جاقسى ءبىر تانىسى 3 ميلليون تەڭگەگە كونديتەرلىك تاعامدار دايىندايتىن قوندىرعىلار العانىمەن جۇمىسىن باستاپ كەتۋگە قولبايلاۋ كوپ بولىپ, ءارى-ءسارى بولىپ جۇرسە كەرەك. ول وسى سالاعا قىزىعىپ جۇرگەن زەينەتكەرگە جابدىقتارىن ساتۋعا كەلىسىم بەرەدى. ءا.قايۋپوۆا «دامۋ» قورى ارقىلى 3 ميلليون تەڭگە كولەمىندە جەڭىلدەتىلگەن نەسيە الىپ, قوندىرعىلاردى ساتىپ الادى. ناۋبايحانانى اۋلاسىنداعى جاپسارلاس ۇيگە ورنالاستىرىپ, ءبىر جاعىن شاعىن دۇكەنگە اينالدىرادى.
جالاعاشتاعى بەس مەكتەپ پەن ءۇش بالاباقشانى جانە دۇكەندەردى كونديتەرلىك تاعامدارمەن قامتاماسىز ەتىپ وتىرعان كاسىپكەر العاشقىدا كوپتەگەن قيىندىققا دۋشار بولىپ, ءتۇن بالاسى ۇيىقتاي الماي قينالعاندىعىن ايتادى.
ۇيدەگى ءحوببيى كاسىبي كونديتەر بولۋعا ازدىق ەتەدى ەكەن. دايىنداعان ونىمدەرى تۇتىنۋشى كوڭىلىنەن شىعۋى ءۇشىن بىلىكتىلىك كەرەك. باسەكەگە قابىلەتتىلىك سىن كوتەرمەگەن جەردە شىعىنعا وتىراسىڭ. وسىنىڭ بارىنەن وتكەن كاسىپكەر وبلىس ورتالىعىنداعى ماماندار كومەگىنە جۇگىنگەن. تىنىمسىز ىزدەنىس, ەڭبەكقورلىق كۇتكەن مەجەگە جەتكىزدى.
كاسىبي بىلىكتىلىگىن جەتىلدىرۋ ءۇشىن الدى قىزىلوردا, سوڭى شىمكەنت اراسىندا شاپقىلاپ, ءتۇرلى كونديتەرلەردەن ءدارىس العان كاسىپكەر الەۋمەتتىك جەلىدەگى رەتسەپتىلەردى دە پايدالانىپ ءجۇر. جاڭا ءونىم تۇرلەرىن وندىرۋگە كوپ ۋاقىتىن جۇمسادى.
وسىلايشا, العاشقى اسۋلاردى الا باستاعان كاسىپكەر وبلىستاعى كاسىپكەرلىك پالاتاسىنا شەتەلدەن كونديتەر مامانىن شاقىرۋ ۇسىنىسىمەن شىعادى.
كاسىپكەرلەر پالاتاسى ايگەرىمنىڭ سۇرانىسىن ەسكەرە كەلە, «بيزنەستىڭ جول كارتاسى-2020» مەملەكەتتىك باعدارلاماسى جانە «اعا سەنورلار» قۇرىلىمى اياسىندا تۇركيادان مادجيت گورپيۋز ەسىمدى ماماندى الدىرادى. تۇرىك ساراپشىسىنىڭ ناۋبايحانا سالاسىنداعى تاجىريبەسى 20 جىلدان اسادى. ناۋبايحانا جانە كونديتەرلىك ىستە جان-جاقتىلىعىمەن كوزگە تۇسكەن, اسا بىلىكتى ماماندار قاتارىنداعى شەتەلدىك مامان ءوزىنىڭ تاجىريبەسىمەن ءبولىستى.
– كاسىپكەرلەر پالاتاسىنىڭ شاقىرتۋىمەن تۇركيادان كەلگەن مادجيت بىزگە ۇلكەن قولداۋ كورسەتتى. ونىمدەردى ازىرلەۋدىڭ وڭتايلى جاقتارىن كورسەتىپ بەردى. كرەمدەردى جاساۋ تاسىلدەرىن, بيسكۆيتتى ءساتتى شىعارۋدى, تورتتىڭ تۇرلەرىن جاساۋدى ۇيرەتۋدە. بايقاعانىم, ءبىز كوپ شىعىس جاسايدى ەكەنبىز. مادجيت بىزگە بار شيكىزاتتان قالدىقسىز ءونىم شىعارۋدى, ءتىپتى ۇنەمدەۋگە دەيىن ۇيرەتىپ جاتىر, – دەيدى كاسىپكەر.
ءا.قايۋپوۆا بيىل كاسىبىن كەڭەيتۋ ءۇشىن «اۋىل شارۋاشىلىعىن قارجىلاي قولداۋ قورى» اق-نىڭ قىزىلوردا وبلىستىق فيليالىنان 4 ملن تەڭگە كولەمىندە نەسيە الدى. بۇل قارجىعا تالاپقا ساي ناۋبايحانا سالىپ, بۇگىندە ءتورت ادامدى جۇمىسپەن قامتىپ وتىر.
باقتيار تايجان,
«ەگەمەن قازاقستان»
قىزىلوردا وبلىسى
