يۋليا گالىشەۆانىڭ جالعىز قولاسى قازاقستان قۇراماسىن جۇلدەسىز قايتۋدان قۇتقارىپ قالعان ەدى. قالعان وبلىس سپورتشىلارىنا قىسقى وليمپيادادا جۇلدە الۋ بىلاي تۇرسىن, بايراقتى دوداعا قاتىسۋدىڭ ءوزى ارمان بولىپ تۇر.
ءالي بيتورە,
«ەگەمەن قازاقستان»
