پيتەر پراتو, «نيۋ-يورك تايمس»
دەۆيد سترەيتفەلد, «نيۋ-يورك تايمس» – كاليفورنيا (اقش)
جازۋشىلىقتى جاساندى ينتەللەكت اتقارا الاتىن ىستەردىڭ قاتارىنا قوسۋعا ءالى ەرتە. بىراق ميستەر سلواندى جۇمىس كەزىندە كورسەڭىز, باعدارلامانىڭ مۇمكىندىگىنە تاڭعالعانىڭىزدى جاسىرا المايسىز.
«ميستەر پەنۋمبرانىڭ 24 ساعاتتىق كىتاپ دۇكەنى» اتتى تۋىندىسىمەن كوپشىلىكتىڭ ماراپاتىنا بولەنگەن ميستەر سلوان ءماتىننىڭ باسىن جازىپ, وزىنە حابارلاما رەتىندە جىبەرەدى. كەيىن ونى ۇلكەن اڭگىمەگە اينالدىرادى. ونىڭ جاڭا شىعارماسى كەلەشەكتەگى كاليفورنيادا ءوربيدى. وقيعا جەلىسى بويىنشا كاليفورنيا تابيعاتى قايتا جاڭعىرىپتى-مىس. اۆتور «بيزوندار قايتىپ كەلدى» دەپ تاقىرىپ قويادى.
بۇل ويىن ودان ءارى ءوربىتۋ ءۇشىن: «بيزوندار شاتقالدا جايىلىپ ءجۇر» دەپ جازىپ, كومپيۋتەر پەرنەتاقتاسىن باسىپ قالادى. اقىلدى ماشينا سوڭعى بىرنەشە سويلەمدى سارالاپ, «اشىق اسپان استىندا» دەگەن سوزدەردى قوسادى.
سلوان مىرزاعا بۇل وي ۇنادى. ء«وزىم وسىنى قوسار ما ەدىم؟ ەكىتالاي, ارينە» دەيدى ول. ءارى قاراي: «بيزوندار ەكى جىل بويى ءارلى-بەرلى ءجۇردى» دەگەن سوزدەردى تۇسىرەدى. «جاساندى جازۋشى» سويلەمدى دامىتىپ, «جايىلىم مەن قالا اراسىندا» دەگەن بولىكتى ۇسىنادى.
«بۇل تۋرا مەنىڭ ويلاعانىمداي بولماۋى مۇمكىن, دەگەنمەن قىزىق», دەيدى جازۋشى. ونىڭ ماشيناسى جاساندى ينتەللەكت سياقتى ۇلكەن اتاۋعا يە ەمەس. بۇل – اۆتور ءسوزىن ۇيرەنىپ, سارالاپ, دامىتاتىن, ونىڭ ويىن جەتىلدىرەتىن ماشينا. باسقاشا ايتقاندا, جازۋشىعا كومەكشى ءارى باقتالاس قۇرىلعى.
«تالاي جىل كوپتەگەن كىتاپ وقىدىم. سونىڭ ءبارى ميىما قاتتالىپ, جازىلا بەرگەنى انىق. كەيىنىرەك سول ويلار قورىتىلادى. سوڭعى ناتيجە ناقتى بولعانمەن, وعان جەتەتىن جول ارقيلى بولۋى مۇمكىن», دەيدى جازۋشى.
ناتيجەگە جەتۋ جولى ءتۇرلى باعىتقا كەتۋى ىقتيمال. سكوتت فرەنچ ەسىمدى ەلەكتروندى باقىلاۋ جونىندەگى كەڭەسشى 25 جىل بۇرىن قۋاتتى «ماك» قۇرىلعىسىن قولدانىپ, جاكلين سيۋزاننىڭ اڭگىمەلەرىنە ۇقساس تۋىندى جازۋدى كوزدەدى. ول سيۋزان شىعارمالارىنىڭ كەيىپكەرلەرىنە قايتا جان بەرۋ ءۇشىن مىڭداعان باعدارلاما كودىن جازدى.
ميستەر فرەنچ كومپيۋتەر ارقىلى شىعارمانى اياقتاۋعا سەگىز جىل جۇمسادى. ونىڭ «بارى وسى» شىعارماسى باسىلىپ شىققانىمەن, جاكلين سيۋزاننىڭ «قۋىرشاقتار القابى» سياقتى بەستسەللەرلەر اتانعان جوق.
شىعارما جازۋدا جاساندى ينتەللەكتىنىڭ كومەگىنە جۇگىنگەندەر قاتارى مۇنىمەن شەكتەلمەيدى.
Botnik Studios ستۋدياسى ايگىلى «گارري پوتتەر» كىتابىنىڭ ءتورت پاراعىن قايتا جازۋ ءۇشىن ماتىندىك باعدارلاما قولدانادى. قىتايلىق ەلەكتروندى كوممەرتسيالىق كومپانياسى «اليبابا گرۋپ» قاڭتاردا الەمدىك وقۋ-ءتۇسىنۋ تەستىندە ادامداردى باسىپ وزاتىن قۇرىلعى جاساعانىن مالىمدەگەن بولاتىن. ەگەر ماشينالار وقي السا, دەمەك جازا دا الادى.
ميستەر سلوان بۇعان ءوزى كوز جەتكىزگىسى كەلدى. ينتەرنەتتەن «گالاكتيكا ماسەلەلەرى» مەن «ەگەر» اتتى 1950, 1960 جىلدارداعى ەكى عىلىمي جۋرنالدىڭ ءارحيۆىن جيناقتادى.
بۇل تۇپنۇسقالار تاپتاۋرىن ءارى سىڭارجاق بولاتىن. سوندىقتان ميستەر سلوان قۇرىلعىنى دجون ستەينبەك, دەشيەل حاممەت, دجوان ديديون, فيليپ ديكتىڭ روماندارىنىڭ سيليكون القابىنىڭ اۋىزشا تاريحىنىڭ, دجونني كەش پوەمالارىنىڭ تسيفرلى ماتىنىمەن تولىقتىردى.
ميستەر سلواننىڭ پاراگرافى: «بيزوندار ەلۋ مەتر جەردە شاتقالدا اشىق اسپان استىندا جايىلىپ جاتتى. ولار ەكى جىل بويى قالا مەن القاپ اراسىندا ءارلى-بەرلى جايىلىپ جۇرگەن» دەگەن جولدارمەن اياقتالدى.
«بۇل ءالى دە قارابايىر, دەگەنمەن ماعان ۇنايدى. الداعى وزگەرىستەر مۇنى وتكەن عاسىرداعى راديو قۇرىلعىلار سياقتى جولدا قالدىرۋى مۇمكىن», دەيدى جازۋشى.
ماقالانى اۋدارعان سۆەتلانا عالىمجانقىزى,
«ەگەمەن قازاقستان»
