بوكستان سيدنەيدە وتكەن XXVII وليمپيادا چەمپيونى بەكزات ساتتارحانوۆ العاشقى جاتتىعۋلارىن وسى سپورتزالدا جاساپتى. بوكستان ەلىمىزدىڭ 6 دۇركىن چەمپيونى, كسرو-نىڭ 4 دۇركىن چەمپيونى, ازيا ويىندارىنىڭ 2 دۇركىن چەمپيونى نۇرجان سمانوۆ تا كەزىندە وسى زالدا شەبەرلىگىن شىڭداعان. ءيا ءبىز ايتىپ وتىرعان وڭتۇستىك قازاقستان يندۋستريالدى-قۇرىلىس كوللەدجىنىڭ سپورت كەشەنى بۇگىندە كۇردەلى جوندەۋدەن ءوتىپ, جاڭا كەيىپكە ەنگەن. كۇنى كەشە اتالمىش سپورتتىق نىساندا «كوللەدج ديرەكتورىنىڭ جۇلدەسىنە» ارنالعان ۆولەيبولدان II ءداستۇرلى تۋرنير ءوتتى.
كوللەدجدە ءبىلىم الىپ جۇرگەن 1500-گە جۋىق ستۋدەنتتەردىڭ سالاۋاتتى ءومىر سالتىن ۇستانعان ازامات رەتىندە قالىپتاسۋى وقۋ ورنى باسشىلىعى مەن ۇستازدار نازارىنان تىس قالعان ەمەس. ياعني, ستۋدەنتتەردىڭ ساپالى ءبىلىم الۋمەن قاتار دەنە تاربيەسى ساباقتارىن ءتيىستى تالاپ دەڭگەيىندە وتكىزىپ, ءتۇرلى سپورتتىق ۇيىرمەلەرگە قاتىسۋىنا تولىق مۇمكىندىك جاسالعان. «كوللەدج سپورت كەشەنىنىڭ تاريحى تەرەڭ, قازاق سپورتىنىڭ كوپتەگەن جۇلدىزدارى العاشقى جاتتىعۋلارىن وسى زالدا باستاعان. بۇگىندە ستۋدەنتتەرىمىز الدىڭعى بۋىن اعالارىنىڭ داڭقتى جولىن جالعاستىرۋ ماقساتىندا سپورتپەن اينالىسىپ, ءتۇرلى دەڭگەيدەگى جارىستارعا قاتىسىپ ءجۇر. ەلباسى نۇرسۇلتان نازارباەۆ سپورتتىڭ, ونىڭ ىشىندە بۇقارالىق سپورتتىڭ دامۋىنا ءاردايىم ەرەكشە ءمان بەرىپ كەلەدى. كۇنى كەشەگى قازاقستان حالقىنا جولداۋىندا ەلباسى وڭىرلىك دەڭگەيدەگى بۇقارالىق سپورت پەن دەنە شىنىقتىرۋدى دامىتۋ قاجەتتىگىن اتاپ ءوتتى. بۇگىنگى ۆولەيبولدان ۇيىمداستىرىلىپ وتىرعان تۋرنير دە جولداۋلاردا جۇكتەلگەن مىندەتتەردى جۇزەگە اسىرۋ ماقساتىندا جانە «رۋحاني جاڭعىرۋ» باعدارلاماسى اياسىندا وتكىزىلىپ وتىر», - دەيدى يندۋستريالدى-قۇرىلىس كوللەدجىنىڭ ديرەكتورى البينا ەلشيەۆا.
جاستار اراسىنداعى جارىسقا جاناشىرلىق ءبىلدىرىپ, ارنايى كەلگەن داڭقتى سپورتشىلاردىڭ جەڭىس جولىنداعى ەڭبەگى, توزىمدىلىگى مەن تاباندىلىعى, وتانسۇيگىشتىگى مەن ازاماتتىعى ستۋدەنتتەرگە ۇلگى-ونەگە ەتەرلىك. داڭقتى بوكسشى سيدنەي وليمپياداسىنىڭ, الەم چەمپيوناتىنىڭ كۇمىس جۇلدەگەرى مۇحتارحان دىلدابەكوۆ, جوعارىدا ءبىز اتاپ وتكەن نۇرجان سمانوۆ, سامبودان الەمنىڭ ءۇش دۇركىن چەمپيونى, سونداي-اق دجيۋ-دجيتسۋ سپورت تۇرىنەن الەم كۋبوگى مەن ازيانىڭ ەكى دۇركىن چەمپيونى, «الاش پرايد» كلۋبىنىڭ ساپىندا ونەر كورسەتەتىن «سۇڭقار» لاقاپ اتىمەن تانىمال ارمان وسپانوۆ, بوكستان ازيا جانە ازيا ويىندارىنىڭ چەمپيونى, الەم بىرىنشىلىگىنىڭ قولا جۇلدەگەرى دوسجان وسپانوۆ, مۋاي - تاي مەن كيكبوكستان قر سپورت شەبەرى, قر ەڭبەك سىڭىرگەن جاتتىقتىرۋشىسى سۇلتانعالي قۋاندىق جەڭىمپازداردى ماراپاتتاۋ, ءتۋرنيردىڭ جابىلۋ سالتاناتىنا قاتىسىپ, ستۋدەنتتەرمەن اڭگىمەلەستى. شىمكەنت مۋاي-تاي سپورت فەدەراتسياسىنىڭ ۆيتسە-پرەزيدەنتى س. نۇرلىباي ۇلىنىڭ ايتۋىنشا, وسىدان ون جىلدان استام ۋاقىت بۇرىن بۇل سپورت نىسانى توزىپ, كۇتىمسىز جاتقان. «سول جىلدارى ءبىز وسىندا كەلىپ مۋاي-تاي سەكتسياسىن اشتىق. ءيا بۇل تالاي چەمپيوندار شەبەرلىگىن شىڭداعان تاريحي زال. شىمكەنتتە سپورتزالدار كوپ, بىراق مۇنىڭ ءبىر ەرەكشە قاسيەتى بار. وسى زالدان ءبىز 5 بىردەي الەم چەمپيونىن شىعاردىق. ياعني كوللەدجدە ءبىلىم الىپ جاتقان جاستاردىڭ بۇگىندە كۇردەلى جوندەۋدەن ءوتىپ, تولىق جابدىقتالعان سپورتزالدا شىنىعىپ, جەڭىستەرگە جەتۋگە مۇمكىندىگى مول», - دەيدى س.قۋاندىق.
سونىمەن, ستۋدەنتتەر اراسىندا وتكەن تۋرنيردە 19 كوماندا سايىسقا ءتۇسىپ, جەڭىمپازداردى انىقتادى. ءاربىر كەزدەسۋ تارتىستى وتكەن تۋرنيردە I ورىندى «ەلەكتر گازىمەن دانەكەرلەۋشى» س-1801 توبى, II ورىندى «ەلەكترومونتەر» ەم-1818 توبى, سونداي-اق III- ورىندى «اۆتوموبيل جوندەۋشى سلەسار» اس-1810ر توبىنىڭ ستۋدەنتتەرى يەلەندى. جەڭىمپاز كوماندالارعا ارنايى كۋبوكتار مەن مەدالدار تابىس ەتىلدى.
عالىمجان ەلشىباي,
«ەگەمەن قازاقستان»
شىمكەنت
